މަރާމާތުކޮށްގެންވެސް މައްސަލަ ހައްލުނުވި ރަސްދޫ ބަނދަރުގެ އަމަލީ މަސައްކަތް ފަށަނީ

އއ. ރަސްދޫ ބަނދަރު ތަރައްޤީކުރުމުގެ މަޝްރޫޢުގެ ޢަމަލީ މަސައްކަތް ފެށުމަށްޓަކައި އެމްޓީސީސީން އެރަށުގައި ސައިޓް މޮބިލައިޒްކޮށްފިއެވެ. ރަސްދޫ މިހާރު ބޭނުންކުރާ ބަނދަރަކީ 2012ގައި ހަދާފައިވާ ބަނދަރެކެވެ. މިބަނދަރުގެ މައްސަލައަކީ އެކިފަހަރުމަތިން މަރާމާތުކޮށްގެންވެސް ހައްލުކުރެވިފައިނުވާ މައްސަލައެކެވެ.

ރަސްދޫ ބަނދަރާ ގުޅޭ ގޮތުން ޕީއެސްއެމް ނިއުސްއާއި ވާހަކަދައްކަވަމުން ރަސްދޫ ކައުންސިލްގެ ރައީސް މުހައްމަދު ނާހިދް ވިދާޅުވީ ރަސްދޫގެ ބަނދަރަކީ އެކި ފަހަރުމަތިން މަރަމާތުކޮށްފައިވާ ބަނދަރެކެވެ. ނަމަވެސް ބަނދަރު ހަދާފައިވާ ގޮތުން ރަށަށް ލަފާފުރުމުގައި ބޮޑެތި ދަތިތަކާ ކުރިމަތިވަމުން އަންނަ ކަމަށެވެ. އަދި ކަނޑު ގަދަ ދުވަސްވަރު އޮޑިދޯނި ފަހަރު އަޅާފައި ބޭއްވުމަކީވެސް ބޮޑެތި ތަކުލީފަކަށް ވެފައިވާކަމަށެއެވެ. ރަސްދޫއަކީ މަސްވެރި ރަށެއްކަން ފާހަގަކުރައްވާ އޭނާ ވިދާޅުވީ ރަސްދޫގައި މިހާރުވެސް 15 ކަންނެލި ދޯނި އޮންނަ ކަމަށެއެވެ. މީގެއިތުރަށް ޑިންގީ ތަކާއި ލޯންޗް ފަހަރުވެސް ރަސްދޫގައި ގިނަ އަދަދަކަށް އޮވެއެވެ. އެހެންކަމުން ޖާގައިގެ ގޮތުންވެސް ބޮޑެތި ގޮންޖެހުންތަކާއި ކުރިމަތިލާން ޖެހޭކަމަށްވެސް ކައުންސިލްގެ ރައީސް ވިދާޅުވިއެވެ.

" ބަނދަރު ހެދިފައި އޮތްގޮތުން މިމޫސުން ގޯސް ދުވަސްވަރު އޮޑި ދޯނި ފަހަރު އަޅާފައި ބޭނުން ވަނީ ވަރަށް އުނދަގޫވެފައި. ކޮންމެ މީހަކުވެސް ބޭނުންވާނެ ނޫންތޯ އޮޑި ދޯނި ފަހަރު މޫސުން ގޯސް ދުވަސްވަރު ރީތިކޮން އަޅާލާފައި ބާއްވަން" ނާހިދް ވިދާޅުވިއެވެ.

ރަސްދޫގެ ބަނދަރަށް ދިމާވެފައި އޮތް މައްސަލަ ހައްލުކޮށް ބަނދަރު ޒަމާނީ ފެންވަރަށް ތަރައްގީކުރުމުގެ މަސައްކަތް މިސަރުކާރުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމް.ޓީ.ސީ.ސީއާ ޙަވާލުކުރެއްވީ މި އަހަރުގެ ޖެނުއަރީ މަހުގެ 17 ވަނަ ދުވަހުއެވެ.

މި މަޝްރޫޢުގެ ދަށުން، 106,552 ކިއުބިކް މީޓަރުގެ ސަރަޙައްދެއްގައި ބިން ހިއްކުމާއި، 106 މީޓަރުގެ ސަރަޙައްދެއްގައި ބޭރުތޮށި ލުމާއި، 1,656 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 177 މީޓަރުގެ ސަރަޙައްދެއްގައި އެއްގަމު ތޮށި ލުމާއި، 244 މީޓަރުގެ ސަރަޙައްދެއްގައި ގްރޮއިން ޖެހުމާއި، 11 މީޓަރު ދިގު 11 މީޓަރު ފުޅާ ރޭމްޕެއް ހެދުމާއި، 43 މީޓަރު ދިގު 2 މީޓަރު ފުޅާ ކޮންކްރީޓް ޖެޓީއެއް ހެދުމަށް ވަނީ ހަމަޖެހިފައެވެ. މީގެ އިތުރައް 20 މީޓަރު ދިގު 2 މީޓަރު ފުޅާ ކޮންކްރީޓް ޖެޓީއެއް ހެދުމާއި، 795 އަކަ މީޓަރުގެ ސަރަޙައްދެއްގައި ހާބަރ ޕޭވްމަންޓް ހެދުމާއި، ނެރު ބައްތި އާއި ބަނދަރު ބައްތި ހަރުކުރުމާއި، އިންޓެގްރޭޓެޑް ނެޝަނަލް ޕަބްލިކް ފެރީ ނެޓްވޯކް އަށް އެކްސެސް ޕްލެޓްފޯމެއް ހެދުމުގެ މަސައްކަތެ ހިމެނެއެވެ.

1800އެއްހާ މީހުން ދިރިއުޅޭ އއ.ރަސްދޫއަކީ މަސްވެރިކަމާއި ލޯކަލް ޓޫރިޒަމް އޮންނަރަށެކެވެ. އެހެންކަމުން ދުވާލެއްގެ މައްޗަށް ރަށުގެ ބަނދަރުގެ ބޭނުން ހިފާ މީހުންވެސް މަދެއްނޫނެވެ.

ރަސްދޫގެ ބަނދަރު ޒަމާނީ ފެންވަރަށް ތަރައްގީ ކުރެވިގެން ދިއުމުން މިހާރު އޮތް ބަނދަރަށް ޖާގަ އިތުރުވެ ދޯނިތަކަށް އެއްވެސް ދަތިކަމެއް ނެތި ޖެޓީއާއި ގާތް ކުރެވި ރަށަށް އަރާފައިބާ ފަރާތްތަކަށް ލުއިފަސޭހަކަން ލިބިގެންދާނެއެވެ. އަދި ހުޅަނގު މޫސުމުގައިވެސް ރައްކާތެރިކަމާއެކު އޮޑި ދޯނި ފަހަރު އަޅާފައިވާ ބޭއްވޭނެ ކަމަށް އެރަށު ކައުންސިލުން ވިދާޅުވެއެވެ.

އއ.ރަސްދޫ ބަނދަރު ބޭރުތޮށި ޖެހުމާއި ގޮނޑުދޮށް ހިމާޔަތް ކުރުމުގެ މަސައްކަތަށް 86.8 މިލިޔަނަށް ރުފިޔާ ޚަރަދުވާނެ ކަމަށް ޕްލޭނިން މިނިސްޓްރީން ވިދާޅުވެއެވެ. މިމަސައްކަތް އެމްޓީސީސީއާއި ހަވާލުކުރައްވާފައިވަނީ 1 އަހަރުދުވަހުގެ ތެރޭގައި މަސައްކަތް ނިންމާގޮތަށެއެވެ.