ތިނަދޫ އިންޑަސްޓްރިއަލް ޒޯން ފުރަތަމަ ފިޔަވަހި ސެޕްޓެމްބަރަށް ނިމޭނެ: އެމްޓީސީސީ

ތިނަދޫ އިންޑަސްޓްރިއަލް ޒޯންގެ ފުރަތަމަ ފިޔަވަހީގެ މަސައްކަތް، ސެޕްޓެމްބަރު މަހަށް ނިންމާނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީން ވިދާޅުވެއްޖެއެވެ. ތިނަދޫ އިންޑަސްޓްރިއަލް ޒޯނަކީ، ރަށަށް އިޤްތިޞާދީ ފުރުޞަތުތައް އިތުރުކުރުމަށް ސަރުކާރުން ކުރިއަށްގެންދަވާ މުހިންމު މަޝްރޫޢެކެވެ.

ތިނަދޫގައި ސިނާޢީ ސަރަޙައްދު ހިއްކާ، ސަރަޙައްދީ ބަނދަރެއް ތަރައްޤީކުރުމަށް އެމްޓީސީސީއާ ހަވާލުކުރައްވާފައިވަނީ މިދިޔަ އަހަރުގެ ކުރީކޮޅުއެވެ. މިމަސައްކަތުގެ ތެރޭގައި ރާއްޖެއިން ބޭރުން މުދާ ގެންނަ އުޅަނދުތައް ކައިރިކުރެވޭނެގޮތަށް ހަދާ ޕޯޓުގެ ބަނދަރު މަސައްކަތާއި، ރަށުގައި ބޭނުންކުރާ އާއްމު ބަނދަރު ބޮޑުކުރުމުގެ މަސައްކަތް ހިމެނެއެވެ.

މި ޕްރޮޖެކްޓު ކުރިއަށްގެންދިއުމަށް އެރަށުގައި 10 ހެކްޓަރުގެ ސަރަޙައްދެއް ހިއްކައެވެ. މަސައްކަތް ކުރިއަށްދާގޮތް ބައްލަވާލެއްވުމަށްފަހު އެމްޓީސީސީގެ ސީއީއޯ ޢާދަމް އާޒިމް ވިދާޅުވީ އިންޑަސްޓްރިއަލް ޒޯނަށް ބޭނުންވާ ބޮޑުބައެއް ހިއްކާ ނިމިފައިވާކަމަށެވެ. އަދި އާއްމު ބަނދަރުގެ ތޮށީގެ މަސައްކަތްތުގެވެސް ބޮޑު ބައެއް މިހާރު ނިމިފައިވާކަމަށެވެ.

ތިނަދޫ ޕޯޓު ތަރައްޤީކުރުމުގެ މަސައްކަތުގެ ދަށުން ހަދާ ބަނދަރުގައި 90 މީޓަރުގެ ތޮއްޓެއް ލާނެއެވެ. މިސަރަޙައްދުގެ ފުންމިނުގައި 8.5 މީޓަރުގެ ހުންނާނެކަމަށް އެމްޓީސީސީން ވިދާޅުވެއެވެ. މިއާއެކު މުދާ އުފުލާ ބޮޑެތި ބޯޓުފަހަރަށްވެސް ފަސޭހައިން ބަނދަރާ ކައިރިކޮށް، މުދާ ބާލާ އެރުވޭނެއެވެ.

ތިނަދޫގައި މިހާރު ބޭނުންކުރަމުންދާ އާއްމު ބަނދަރަށް އިތުރުކުރަނީ 350 މީޓަތުގެ ތޮއްޓެކެވެ. އެ ބަނދަރުގެ ފުންމިނުގައި 3.5 މީޓަރު ހުންނާނެއެވެ.

އާޒިމް ވިދާޅުވީ އިންޓަނޭޝަނަލް ސީ ޕޯޓު ބަނދަރު ހެދުމަށް، ޝީޓް ޕައިލް ކުރުމަށް ބޭނުންވާ ބައެއް ސާމާނު މިހާރު ރަށަށް ގެންގޮސްފައިވާކަމަށެވެ. މިމަސް ނިމުމުގެ ކުރިން، ސަރަޙައްދީ ވިޔަފާރި ބަނދަރުގެ ކީވޯލް މަސައްކަތް ފަށާނެކަމަށް އާޒިމް ވިދާޅުވިއެވެ. އާޒިމް ވިދާޅުވީ އިންޑަސްޓްރިއަލް ޒޯނަށް ބޭނުންވާ ފުރަތަމަ ފިޔަވަހީގެ ހުރިހާ މަސައްކަތްތައް ކުރިއަށް އޮތް ދެ މަހެއްހާ ދުވަހުގެ ތެރޭގައި ނިމޭނެކަމަށެވެ.

"އިންޓަނޭޝަނަލް ޕޯޓުގެ މަސައްކަތްތައް ސެޕްޓެމްބަރަށް ނިންމާލެވޭނެ. ދެން އެބަ ހިމެނޭ ދެވަނަ ފިޔަވަހީގައި ޕިކްނިކް އައިލެންޑެއް ހެދުމުގެ މަސައްކަތް. މިހާރު އެކަމުގެ އީއައިއޭ ހަދަމުން ދަނީ. މަސް ދެމަހުން އީއައޭ ނިންމާލެވި، މަސައްކަތް ފެށޭނެ. މިއީ ގަވާއިދުގެ ތެރެއިން ކުރަންޖެހޭ ވަރަށް ބޮޑު މަސައްކަތެއް." އާޒިމް ވިދާޅުވިއެވެ.

ތިނަދޫގައި މިފްކޯގެ މަސް ކާރުޚާނާއެއް ހެދުމަށްވެސް، އެމްޓީސީސީއާއި މިމަހުގެ ތެރޭގައި ވަނީ ހަވާލުކުރައްވާފައެވެ. އާޒިމް ވިދާޅުވީ މި މަސައްކަތަށް ބޭނުންވާ ބިން އިތުރުކުރުމުގެ މަސައްކަތްވެސް މަހެއްހާ ދުވަހުގެ ތެރޭގައި ނިމޭނެއެވެ. އާޒިމް ވިދާޅުވީ ބިމުގެ މަސައްކަތް ނިމުމާއެކު އިމާރާތް އެޅުމުގެ މަސައްކަތް ފަށާނެކަމަށެވެ. މި ޕްރޮޖެކްޓްގެ ޑީޓެއިލް ކުރެހުންތައް ތައްޔާރުކުރަމުންދާ ކަމަށްވެސް އާޒިމް ވިދާޅުވިއެވެ.

ތިނަދޫ އުތުރު ދާއިރާގެ މެންބަރު ޢަބްދުލްމުޣުނީ ވިދާޅުވީ ތިނަދޫގައި ކުރިއަށްގެންދިއުމަށް ހުށައެޅީ، މޫސުން ގޯސްވާ ދުވަސްވަރު ބަނދަރަށް ދިމާވާ މައްސަލަ ޙައްލުކުރުމަށް ތޮއްޓެއްލުމަށް އެކަނިކަމަށެވެ. ނަމަވެސް ސަރުކާރުން މި މަސައްކަތް ފުޅާކޮށްދެއްވާ، މިއަދު ތިނަދޫގައި ކުރިއަށްގެންދަނީ ރަށުގެ އިޤްތިޞާދަށް ވަރަށް މުހިންމު، ބޮޑު މަސައްކަތެއްކަމަށެވެ.

"ބޮޑު އިންޑަސްޓްރިއަލް ޒޯނެއް ރަށަށް މި ލިބެނީ. މިއީ އެއަރޕޯޓެއް ނިންމާހާ އަގުގެ ބޮޑު އިންވެސްޓްމަންޓެއް. ނިމޭއިރު އިންޓަނޭޝަނަލް ޕޯޓާއި، މިފްކޯ ކޯލްޑް ސްޓޯރޭޖް އެބަ ޤާއިމުކުރެވޭ. ވަރަށް ބޮޑު ކުރިއެރުމެއް." މުޣުނީ ވިދާޅުވިއެވެ.

ގދ.ތިނަދުއަކީ 5000އަށްވުރެ ބޮޑު އާބާދީއެއް އޮންނަ ރަށެކެވެ. އަދި ބޮޑެތި ވިޔަފާރިތަކާއި އިޤްތިޞާދީ ހަރަކާތްތައް ފުޅާވަމުން އަންނަ ރަށެއްވެސްމެއެވެ.