ޔާމީންގެ ހުކުމް ފަސްކުރުމާއި މެދު އާދިއްތަ ދުވަހު ގޮތެއް ނިންމަނީ

ކުރީގެ ރައީސް އަބްދުﷲ ޔާމީންގެ މައްޗަށް ކްރިމިނަލްކޯޓުން އިއްވާފައިވާ ޖަލުހުކުމާއި ޖޫރިމަނާގެ ހުކުމް ތަންފީޒުކުރުން ފަސްކުރުމުގެ އަމުރާއި މެދު އަންނަ އާދިއްތަ ދުވަހު ގޮތެއް ނިންމަވާނެކަމަށް ހައިކޯޓުން ވިދާޅުވެއްޖެއެވެ.

ވ. އާރަށް ކުއްޔަށް ދިނުމުގައި ރިޝްވަތު ނެންގެވުމާއި މަނީލޯންޑަރިން ކުށް ސާބިތުވެ ރައީސް ޔާމީން 11 އަހަރަށް ޖަލަށް ލުމަށާއި 5 މިލިއަން ޑޮލަރުން ޖޫރިމަނާކުރުމަށް ދަށު ކޯޓުން ނިންމެވީ 2022 ވަނައަހަރުގެ ޑިސެމްބަރު މަހުގެ 25 ވަނަދުވަހުއެވެ.

ދަށުކޯޓްގެ ނިންމުން އިސްތިއުނާފްކުރުމަށް އެމަނިކުފާނުގެ ފަރާތުން ހައިކޯޓަށް ހުށައަޅުއްވާފައިވާ މައްސަލައިގެ އަޑުއެހުމެއް މިއަދު ވަނީ ބާއްވަވާފައެވެ. މި މައްސަލާގައި ރައީސް ޔާމީންގެ ފަރާތްޕުޅުންވަނީ ޖަލުހުކުމާއި ޖޫރިމަނާ ހުކުމް ތަންފީޒުކުރުން ފަސްކޮށްދިނުމުގެ އަމުރަކަށް އެދިވަޑައިގެންފައެވެ.

މި މައްސަލާގައި ވާހަކަ ދައްކަވަމުން ދައުލަތުގެ ވަކީލުން ވިދާޅުވީ ރާއްޖޭގެ ޤާނުނުތައް އޮތް ގޮތުން ހުކުމް ތަންފީޒުކުރުން ފަސްކުރުމުގެ އަމުރެއް ނެެރެދޭނެ ޖާގަ ނެތްކަމަށެވެ. އަދި ހުކުމް ތަންފީޒުކުރުން އެއީ ޤާނޫނު ދަންނަ އެއްޗެއް ނޫންކަންވެސް ދައުލަތުގެ ވަކީލުން ވިދާޅުވިއެެވެ. މި ވާހަކަތަކަށް ރައްދުދެއްވަމުން ޔާމީންގެ ވަކީލުން ވިދާޅުވަމުން ގެންދެވީ ކަފާލަތުގެ އިޖުރާއަތުތައް ޤާނޫނެއްގެ ބަޔާންކޮށްފައި ނެތުމަކީ އެ ހައްގު ނުދޭންވީ ސަބަބެއް ނޫންކަމަށެވެ.

މި މައްސަލައިގެ އަޑުއެހުން ނިންމަވާލައްވަމުން މި މައްސަލަ ބައްލަވާ ހައިކޯޓްގެ ފަނޑިޔާރުންގެ ބެންޗުން ވިދާޅުވީ އެކަމުގައި ނިންމަވާ ގޮތެއް އަންނަ އާދިއްތަދުވަހު ލިޔުމުން އަންގަވާނެކަމަށެވެ. މައްސަލަ ބައްލަވަމުން ގެންދަވަނީ 3 ފަނޑިޔާރުންގެ ބެންޗަކުންނެވެ.

މިއަދުގެ އަޑުއެހުމުގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ އެމަނިކުފާނުގެ ޖިސްމާނީ ނުކުޅެދުންތެރިކަމަށް ހުންނަކަމަށާއި އެކަމަށް ބޭނުންވާ ކަސްތަރު ކުރެއްވުމަށް މިވަގުތު ފުރުސަތު ލިބިވަޑައި ނުގަންނަވާކަމަށެވެ. އެގޮތުން އުނަގަނޑުގެ ފަރުވާއަށް ފަތަން ނުކުތުމަށް ޑޮކްޓަރުން ލަފާދެއްވާފައިވާކަމަށާއި އެހެންނަމަވެސް މާފުށި ހިއްކުމުގެ މަސައްކަތް ކުރާތީ މިހާރު އެފުރުސަތު ލިބިވަޑައިނުގަންނަވާކަން ވަނީ ފާހަގަކުރައްވާފައެވެ.

ރައީސް ޔާމީން ވިދާޅުވީ އެމަނިކުފާނު މިހާރުވެސް ހުންނެވީ ހޮސްޕިޓަލަށް ވަޑައިގެން އެޑްމިޓްވާން ޖެހޭ ފަދަ ސިއްހީ ހާލަތެއްގައި ކަމަށާއި އެހެންނަމަވެސް އެކަން އެގޮތަށް ކުރައްވަން ބޭނުންފުޅުވާކަމަށެވެ. ސަބަބެއްކަމަށް ވިދާޅުވީ އާއިލާއަށް ލިބިދާނެ އިތުރު ހިތްދަތިކަމަކަށްޓަކައި ކަމަށެވެ. އަދި އެމަނިކުފާނު ގޭ ބަންދުގައި ބެހެއްޓެވުމުން ދައުލަތަށް ލިބޭ ގެއްލުމަކީ ކޮބައިތޯ ތަކުރާރުކޮށް ވަނީ އައްސަވާފައެވެ.

ރައީސް ޔާމީން ތަންފީޒުކުރައްވަމުން ގެންދަވާ ޖަލު ހުކުމާއި ދައްކަވަންޖެހޭ ޖޫރިމަނާ ފައިސާގެ ހުކުމާއި ގުޅިގެން އެމަނިކުފާނަށް ވަނީ މިއަހަރުގެ ރިޔާސީ އިންތިޚާބުގައި ވާދަކުރުމުގެ ދޮރު ބަންދުވެފައެވެ. ހުކުމާއި ގުޅިގެން ދައްކަވަންޖެހޭ ޖޫރިމަނާ ފައިސާ ދައްކަވާފައި ނުވާތީ އެ ފައިސާ ހޯދުމަށް އެޓާނީ ޖެނެރަލްގެ އޮފީހުންވަނީ އެ މައްސަލަ ސިވިލްކޯޓަށް ހުށައަޅާފައެވެ.