ރައީސް ޔާމީންގެ ކެންޑިޑަސީ މައްސަލައިގެ އަޑުއެހުން ނިންމާލައިފި

ރައީސް ޔާމީންގެ ކެންޑިޑަސީއާ ގުޅިގެން ސުޕްރީމް ކޯޓަށް ހުށައެޅި ދުސްތޫރީ މައްސަލައިގެ އަޑުއެހުން ނިންމަވާލައިފިއެވެ.

ކުރިއަށްއޮތް ރިޔާސީ އިންތިޚާބުގައި ވާދަކުރެއްވުމަށް ރައީސް ޔާމީންގެ ނަންފުޅު ބަލައި ނުގަތުމުން، އިލެކްޝަންސް ކޮމިޝަނާއި ދެކޮޅަށް ޕީޕީއެމުން ސުޕްރީމް ކޯޓަށް ހުށައެޅި މައްސަލައިގެ އަޑުއެހުން ގާތްގަނޑަކަށް 7 އިރަށް ކުރިޔަށް ދިޔައެވެ.

މި މައްސަލައިގައި ރައީސް ޔާމީންގެ ފަރާތްޕުޅުން ވިދާޅުވަމުން ގެންދެވީ ނިހާއީ ހުކުމެއް ނާންނަހާ ހިނދަކު ރިޔާސީ އިންތިޚާބުގައި ވާދަކުރެއްވުމުގެ ފުރުޞަތު ނުގެއްލޭނެ ކަމަށެވެ. އެހެންކަމުން ރައީސް ޔާމީންގެ ޝަރުތު ހަމަވާކަމަށް ކަނޑައަޅާދެއްވުމަށް ރައީސް ޔާމީން ވަނީ އެދިވަޑައިގެންފައެވެ. އަދި ރައީސް ޔާމީނަށް ކުރިމަތި ނުލެވޭނަމަ ޕީޕީއެމުން އެހެން ކެންޑިޑޭޓަކު ނެރުމަށް ފުރުޞަތު ދިނުމަށްވެސް ރައީސް ޔާމީންގެ ފަރާތްޕުޅުން ވަނީ އެދިވަޑައިގެންފައެވެ.

ރައީސް ޔާމީންގެ ވަކީލުން ނިހާއީ ހުކުމާއި ގުޅޭގޮތުން ދެއްކެވި ވާހަކަތަކަށް ރައްދުދެއްވަމުން އިލެކްޝަންސް ކޮމިޝަނުން ވިދާޅުވީ ނިހާއީ ހުކުމެއް ނާންނަ މީހަކަށް ރައީސްކަމަށް ކުރިމަތިލެވޭ ގޮތަށް ޤާނޫނޫ އަސާސީ މާނަކޮށްފިނަމަ، ރައީސްގެ މަޤާމާއި ދައުލަތުގެ އެހެން މަޤާމުތަކުގައި ބޮޑެތި ކުށްވެރިން ތިބުމުގެ ފުރުޞަތު ހުޅުވިގެންދާނެކަމަށެވެ. ޕީޕީއެމަށް އިތުރު ފުރުޞަތެއް ދިނުމުގެ ގޮތުން އިތުރު މުއްދަތެއް ދީފިނަމަ އިންތިޚާބު ބާއްވަން ޖެހޭ ތާރީޚުގައި ނުބޭއްވެނެކަންވެސް އިލެކްޝަންސް ކޮމިޝަނުން ފާހަގަކުރެއްވިއެވެ. އެގޮތުން ވޯޓަރސް ލިސްޓް ބަދަލުކުރަންޖެހުމާއި އެނޫންވެސް ކަންކަން ކުރަން ޖެހޭނެކަން އެ ކޮމިޝަނުން ވަނީ ފާހަގަކުރައްވާފައެވެ.

މި މައްސަލާގެ ތެރެއަށް ތަދައްހުލް ކުރުވާފައިވާ ދައުލަތުގެ ބަންޑާރަ ނައިބުގެ ވަކީލުން ވިދާޅުވީ ރައީސް ޔާމީންގެ ކެންޑިޑަސީއާ ގުޅޭގޮތުން އިލެކްޝަންސް ކޮމިޝަނުން ނިންމާފައިވާ ނިންމުން ރަނގަޅުކަމަށެވެ. އެގޮތުން ޤާނޫނު އަސާސީގައި ވަކިގޮތަކަށް ކަނޑައަޅާފައިވަނީ ހުކުމެއްގައި ހުރި މީހަކަށް އެ މަޤާމު ނުދިނުމުގެ ބޭނުމުގައިކަމަށެވެ.

ރައީސް ޔާމީންގެ މައްޗަށް ޖަލު ހުކުމެއްގެ އިތުރުން ސާބިތު ދަރަންޏެއްވެސް އޮތުމުން ރައީސްކަމުގެ ޝަރުތެއް ގެއްލިފައިވާކަން އިލެކްޝަންސް ކޮމިޝަނުން ކޯޓްގައި ވަނީ ވިދާޅުވެއެވެ. ދަރަނީގެ ބަހުސްގައި ޔާމީންގެ ފަރާތްޕުޅުން ވަކީލުން ވިދާޅުވަމުން ގެންދެވީ އެެއީ ސާބިތު ދަރަންޏެއްކަމުގައި ނުދޭކަމަށެވެ.

ވ. އާރަށުގެ މައްސަލާގައި 25 ނޮވެމްބަރ 2022 ގައި ކޮށްފައިވާ 11 އަހަރުގެ ޖަލު ހުކުމާއި އެކު 5 މިލިއަން ޑޮލަރުގެ ޖޫރިމަނާ 6 މަސްދުވަހުގެ ތެރޭގައި ދެއްކުމަށް ވަނީ އަމުރުކޮށްފައެވެ. އެ ޖޫރިމަނާއާއި ގުޅިގެން ޝަރީއަތުގެ މަޖިލީހުގައި ވާހަކަ ދައްކަމުން ރައީސް ޔާމީން ވިދާޅުވީ އެއީ ދައްކަންޖެހޭކަން އެނގިވަޑައިގަންނަވާކަމަށާއި އެ ޖޫރިމަނާ ނުދެއްކެވުމުގެ ގަސްތެއް ނެތްކަމަށެވެ. އެހެންނަމަވެސް އެ ފައިސާ ދައްކަންޖެހޭ ފަހު ތާރީޚެއް އެނގިވަޑައިނުގަންނަވާކަމަށް ރައީސް ޔާމީން ވިދާޅުވިއެވެ.

މި އަޑުއެހުމުގައި ފަނޑިޔާރުންގެ ބެންޗުން ވަނީ މައްސަލަ ހުށައެޅުއްވި ރައީސް ޔާމީންގެ ވަކީލުންގެ ޓީމާއި ގިނަ ސުވާލުތަކެއް ކުރިމަތިކުރައްވާފައެވެ. މިގޮތުން ނިހާއީ ހުކުމް މާނަކުރާ ގޮތާއި ޖަލު ހުކުމެއް ތަންފީޒުކުރަމުން ގެންދާ މީހަކު އިންތިޚާބުގައި ވާދަކޮށްގެން ހޮވިއްޖެނަމަ އެމީހާގެ ހުކުމް ނިމުނީތޯ ނޫނީ ދެންވާނީ ކިހެންތޯ ފަދަ ސުވާލުތައް ވަނީ އުފައްދަވާފައެވެ.

މި މައްސަލައިގެ ހުލާސާ ބަޔާން އިއްވަން ދެއްވި ފުރުޞަތުގައި ބަންޑާރަ ނައިބުގެ ވަކީލުންގެ ފަރާތުން ވަނީ ޖޫރިމަނާ ފައިސާގެ މައްސަލައިގައި މީރާގެ ފަރާތުން 3 ޖުލައި 2023 ގައި ރައީސް ޔާމީނަށް ނޯޓިސް ފޮނުވާފައިވާކަން ހާމަކުރައްވާފައެވެ. ނަމަވެސް ރައީސް ޔާމީންގެ ފަރާތްޕުޅުން އެކަން ވަނީ ދޮގުކުރައްވާފައެވެ. ރައީސް ޔާމީން ވިދާޅުވީ، އެކަމުގައި ނޯޓިހެއް ފޮނުވިކަން ނުވަތަ އެފަދަ ލިޔެކިޔުމެއްގައި ސޮއިކުރަން އެމަނިކުފާނަށްވެސް އަދި އެމަނިކުފާނުގެ ވަކީލުންގެ ޓީމަށްވެސް ލިބިވަޑައިގެންފައިނުވާކަމަށެވެ.

މި މައްސަލައިގެ އަޑުއެހުންތައް ނިންމާލެެއްވިކަމާއި، މި މައްސަލައިގައި އިތުރުކަމެއް ސާފުކުރަން ނެތްނަމަ، ދެން އޮންނާނީ ހުކުމް ކުރުންކަން އުއްތަމަ ފަނޑިޔާރު އަލްއުސްތާޛު އަޙްމަދު މުޢުތަޞިމް ޢަދުނާން ވަނީ އިޢުލާންކުރައްވާފައެވެ. މި މައްސަލަ ބައްލަވަނީ ސުޕްރީމް ކޯޓްގައި ހިމެނިވަޑައިގަންނަވާ 7 ފަނޑިޔާރުންގެ ބެންޗުންނެވެ.

އެމް.އެމް.ޕީ.އާރު.ސީގެ ބޮޑު ހިޔާނާތުގައި ވ. އާރަށް ކުއްޔަށް ދޫކުރުމުގައި ރިޝްވަތު ނެގުމާއި މަނީ ލޯންޑަރކުރުމުގެ ކުށް ސާބިތުވެ ރައީސް ޔާމީން ގެންދަވަނީ 11 އަހަރުގެ ޖަލު ހުކުމެއް ތަންފީޒުކުރައްވަމުންނެވެ.

ޤާނޫނު އަސާސީ ބުނާގޮތުން ރައީސުލްޖުމްހޫރިއްޔާއަށް ވުމުގެ ޝަރުތުތަކުގެ ތެރޭގައި ޖިނާއި ކުށެއް ސާބިތުވެގެން އެއް އަހަރަށްވުރެ ދިގު މުއްދަތެއްގެ ހުކުމެއް އޮތްނަމަ އެ ހުކުމެއް ތަންފީޒުކޮށް ނިމުމުނުތާ ނުވަތަ ކަނޑައެޅުނު އަދަބު މައާފު ކުރިތާ 3 އަހަރުވެފައިވާ މީހަކަށް ވާންޖެހެއެވެ.

އިންތިޚާބުތަކާއި ބެހޭ އާއްމު ޤާނޫނު ބުނާގޮތުން ކެންޑިޑެސީއާއި މެދު ސުވާލު އުފެއްދިއްޖެނަމަ އެ މައްސަލަ ހުށައެޅޭނީ ހަމައެކަނި ސުޕްރީމް ކޯޓަށެވެ. އަދި މިގޮތަށް ހުށައަޅާ މައްސަލައެއް އެ ކޯޓަށް ހުށައަޅާތާ ގިނަވަގެން 7 ދުވަހުގެ ތެރޭގައި ނިންމަވަންޖެހެއެވެ. އަދި މިފަދަ މައްސަލަތައް ނިންމަންވާނީ ސުޕްރީމް ކޯޓުގެ ހުރިހާ ފަނޑިޔާރުން ހިމެނޭ ބެންޗަކުންކަމަށާއި، ސުޕްރީމް ކޯޓުގެ އެ ނިންމެވުމަކީ އެންމެ ފަހުގެ ނިންމެވުންކަމަށްވެސް ޤާނޫނު އަސާސީގައި ވަނީ ބަޔާންކޮށްފައެވެ.