މީމު މަސް ބަނދަރު މަޝްރޫޢު ނިމުމަކާއި ގާތަށް

މަސްވެރިކަމުގެ ވަޞީލަތްތައް އިތުރުކުރުމާއި މަސްވެރިންނަށް ލުއިފަސޭހަކަމާއެކު މަސްކިރޭނެ ނިޒާމެއް ޤާއިމްކުރުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. މިގޮތުން ކުރެވޭ އެއް މަސައްކަތަކީމުލަކަތޮޅު މުލަކުގައި ތަރައްޤީކުރާ މަސް ބަނދަރުގެ މަސައްކަތެވެ.

1800 އެއްހާ މީހުންގެ އާބާދީއެއް ދިރިއުޅެމުންދާ މުލަކު ރައްޔިތުން އާމްދަނީ ހޯދުމަށް މައިގަނޑުގޮތެއްގައި ކުރާ މަސައްކަތަކީ މަސްވެރިކަމެވެ. އެރަށުގައި މިވަގުތުވެސް މަހަށްދާ ބޮޑު 5 ދޯންޏެއް ހަރަކާތްތެރިވަމުންދެއެވެ. އަދި އިތުރު 3 ދޯންޏެއް ބަނުމުގެ މަސައްކަތްވެސް އަންނަނީ ކުރަމުންނެވެ.

މުލަކުގައި ތަރައްޤީކުރާ މިފްކޯ މަސް ބަނދަރުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމް.ޓީ.ސީ.ސީއާ ޙަވާލުކޮށް، އެކަމުގެ އެއްބަސްވުމުގައި ސޮއިކޮށްފައިވަނީ 11 ފެބްރުއަރީ 2021 ވަނަ އަހަރެވެ.

މި މަޝްރޫޢުގެ ޢަމަލީ މަސައްކަތް އެކުންފުނިން ފަށާފައިވަނީ 2021 ވަނަ އަހަރުގެ އޭޕްރީލްމަހުގެ ތެރޭގައެވެ. މި މަޝްރޫއުގެ ދަށުން، ބިން ހިއްކުމުގެ މަސައްކަތާއި ބޮލާރޑާއި ވީ–ފެންޑަރ ހަރުކުރުމުގެ މަސައްކަތް މިހާރު ވަނީ ނިމިފައެވެ. އަދި އެއްގަމުތޮށީގެ ކޮންކްރީޓް މަސައްކަތްތަކުގެ 91 އިންސައްތަ ނިމިފައިވާކަމަށް އެކުންފުނިން ބުނެއެވެ.

މުޅި މި މަޝްރޫޢުގެ މަސައްކަތް ކުރިއަށްގޮސްފައިވާ ހިސާބަށް ބަލާއިރު، މުޅި މަޝްރޫޢުގެ 83 އިންސައްތަ ނިމިފައިވާކަމަށް އެކުންފުނިން މަޢުލޫމާތުދެއެވެ. އެމް.ޓީ.ސީ.ސީގެ އަމާޒަކީ މިއަހަރުގެ ނިޔަލަށް މުޅި މަޝްރޫޢުގެ މަސައްކަތް ނިންމާ ބޭނުންކުރަން ފެށުމެވެ.

މީމު މަސްބަނދަރާއި ގުޅޭ ގޮތުން މައުލޫމާތު ދެއްވަމުން މުލަކު ކައުންސިލްގެ ރައީސް އަޙްމަދު ޖަމާލް ވިދާޅުވީ، މަސްވެރިންގެ އެންމެ ބޮޑު އެއް ޝަކުވާއަކީ ބާނާ މަސްކޮޅު ނުކިރުވި އުކާލަން ޖެހުންކަމަށެވެ. ޖަމާލް ވިދާޅުވީ، މިހެން ދިމާވާ މައިގަނޑު ސަބަބަކީ މަސްކިރުވޭނެ އެކަށީގެންވާ ވަޞީލަތްތައް މަދުވުމާއި، ރަނގަޅު ޚިދުމަތެއް ނުލިބުމެވެ.

މަސްވެރި އަތޮޅުތަކުގައި މަސްކިރުވާނެ ބަނދަރުތައް ހުރުން މުހިންމުކަން ފާހަގަކުރައްވާޖަމާލް ވިދާޅުވީ، މުލަކުގައި ތަރައްޤީ ކުރާ މަސް ބަނދަރަކީ އެރަށުގެ މަސްވެރިންގެ އިތުރަށް މުޅި އެ އަތޮޅުގެ މަސްވެރިންގެވެސް އުއްމީދާ ގުޅިފައިވާ މުހިންމު މަޝްރޫޢެއްކަމަށެވެ.

"މި ރަށަކީ މަސްވެރި ރަށެއް. އެހެންވުމާއެކު މަސްވެރިން މަސް ބާނައިގެން މަސް ނުކިރިގެން އެބަ އުޅެން ޖެހޭ ވަރަށް ހާލުގައި. މަސް ކިރަން ދާން މިޖެހެނީ މާލެ ނޫނީ ކޮންމެސް އެހެންތާކަށް. މިހެން މަސްކޮޅު ހިފާގެން ދާން ޖެހުނީމައި މަސްތައް ގިނަ ފަހަރު ހަލާކުވޭ އެބަ" ޖަމާލް ވިދާޅުވިއެވެ.

މީމު މަސް ބަނދަރާއެކު މުޅި އަތޮޅުގެ މަސްވެރިކަމަށް ކުރިއެރުން ލިބި، އާމްދަނީ އެތަށް ގޮތަކުން އިތުރުވާނެކަމަށް މުލަކު ކައުންސިލުގެ ރައީސް ޖަމާލް ވިދާޅުވެއެވެ. އަދި މި ބަނދަރުގެ ސަބަބުން އެ ސަރަޙައްދުގެ މަސްދޯނިތަކުން މަސްކިރުވަން ކުރާ ހޭދަ ކުޑާވާނެކަމަށާއި، އާމްދަނީ އިތުރުވެ އައު ވަޒީފާތައްވެސް އުފެދިގެންދާނެކަން ޖަމާލް ފާހަގަކުރައްވައެވެ.

މި މަޝްރޫޢުގެ ދަށުން، 22,240 ކިއުބިކް މީޓަރުގެ ބިން ހިއްކުމާއި، 8,640 ކިއުބިކް މީޓަރުގެ ބަނދަރު ފުންކުރުން ހިމެނެއެވެ. އަދި 160 މީޓަރުގެ ސައަރަޙައްދެއްގައި އެއްގަމު ތޮށި ލުމާއި، 68.90 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 3,200 އަކަ މީޓަރުގެ ސަރަހައްދެއްގައި ޕޭވްމެންޓް އެޅުންވެސް މި މަޝްރޫޢުގައި ހިމެނެއެވެ. މި މަސް ބަނދަރަކީ ސަރުކާރުން 52.95 މިލިއަން ރުފިޔާ ޚަރަދުކުރައްވައިގެން ތަރައްޤީކުރައްވާ ބަނދަރެކެވެ.