ދިހަ އަހަރަށް ފަހު އދ. މާމިގިލިން ގޯތިދޫކުރަން ނިންމަވައިފިއެވެ. މާލެއާއި ގާތްގަނޑަކަށް 174 މޭލު ދުރުގައި އޮންނަ އދ. އަތޮޅު މާމިގިލީގެ ބޮޑުމިނަކީ 182.5 ހެކްޓަރެވެ. އެކި އެކި ސިނާޢީ މަސައްކަތްކުރުމަށާއި އެކި އެކި ބޭނުންތަކަށް މިރަށުން މިހާރުވެސް ބިން ދޫކުރައްވާފައިވާއިރު، ރަށުގެ ރައްޔިތުން ތިބީ އެރަށުން ގޯތި ދޫކުރާނެ ދުވަހެއްގެ އިންތިޒާރުގައެވެ. މާމިގިއްޔަކީ އާބާދީގައި 4،000 އެއްހާ މީހުން ދިރިއުޅޭ ރަށެކެވެ.
އެ ރަށު ކައުންސިލްގެ ރައިސް ޖުނައިދް އިބްރާހީިމް ވިދާޅުވީ އެރަށުން ގޯތި ބޭނުންވެގެން ވަރަށްގިނަ ބަޔަކު އެދެމުންދިއުމާއި ގުޅިގެން މިހާރު އެރަށުން ގޯތި ދޫކުރެއްވުމަށް ނިންމަވާފައިވާކަަމަށާއި މިފަހަރު ދޫކުރައްވަނީ 150 ގޯތިކަމަށެވެ. މިހާރު ގޯއްޗަށް އެދޭ ފޯމު ދޫކުރައްވަމުން ގެންދަވާއިރު ފޯމު ހުށަހެޅުމަށް ވަނީ 1 މަސްދުވަހުގެ މުއްދަތެއް ދެއްވާފައެވެ. އަދި ފޯމު ދޫކުރައްވަން ފެށިތާ 3 ދުވަސްވީއިރު 200 އަށްވުރެ ގިނަ ފޯމް މިހާތަނަށް ހުށަހަޅާފައިވާކަމަށް ކައުންސިލްގެ ރައީިސް ވިދާޅުވިއެވެ.
މާމިގިލީގައި މީހުން ދިރިއުޅޭ 371 ގެ ހުންނައިރު އެރަށުގެ މީހުން އާންމު ގޮތެއްގައި ކުރާ މަސައްކަތަކީ ސަރުކާރާއި އަމިއްލަ މީހުންގެ ވަޒީފާގެ އިތުރުން، މަސްވެރިކަމާއި، ދަނޑުވެރިކަން، އަދި ކޮންސްޓްރަކްޝަންެ މަސައްކަތްތަކާއި ވިޔަފާރިކުރުމެވެ. އެރަށުގައި ޖުމްލަ 3 ގެސްޓްހައުސް، 5 ސްވެނިއަރ ފިހާރައިގެ އިތުރުން 57 ފިހާރަ ހުރެއެވެ.