ފެރިދޫ ބަނދަރުގެ މަސައްކަތް ފަށަށް ސާމާނު އެރަށަށް

އއ.ފެރިދޫ ބަނދަރު ތަރައްޤީކުރުމުގެ މަޝްރޫޢުގެ ޢަމަލީ މަސައްކަތް ފެށުމަށް އެކަމަށް ބޭނުންވާ ސާމާނު އެމްޓީސީސީން އެރަށަށް ގެންގޮސްފިއެވެ. ފެރިދޫގައި މިހާރު ބޭނުންކުރާ ބަނދަރަކީ 2000 ގެ ކުރީކޮޅިގައި ހަދާފައިވާ ބަނދަރެކެވެ. މަރާމާތުނުކުރެވި ގިނަ ދުވަސްވުމުގެ ސަބަބުން މި ބަނދަރު ވަނީ ވަރަށް ބޮޑަށް ހަލާކުވެފައެވެ.

800 މީހުންގެ އާބާދީއެއް އޮންނަ ފެރިދޫ ބަނދަރު އަޕްގްރޭޑްކުރުމުގެ މަސައްކަތް ސަރުކާރުން އެމްޓީސީސީ އާ ހަވާލުކޮށްފައިވަނީ މިއަހަރުގެ ޖެނުއަރީ މަހުގެ 16 ވަނަ ދުވަހުއެވެ. ފެރިދޫ ބަނދަރު އަޕްގްރޭޑްކުރަން އެމް.ޓީ.ސީ.ސީއާއ ހަވާލުކޮށްފައިވަނީ 1 އަހަރު ދުވަހުން ނިންމާގޮތަށް، 50 މިލިއަން ރުފިޔާއަށެވެ.

އއ. ފެރިދޫ ބަނދަރު އަަޕްގްރޭޑްކުރުމުގެ މަޝްރޫއުގެ މަސައްކަތުގައި 213 މީޓަރުގެ އެއްގަމު ތޮށި އަދި 147 މީޓަރުގެ ބޭތު ތޮށި ލުން ހިމެނެއެވެ. މީގެ އިތުރުން ބަނދަރު ބައްތިއާ މަގު ބައްތި އަދި ބަނދަރު ޕޭވްމަންޓް ހެދުމުގެ މަސައްކަތްވެސް ހިމެނެއެވެ.

ފެރިދޫ ރަށު ކައުންސިލްގެ ރައީސް އިސްމާއިލް ޝާހް ވިދާޅުވީ 2000 ގެ ކުރީކޮޅު ތަރައްގީކޮށްފައިވާ އެރަށުގެ ބަނދަރަކީ ރާއްޖޭގެ އެންމެ ކުދި ބަނދަރުތަކުން ބަނދަރެއްކަމަށެއެެވެ. އެހެންކަމުން ރަށުގައި އިތުރުވަމުން އަންނަ އާބާދީ އާއި ވިޔަފާރިތަކާއި ރަށުގައި ބޭނުންކުރާ ކަނޑު އުޅަނދުތައް އިތުރުވުމުގެ ސަބަބުން ރަށުގެ ބަނދަރު ކުޑަވުމުން ގިނަ ދަތިތަކާއި ކުރިމަތިލާން ޖެހިފައިވާކަމަށް ޝާހް ވިދާޅުވިއެވެ.

ރަށުގެ ބަނދަރަށް ޙައްލެއް ގެނައުމަށް ވޭތުވެދިޔަ ސަރުކާރުތަކުގައި މަސައްކަތްތަކެއް ކުރިނަމަވެސް ނަމަވެސް އެކަމަށް ދާއިމީ ހައްލެއް ލިބިފައި ނުވާކަން ޝާހު ފާހަގަކުރެއްވިއެވެ. އޭނާ ވިދާޅުވީ ބަނދަރުގެ މައްސަލަ ހައްލުވުމަކީ ރަށުގެ ރައްޔިތުން މިވަގުތައް ބޭނުންވާ އެންމެ މުހިންމު އެއް ކަންތައްކަމަށެވެ. މިހާރު އޮތް ބަނދަރަށް ވުރެ ޖާގަ ބޮޑު ތަނަވަސް ބަނދަރެއް ލިބުމަކީ ރައްޔިތުންގެ އުންމީދެއްކަމަށްވެސް ޝާހު ވިދާޅުވިއެވެ.

" މިހާރު ބޭނުން ކުރާ ބަނދަރަކީ 300 ފޫޓް ކުޑަ ބަނދަރެއް. މި ރަށަކީ ލޯކަލް ޓޫރިޒަމް އޮންނަ ރަށަކަށްވުމުން ބޮޑެތި މުދާ އުފުލާ ދޯނި ފަހަރުތައް އެބަ އާދޭ. މުދާ ހިފައިން ބޯޓް ނުވަތަ ދޯނި ފަހަރު އަންނައިރު މި ޖެހެނީ ބަނދަރުގައި އަޅާފައި އޮތް ދޯނިތައް ދުރުކޮށްގެން ޖާގަ ހަދަން. މިހެން ހަދަންވީމަ ވަރަށް ބޮޑު އުނދަގޫކަމަށް މި ވަނީ" ޝާހް ވިދާޅުވިއެވެ.

ފެރިދޫ ކައުންސިލްގެ ރައީސް ޝާހު ވިދާޅުވީ ބަނދަރު ޒަމާނީ ފެންވަރަށް ތަރައްގީވެގެން ދިޔުމާއެކު މިހާރު ހުރި މައްސަލަތައް ޙައްލުވެ، ޖާގައިގެ މައްސަލަ ކުރިމަތިނުވެ ގިނަ އަހަރުތަކަކަށް ރަށުގެ ބަނދަރު ބޭނުން ކުރެވޭނެކަމަށެވެ. އަދި މިހާރު އޮތް ބަނދަރު ސަރަޙައްދާއެކު 800 ފޫޓުގެ ބޮޑު، ޒަމާނީ ބަނދަރެއްގެ ގޮތުގައި ރަށުގެ ބަނދަރު ތަރައްޤީކުރާނެކަމަށެވެ.