3 ސްކޫލެއްގެ ޖާގަ އިތުރުކުރުމުގެ މަސައްކަތް 3 ކުންފުންޏަކަށް

ތ.ވިލުފުއްޓާއި ބ.ކުޑަރިކިލާއި ށ.ފޭދޫ ސްކޫލަށް ކްލާސް ރޫމް އިމާރާތް ކުރުމާއި، ށ.ފޭދޫ ސްކޫލްގެ މަލްޓިޕަރޕަސް އިމާރާތުގެ ނުނިމިހުރި މަސައްކަތް ކުރަން ބަޔަކާ ހަވާލުކުރައްވައިފިއެވެ.

މީގެ ތެރެއިން ތ. ވިލުފުށީ ސުކޫލްގައި 4 ކުލާސް ރޫމް އިމާރާތް ކުރުމުގެ މަސައްކަތް ހަވާލުކުރައްވާފައިވަނީ ޓިކް ޓެކް އިންވަސްމަންޓާއެވެ. މިމަސައްކަތުގެ އެއްބަސްވުމުގައި ޓިކް ޓެކް އިންވެސްޓްމެންޓްގެ ފަރާތުން ސޮއިކުރީ ޗީފް ފައިނޭންސް އޮފިސަރ އިސްމާޢިލް ޒަހުރާން ޒުބައިރުއެވެ. މިމަސައްކަތް ހަވާލުކުރައްވާފައިވަނީ 120 ދުވަހުގެ ތެރޭގައި ނިންމާ ގޮތަށެވެ. މި މަސައްކަތަށް 4.32 މިލިޔަން ރުފިޔާ ޚަރަދުވެއެވެ.

އެޑިއުކޭޝަން މިނިސްޓްރީން ށ. ފޭދޫ ސްކޫލްގައި 8 ކުލާސްރޫމް އިމާރާތް ކުރުމުގެ އިތުރުން މަލްޓިޕަރޕަސް ހޯލް އިމާރާތުގެ ނުނިމިހުރި މަސައްކަތް ކުރުމަށް ހަވާލުކުރައްވާފައިވަނީ އީކޯ އިންވެސްޓްމެންޓް މޯލްޑިވްސް ޕްރައިވެޓް ލިމިޓެޑާއެވެ.

2021 ވަނަ އަހަރުގެ ޕީއެސްއައިޕީގެ ބަޖެޓުން ކުރިއަށްގެންދާ މަޝްރޫޢުގެ އެއްބަސްވުމުގައި އީކޯ އިންވެސްޓްމެންޓް މޯލްޑިވެސް ފަރާތުން ސޮއިކުރީ ޖެނެރަލް މެނޭޖަރ ހަސަން ރިފާންއެވެ. އީކޯ އިންވެސްޓްމަންޓާ މިމަސައްކަތް ހަވާލުކުރައްވާފައިވަނީ
400 ދުވަހުގެ ތެރޭގައި ނިންމާގޮތަށެއެވެ.

ބ. ކުޑަރިކިލު ސްކޫލްގައި 4 ކުލާސްރޫމް އިމާރާތް ކުރުމުގެ މަސައްކަތް ހަވާލުކުރައްވާ ފައިވަނީ ވޯލްސީ ޕްރައިވެޓް ލިމިޓެޑާއެވެ. އެކުންފުނީގެ ފަރާތުން އެއްބަސްވުމުގައި ސޮއިކުރީ މެނޭޖިންގ ޑިރެކްޓަރ އަފާފް ސައީދުއެވެ. މި މަސައްކަތް ވޯލްސީއާ ހަވާލުކުރައްވާފައިވަނީ 175 ދުވަސް ތެރޭގައި ނިންމާގޮތަށް 4.85 މިލިޔަން ރުފިޔާއަށެއެވެ. މިތިން އެއްބަސްވުމުގައިވެސް އެޑިއުކޭޝަން މިނިސްޓްރީން ސޮއިކުރެއްވީ ޕޮލިސީ ޑިރެކްޓަރ ނައުޝާދު އިބްރާހިމްއެވެ.

އެޑިއުކޭޝަން މިނިސްޓްރީން ކުރިއަށް ގެންދާ މި މަޝްރޫޢުތަކަކީ 2021 އާއި 2022 ވަނަ އަހަރުގެ ޕީއެސްއައިޕީގެ ބަޖެޓުން ކުރިއަށްގެންދާ މަޝްރޫޢުތަކެއް ކަމަށް އެމިނިސްޓްރީން ހާމަކުރައްވައެވެ.