އިހަވަންދޫ މަސްކިރާ ބަނދަރު ތަރައްޤީ ކުރުމަށް ހަވާލުކޮށްފި

ހއ. އިހަވަންދޫ މަސްކިރާ ބަނދަރު ތަރައްޤީ ކުރުމުގެ މަޝްރޫޢު ސަރުކާރުން އެމްޓީސީސީއާއި ހަވާލުކޮށްފިއެވެ.

3500 މީހުންގެ އާބާދީއެއް އޮންނަ ހއ. އިހަވަންދޫ ރައްޔިތުން އާމްދަނީ ހޯދުމަށް އެންމެ ބޮޑަށް ބަރޯސާވާ ދެ ސިނާއަތަކީ މަސްވެރިކަމާއި އޮޑިފަހަރު ބަނދެ އެހެލުމެވެ. އެގޮތުން އެ ރަށުގައި މިހާރުވެސް މަހަށްދާ15 ދޯންޏާއ،ި އޮޑިފަހަރު އެހެލާ ބަނުމަށް ހަދާފައިވާ 27 ހަރުގެ ހުރެއެވެ.


އިހަވަންދޫ މަސްގަންނަ ފެސިލިޓީ ބަނދަރު ތަރައްޤީކުރުމުގެ މަޝްރޫޢުއައް މިނިސްޓްރީ އޮފް ނޭޝަނަލް ޕްލޭނިންގް، ހައުސިންގ އެންޑް އިންފްރާސްޓްރަކްޗަރ އިން އެމްޓީސީސީއާއި ހަވާލުކުރީ 500 ދުވަހުގެ ތެރޭގައި ނިންމާގޮތަށް 60.2 މިލިއަން ރުފިޔާއެވެ.

މަސްކިރާ ބަނދަރު މަޝްރޫޢުގެ މަސައްކަތް ނިމުމާއެކ،ު އެ ރަށުގެ މަސްވެރިންނަށް ވަރަށްބޮޑު ލުއިފަސޭހައެއް ލިބިގެންދާނެއެވެ. ޚާއްޞަކޮށް މަސްކިރަން މާލެ ނުވަތަ ފެލިވަރަށް ދާންޖެހޭ ޖެހުން ނިމުމަކަށް އަންނާނެއެވެ. އަދި އެ ދަތުރުގެ ޚަރަދުވެސްކުޑަވެގެންދާނެކަން އެރަށު ކައުންސިލުން ފާހަގަކުރައްވައެވެ. މިއީ ޒުވާނުން ގިނަ ޢަދަދަކަށް ގުޅެމުން އަންނަ އެރަށުގެ މަސްވެރިކަމުގެ ސިނާޢަތަށް ކުރިއެރުންތަކެއް ލިބިގެންދާނޭ މަޝްރޫޢެއްގެ ގޮތުގައި އެރަށު ކައުންސިލުން ފާހަގަކުރައްވައެވެ.

މި މަޝްރޫޢުގެތެރެއިން 24 މީޓަރުގެ ރިވެޓްމަންޓް ޖަހައި 129 މީޓަރުގެ ޝީޓް ޕައިލް ކީވޯލް ޖަހާނެއެވެ އަދި 6މީޓަރުގެ އެލް ބްލޮކް ކީވޯލް ޖެހުމަށްވެސް ވަނީ ނިންމާފައެވެ. މީގެ އިތުރުން އެއްގަމުތޮށި ވަށައިގެން ޕޭވްމަންޓް ހެދުމާއި، ޕޭވްމަންޓްގައި ފެން ހިންދުމަށް ކާނު ހެދުމަށްވެސް މަޝްރޫޢުގައި ހިމެނެއެވެ.

ސަރުކާރުން ވަނީ އިހަވަންދޫގައިގެ ލަފާފުރުމުގެ ދަތިކަން ހައްލުކުރުމަށް 2022 ވަނަ އަހަރު އެރަށު ބަނދަރު ތަރައްޤީކޮށްފައެވެ. އިހަވަންދޫ ބަނދަރު ތަރައްޤީ ކުރުމުގެ މަޝްރޫޢުއަކީ 62.2 މިލިއަން ރުފިޔާއަށް ސަރުކާރުން އެމްޓީސީސީއާއި ހަވާލުކޮށްގެން ކޮށްފައިވާ މަސައްކަތެކެވެ.