ނައިޓް މާކެޓު ބޭއްވުމުގެ ހުއްދަ ދޫކުރުން އިކޮނޮމިކް މިނިސްޓްރީގެ ދަށަށް
-
މީގެކުރިން ހުއްދަ ދޫކުރަމުން އައިސްފައިވަނީ ކައުންސިލްތަކުން
-
އައު އުސޫލު ވަނީ ގެޒެޓުކޮށްފަ
-
އައު އިސްލާހުގައި ޖުމްލަ 6 ކަމެއް ހިމެނޭ
ނައިޓް މާކެޓްތައް ބޭއްވުމުގެ ހުއްދަ ދޫކުރުން އިކޮނޮމިކް މިނިސްޓްރީގެ ދަށަށް ބަދަލުކޮށްފިއެވެ. ނައިޓް މާކެޓްތައް ބޭއްވުމުގެ ހުއްދަ މިހާތަނަށް ދޫކުރަމުން އައިސްފައިވަނީ ސިޓީ ކައުންސިލްތަކާއި ރަށު ކައުންސިލްތަކުންނެވެ.
ނައިޓް މާކެޓްތައް ބޭއްވުމުގެ ހުއްދަ ދޫކުރުން އިކޮނޮމިކް މިނިސްޓްރީގެ ދަށަށް ބަދަލްކޮށްފައިވަނީ މިދިޔަ އަންގާރަދުވަހު ގެޒެޓްކޮށްފައިވާ، ފެއަރ، ނައިޓްމާކެޓް ނުވަތަ މަގުމަތީ ބާޒާރު ހިންގުމުގެ ހުއްދަ ދޫކުރުމުގައި އަމަލު ކުރާނެ އުސޫލަށް ގެނައި އިސްލާޙުގެ ދަށުންނެޗެ. މި އިސްލާހުގައި ޖުމްލަ 6 ކަމެއް ހިމަނާފައިވެއެވެ.
އެގޮތުން ހުއްދަ ދޫކުރުން މިނިސްޓްރީގެ ދަށަށް ބަދަލްކުރުމުގެ އިތުރަށް ހުއްދައަށް އެދި ހުށަހަޅަން ޚާއްސަ އޮންލައިން ފޯމެއް ތައާރަފްކުރުން ހިމެނެއެވެ.
ހުއްދައަށް އެދި ހުށަހަޅާތާ ފަސް ދުވަހުގެ ތެރޭގައި މިނިސްޓްރީން ނިންމި ގޮތް ހުއްދައަށް އެދި ހުށަހަޅާ މީހާއަށް އަންގަން ޖެހޭނެ ކަމަށާއި، މާކެޓް ބާއްވާއިރު ރާއްޖެއަށް އެތެރެ ކުރާ މުދަލުގެ ވިޔަފާރި ކުރެވޭ ގޮތަށް ބާއްވާނަމަ ބޭއްވޭނީ މުނާސަބަތަކާ ގުޅުވައިގެން ކަމަށް މިނިސްޓްރީގެ އުސޫލުގައިވެއެވެ.
މާކެޓް ބާއްވާ އުސޫލުގައިވާ ކަންތައްތައް ފުރިހަމަކޮށްފައި ނުވާނަމަ، ނުވަތަ އުސޫލާ ޚިލާފުވެއްޖެ ނަމަ ހުއްދަ ދޫނުކުރުމާއި ދޫކޮށްފައިވާ ހުއްދަ ބާތިލު ކުރުމުގެ އިހުތިޔާރު މިނިސްޓްރީއަށް ލިބިގެންވާ ކަމަށް ވެސް އެ އުސޫލުގައިވެ އެވެ.