އައްޑޫ ސިޓީން ގޯތިލިބުނު އެންމެންނަށް އަންނަ ޖޫންމަހުގެ ނިޔަލަށް ގޯތި ހަވާލުކޮށް ނިންމަނީ

އައްޑޫ ސިޓީން ގޯއްޗަށް އެދި ހުށަހެޅި މީހުންގެ ތެރެއިން ޝަރުޠު ފުރިހަމަވާ މީހުންގެ ދާއިމީ ލިސްޓު އައްޑޫ ސިޓީ ކައުންސިލުން އާއްމުކޮށްފިއެވެ.

ބޯހިޔާވަހިކަމުގެ ޕްރޮގްރާމުގެ ދަށުން އައްޑޫސިޓީ ހިތަދޫ، ފޭދޫ، މީދޫ އަދި ހުޅުދޫ އަވަށުން ޖުމްލަ 1000 ގޯތި ދޫކުރުމަށް އައްޑޫ ސިޓީ ކައުންސިލުން ވަނީ ނިންމާފައެވެ. އައްޑޫ ސިޓީން ގޯއްޗަށް އެދި 4،160 ފޯމު ހުށަހެޅި އިރު، އޭގެ ތެރެއިން 4052 މީހެއްގެ ޝަރުތު ހަމަވެއެވެ.

އައްޑޫ ސިޓީ ކައުންސިލުން ބުނީ ގޯތި ލިބޭ މީހުންގެ ދާއިމީ ލިސްޓުގައި ހިމެނޭ މީހުންނަށް ގޯތި ދޫކުރުމަށް ހަމަޖެހިފައިވަނީ ދެމަރުހަލާއަކަށް ބަހާލައިގެންކަމަށެވެ. އެގޮތުން ފުރަތަމަ މަރުޙަލާގައި ގޯތިދޫކުރުމަށް ހަމަޖެހިފައިވަނީ އައްޑޫގެ 4 އަވަށުންނެވެ. އެއީ ހިތަދޫން 500 ގޯތި، ފޭދޫން 300 ގޯތިި ހުޅުދޫން 100 ގޯތި އަދި މީދޫން 100 ގޯއްޗެވެ.

ސިޓީ ކައުންސިލުން ހާމަކުރިގޮތުގައި ލިސްޓުގައި ހިމެނޭ އެހެންފަރާތްތަކަށް ދެވަނަ މަރުޙަލާގައި ދޫކުރުމަށް ހަމަޖެހިފައިވާ ގޯތި ދޫކުރެވޭނީ އަވަށްތަކަށް އިތުރުކުރި ބިންތަކުގެ ލޭންޑްޔޫޒް ޕްލޭން ހަދައި ސާވޭގެ މަސައްކަތް ފުރިހަމަ ކުރުމަށްފަހުގައެވެ. އަދި ކައުންސިލްގެ އަމާޒަކީ މިހާރު ޢާންމުކޮށްފައިވާ ލިސްޓުގައި ހިމެނޭ ހުރިހާ ފަރާތްތަކަށް 2024 ޖޫންމަހުގެ ނިޔަލަށް ގޯތިދޫކޮށް ނިންމުމެވެ.

ސިޓީ ކައުންސިލުން ބުނީ ފުރަތަމަ މަރުޙަލާގައި ދޫކުރުމަށް ހަމަޖެހިފައިވާ 1000ގޯތި ދޫކުރުމަށްޓަކައި ފުރިހަމަކުރަންޖެހޭ އިދާރީ މަސައްކަތްތައް އަންނަ ނޮވެމްބަރު މަހުގެ ނިޔަލަށް ފުރިހަމަކޮށް ޑިސެމްބަރުމަސް ނިމުމުގެކުރިން ގޯތިތައް ލިބެންޖެހޭ ފަރާތްތަކަށް ހަވާލުކޮށް ނިންމާނެ ކަމަށެވެ.

މުޅި އައްޑޫ ސިޓީއަށް ބަލާއިރު ހިތަދޫން އެންމެ ފަހުން ގޯތި ދޫކޮށްފައިވަނީ މީގެ 21 އަހަރު ކުރިން 2002ވަނަ އަހަރުއެވެ. އަދި، ހުޅުދޫއާއި މީދޫންވެސް ގޯތިދޫނުކުރާތާ 15 އަހަރުވެފައިވާއިރު، ފޭދޫން ގޯތި ދޫނުކުރާތާ 25 އަހަރު ވަނީ ވެފައެވެ.