ކުޅުދުއްފުށި ސިޓީގެ ބައެއް މަގުތަކުގައި ހަތަރު ފުރޮޅުލީ އުޅަނދު ޕާކްކުރުން މަނާ

ކުޅުދުއްފުށި ސިޓީގެ ބައެއް މަގުތަކުގައި ހަތަރު ފުރޮޅުލީ އުޅަނދު ޕާކްކުރުން މަނާކޮށްފިއެވެ.

ކުޅުދުއްފުށި ސިޓީ ކައުންސިލުން ވިދާޅުވީ، އެރަށުގައި އާރް.ޓީ.އެލް ބަހުގެ ޙިދުމަތް ފަށާފައިވާއިރު، އެ ދަތުރުތައް ކުރުމަށް ހަމަޖެހިފައިވާ މަގުތަކުގެ ތެރެއިން 7 މަގެއްގައި ހަތަރު ފުރޮޅުލީ އުޅަނދު ޕާކްކުރުން މަނާކޮށްފައިވާ ކަމަށެވެ.

ހަަތަރު ފުރޮޅުލީ އުޅަނދު ޕާކްކުރުން މަނާކޮށްފައިވަނީ އޯކިޑްމަހު، ސަހަރާމަގު، މާލިމި ހިނގުން، ފުނަވަލުމަގު، ސަރުދާރުމަގު، ނިޔަދުރުގޯޅި އަދި ބޮޑުރުއްދޮށުގޯޅީގައެވެ.

މިމަގުތަކުގެ އިތުރުން ބަސް ދަތުރުކުރާ މަގުތަކުގައިވެސް، ބަސް ދުއްވުމަށް ދަތިވާގޮތަށް ވެހިކަލް ޕާކުކުރުމަކީ މަނާކަމެއްކަމެއް ކަމަށް ސިޓީ ކައުންސިލުން ހާމަކުރެއެވެ. އަދި އެންގުމާއި ޚިލާފަށް މަގުގައި ޕާކުކޮށްފައިވާ އުޅަނދުތައް މޯލްޑިވްސް ޕޮލިސް ސަރވިސްއިން ޓޯކުރަމުން ގެންދާނެކަމަށްވެސް ކުޅުދުއްފުށި ސިޓީ ކައުންސިލުން ވިދާޅުވެއެވެ.

ކުޅުދުއްފުށި ސިޓީގައި އާރް.ޓީ.އެލް ބަހުގެ ޚިދުމަތް ފަށާފައިވަނީ މިދިޔަމަހުގެ ތެރޭގައެވެ. ކުޅުދުއްފުށި ބަހުގެ ޚިދުމަތް ދިނުމަށްޓަކާ 2 ބަސް ބޭނުންކުރެއެވެ. އެއީ މާލޭ ސިޓީގައިވެސް ބޭނުންކުރާފަދަ 22 މީހުންގެ ޖާގައިގެ 2 މިނީ ބަހެވެ.