ކޫއްޑޫ މަސް ބަނދަރުގެ މަސައްކަތް އަވަސްކުރަނީ

ކޫއްޑޫ މަސް ބަނދަރު ތަރައްޤީކުރުމުގެ މަސައްކަތް އަވަސްކުރުމަށް ކުރަންޖެހޭ މަސައްކަތްތައް ކުރަމުންދާކަމަށް އެމްޓީސީސީގެ ސީއީއޯ ޢާދަމް އާޒިމް ވިދާޅުވެއްޖެއެވެ.

ކޫއްޑޫއަކީ ދެކުނުގެ މަސްވެރިކަމުގައި އެންމެ މުހިންމު ރަށެވެ.

މަސް ކިރުވުުމަށް ކޫއްޑޫގައި މިހާރު ބޭނުންކުރަމުންދާ ބަނދަރަކީ ގާތްގަނޑަށް 300 ފޫޓުގެ ކުޑަ ބަނދަރެކެވެ. އެއް ފަހަރާ ޚިދުމަތް ދެމެނީ ތިންވަރަކަށް އުޅަނދަށެވެ. ޖާގައިގެ ދަތިކަން ކުރިމަތިވެފައިވާ އެ ބަނދަރުގެ މައްސަލަ ޙައްލުކޮށް މަސް ފެކްޓްރީގެ ކެޕޭސިޓީ އިތުރުކުރމުގެ މަސައްކަތްކަކީީ، ސަރުކާރުން މަސްވެރިންނަށްވީ މުހިންމު ވަޢުދެކެވެ.

މީގެދަށުން ކޫއްޑޫ މަސް ބަނދަރު ތަރައްޤީކުރުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީއާއި ހަވާލުކުރީ މިއަހަރުގެ ޖެނުއަރީ މަހުގެ ތެރޭގައެވެ. އަދި އީއައިއޭގެ މަސައްކަތްތައް ނިންމާ އެކަމަށް ބޭނުންވާ ސާމާނު މިދިޔަ މޭ މަހު ވަނީ އެރަށަށް ގެންގޮސްފައިވެއެވެ. އަދި ޢަމަލީ ބައެއް މަސައްކަތްތައް މިހާރު ސައިޓުގައި ވަނީ ފަށާފައެވެ.

ކޫއްޑޫ ބަނދަރު ޕްރޮޖެކްޓްގެ މަސައްކަތާއި ގުޅޭގޮތުން ވާހަކަދައްކަވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ، އެ ބަނދަރަކީ 4 މީޓަރަށް ފުންކޮށް ތަރައްޤީކުރަންޖެހޭ ބަނދަރަކަށްވާތީ، މަސައްކަތް ކުރިއަށްގެންދިއުމުގައި މޫސުމީ ބައެއް ދަތިތައް ކުރިމަތިވިކަމަށެވެ. ނަމަވެސް މިހާރު މަސައްކަތް އަވަސްކުރުމަށް ބޭނުންވާ އިތުރު އިކުޕްމަންޓްތައް ހޯދައިގެން މަސައްކަތް ފަށާފައިވާކަމަށް އާޒިމް ވިދާޅުވިއެވެ.

އާޒިމް ވިދާޅުވީ މިއީ މަސްވެރިންނާ ގުޅުންހުރި މަޝްރޫޢުއަކަށްވާތީ، ޚާއްސަ އިސްކަމެއް ދީގެން މަޝްރޫޢުގެ މަސައްކަތް ކުރަމުންދާކަމަށެވެ.

މި ޕްރޮޖެކްޓްގެ ދަށުން ކޫއްޑޫގައި ކުރިން ބޭނުންކުރި 300 ފޫޓުގެ ބަނދަރުގެ އިތުރުން، 1000 ފޫޓުގެ ޒަމާނީ ބަނދަރެއް ތަރައްޤީކުރާނެއެވެ.

"ރޭމްޕްެވެސް، ސްލިޕްވޭ ހިމެނޭނެ. ޕޭމަންޓް ހަދާ ލައިޓް ހަރުކޮށް އެންމެ ޒަމާނީ ބަނދަރެއް މިއީ. އެންމެ ބޮޑު ފަސޭހައަކަށްވާނީ ފުން ބަނދަރަކަށްވާތީ ބޮޑެތި ބޯޓުފަހަރަށްވެސް ފަސޭހައިން ކައިރިކުރެވި ބޭނުންކުރެވޭނެތި. މުޅި މަޝްރޫޢު އަންނަ އަހަރު މޭ މަހަށް ނިންމާނަން." އާޒިމް ވިދާޅުވިއެވެ.

ކޫއްޑޫގައި މިހާރޮ އޮތް ބަނދަރަކީ ބަރަށް ބޮޑަށް ހަލާކުވެ، އަދި އުނޅަދުތަކާއެކު ވަރަށް ބޮޑަށް ތޮއްޖެހިފައި އޮތް ކުޑަކުޑަ ބަނދަރެކެވެ. ގިނައިން މަސް ބާނާ ދުވަސްވަރު ދުވާލެއްގެ މައްޗަށް 20 ނުވަތަ 25 ދޯނި ކޫއްޑޫ ފަޅަށް މަސްކިރުމަށް ވަންނަކަމަށް މިފްކޯއިން ވިދާޅުވެއެވެ. އައު ބަނދަރާއެކު ކޫއްޑޫ ފެކްޓްރީން އެއްފަހަރާ ޚިދުމަތް ދެވޭ ދޯނިތައް އިތުރުވެ، ބަނދަރުގެ ޖާގައިގެ މައްސަލައަށް ބޮޑު ޙައްލެއް ލިބޭނެއެވެ.

ކޫއްޑޫގައި މިފްކޯއިން ހިންގާ ބަނދަރު ބޮޑުކޮށް މަރާމާތު ކުރުމުގެ މަސައްކަތް އެމް.ޓީ.ސީ.ސީއާ ޙަވާލުކުރައްވާފައިވަނީ 78.37 މިލިއަން ރުފިޔާއަށެވެ. މިއީ އޭޑީބީގެ އެހީގައި ގެންދާ ޕްރޮޖެކްޓެކެވެ.

މިފްކޯގެ ބަނދަރުގެ އިތުރުން، މަސްކިރުމުގެ ފެސިލިޓީތައް އިތުރުކުރުމުގެ މަޝްރޫޢުތައްވެސް އަންނަނީ ސަރުކާރުން ހިންގަވަމުންނެވެ.