ރައީސް ޞާލިޙްގެ ކެންޑިޑަސީ ފޯމު އިލެކްޝަނަށް

އަންނަ ރިޔާސީ އިންތިޚާބުގައި ވާދަކުރައްވާ އެމްޑީޕީގެ ރިޔާސީ ކެނޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އެމަނިކުފާނުގެ ކެންޑިޑަސީ ފޯމު އިލެކްޝަންސް ކޮމިޝަނަށް ހުށައަޅުއްވައިފިއެވެ.

ރައީސް ޞާލިޙްގެ ރަނިންމޭޓްގެ ގޮތުގައި ކަނޑައަޅުއްވާފައިވަނީ ރައްޔިތުން މަޖިލީހުގެ މެޖޯރިޓީ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމްއެވެ.

ރައީސް އިބްރާހީމް މުޙައްމަދު ޞާލިޙްގެ ކެންޑިޑަސީ ފޯމު އިލެކްޝަންސް ކޮމިޝަނަށް ހުށައެޅުއްޗވުމަށް މިއަދު އިލެކްޝަންސް ކޮމިޝަނަށް ވަޑައިގަތީ އިންތިހާބީ އެޖެންޓް، މުހައްމަދު ނާޝިޒާއި، ކެމްޕޭން މެނޭޖަރު މުހައްމަދު ރަޝީދު ހުސެއިންއެވެ. ފޯމާއި ހަވާލުވެޑައިގަތީ އިލެކްޝަންސް ކޮމިޝަންގެ ރައީސް ފުއާދު ތައުފީގެވެ.

ރައީސްކަމަށް ވާދަކުރައްވާ ފަރާތްތަކުން ހުށައަޅުއްވާ ކެނޑިޑަސީ ފޯމާއި މެދު 48 ގަޑިއިރުގެ ތެރޭގައި އިލެކްޝަންސް ކޮމިޝަނުން ގޮތެއް ނިންމަވަންޖެހެއެވެ. އަދި އިސީ ނިންމަވާ ގޮތެއް ބަލައިނުގަންނަމަ އެކަމެއް ސުޕްރީމްކޯޓަށް ހުށައެޅުމުގެ ފުރުސަތުވެސް ޤާނުނުން ލިބިދީފައިވެއެވެ.

އަންނަމަހުގެ 9 ވަނަދުވަހު ބާއްވާ އިންތިޚާބުގައި އެކި ޕާޓީތަކުން ވާދަކުރާނެކަމުގެ އަޑުތައް ފެތުރިފައިވީ ނަމަވެސް މިހާތަނަށް ކޮމިޝަނަށް ފޯމު ހުށައެޅުއްވީ އެންމެ ބޮޑު ދެޕާޓީކަމަށްވާ އެމްޑީޕީއާއި ޕީޕީއެމުންނެވެ. މީގެއިތުރުން އެމްއެންފީގެ ރިޔާސީ ކެންޑިޑޭޓް ކާނަލް މުހައްމަދު ނާޒިމްވެސް މިއަދު ފޯމު ހުށައެޅުވުމަށް ނިންމަވާފައިވާކަން އެޕާޓީން ވަނީ ހާމަކުރައްވާފައެވެ.

ޕީޕީއެމުން ހުށައެޅި ކެންޑިޑޭޓް ރައީސް ޔާމީންގެ ކެންޑިޑަސީ ބަލައިނުގަތުމަށް އިލެކްޝަންސް ކޮމިޝަނުން ނިންމުމުން އެމަނިކުފާނު ސުޕްރީމްކޯޓަށް ހުށައެޅި މައްސަލައިގައި މިއަދު 10:00 ގައި ގޮތެއް ނިންމެވުމަށް އެކޯޓުން ވަނީ ތާވަލުކުރައްވާފައެވެ.

ރިޔާސީ އިންތިޚާބަށް ކުރިމަތިލާން ބޭނުންވާ ފަރާތްތަކުން ނަން ހުށައެޅުމަށް ހުޅުވާލާފައިވާ ފުރުސަތު މާދަމާއަށް ހަމަވާނެއެވެ. އަދި ނަން ހުށައެޅުއްވި ކެންޑިޑޭޓުންގެ ނަން ތަރީތީބުކުރުން އަންނަ ބުދަދުވަހު އޮންނާނެކަން އިލެކްޝަންސް ކޮމިޝަނުން ވަނީ ހާމަކުރައްވާފައެވެ.