އިޖުތިމާޢީ ދާއިރާގެ އިތުރުން މެނިފެސްޓޯ ތަންފީޒްކުރުން ބެލެހެއްޓުންވެސް ނާއިބަށް

އިޖުތިމާއީ ދާއިރާއާއި ގުޅޭ މަސައްކަތްތަކުގެ އިތުރުން، ޑރ. މުޙައްމަދު މުޢިއްޒުގެ މެނިފެސްޓޯގައި ހިމެނޭ ކަންކަން ތަންފީޒްކުރެވޭ ގޮތް ބެލެހެއްޓެވުމުގެ ޒިންމާއާއިވެސް ހަވާލުވެވަޑައިގަތުމަށް ނިންމާފައިވާކަމަށް އިންތިޚާބީ ރައީސުލްޖުމްހޫރިއްޔާގެ ނާއިބު ޙުސައިން މުޙައްމަދު ލަޠީފް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ރިޔާސީ އިންތިޚަބަށްފަހު މީޑިއާއަކަށް ދެއްވި ފުރަތަމަ އިންޓަރވިއު ޕީއެސްއެމަށް ދެއްވަމުންނެވެ.

ނަޞްރުގެ ދުވަހާއި، އައު ސަރުކާރުގެ ސިޔާސަތުތަކާއި ގުޅޭގޮތުން ޕީއެސްއެމުން ގެނެސްދިން "ދިވެހީންގެރާއްޖެ" ޕްރޮގްރާމްގައި ވާހަކަފުޅު ދައްކަވަމުން އިންތިޚާބީ ނާއިބު ރައީސް ޙުސައިން މުޙައްމަދު ލަޠީފްގެ ވާހަކަފުޅު ފެށްޓެވީވެސް ނަޞްރުގެ ދުވަހާ ގުޅޭގޮތުންނެވެ. އެގޮތުން ނޮވެމްބަރު 3ގެ ޢުދުވާނީ ހަމަލާތަކުން ރާއްޖެއަށް ނަޞްރު ހޯދައިދިނުމަށްޓަކައި ސިފައިންނާއި ޝަހީދުވި އެހެން ބޭފުޅުން ކުރެއްވި ޤުރުބާނީ އެމަނިކުފާނު ފާހަގަކުރެއްވިއެވެ. މިމޭރުމުން ވާހަކަފުޅު ދައްކަވަމުން އިންތިޚާބީ ނައިބްރައީސް ވިދާޅުވީ ޤައުމަށް ދިމާވާ އެފަދަ ކޮންމެ ދަނޑިވަޅަކަށް ދިވެހި ސިފައިން ތައްޔާރުކުރުމަށްޓަކައި ސިފައިންނަށް ޒަމާނީ ތަޢުލީމާއި، ތަމްރީންގެ އިތުންނަށް ޒަމާނީ އެހެނިހެން ވަޞީލަތްތައްވެސް ފުދުންތެރިކަން ހުރި މިންވަރަކުން ފޯރުކޮށްދެންޖެހޭކަމަށެވެ.

"ކަނޑުމައްޗާއި އެއްގަމުގައި ދިމާވާ މިފަދަ ހާދިސާތަކަށް ބެލި ނަމަވެސް ދިވެހި އަސްކަރިއްޔާގައި ތިއްބެވި ބޭފުޅުން އަޅުގަނޑުމެންގެ ސަލާމަތާއި ރައްކާތެރިކަމަށް އެންމެ ފުރަތަމަވެސް އެޓެންޑްވަނީ. އެ ބޭފުޅުންނަށް ލިބެންޖެހޭ ޒަމާނީ ތަމްރީން ފޯރުކޮށްދޭން އެބަޖެހޭ. ފުރިހަމައަށް ތައްޔާރުވެފައިތިބި ބަޔަކަށް ވާން އެބަޖެހޭ." އިންތިޚާބީ ނައިބު ރައީސް ޙުސައިން މުޙައްމަދު ލަޠީފް ވިދާޅުވިއެވެ.

މި ޕްރޮގްރާމްގައި އެމަނިކުފާނު ވަނީ ނާއިބު ރައީސް މަސްޢޫލިއްޔަތުތަކާއި ގުޅޭގޮތުންވެސް ވާހަކަފުޅު ދައްކަވާފައެވެ. ރާއްޖޭގައި މިހާތަނަށް ނާއިބު ރައީސްކަން ކުރެއްވި ބޭބޭފުޅުންނާއި ބޮޑަށް ހަވާލުވެވަޑައިގެން މަސައްކަތްކުރައްވާފައިވަނީ އިޖުތިމާޢީ ދާއިރާގެ މަސައްކަތްތަކެވެ. އެހެންކަމުން އައު ސަރުކާރުގައިވެސް މަސައްކަތްކުރައްވާނީ އިޖުތިމާޢީ ދާއިރާގެ މަސައްކަތްތޯ ދެންނެވުމުން، އިންތިޚާބީ ނާއިބު ރައީސް ވިދާޅުވީ ކަންކަމާއި ހަވާލުވެވަޑައިގަތުމުގައި އިންތިޚާބީ ރައީސް ޑރ.މުޙައްމަދު މުއިއްޒާއި ފުރިހަމައަށް މަޝްވަރާކުރައްވާކަމަށެވެ. އެގޮތުން ޤައުމީ މަސައްކަތާއި އިޖްތިމާޢީ ދާއިރާގެ މަސައްކަތްތައްވެސް ކުރެއްވުމުގެ އިތުރުން މެނިފެސްޓް ތަންފީޒްކުރެވޭ ގޮތް ބެލެހެއްޓުމުގެ ޒިންމާއެއް ހަވާލުކުރއްވާނެކަމަށް އިންތިޚާބީ ރައީސް ވިދާޅުވެފައިވާކަން އިންތިޚާބީ ނާއިބު ރައީސް ފާހަގަކުރެއްވިއެވެ.

"ކުރިއަށް އޮތް ދުވަސްތަކުގައިވެސް މަޝްވަރާކުރައްވައިގެން ކަންކަން ހަވާލުކުރުމުގެ ޔަޤީންކަން ޑރ. މުއިއްޒު ދެއްވި. އިންތީޚާބީ ރައީސް ފުރިހަމަ ގޮތުގައި ވަރަށް ގިނަ ކަންކަން މަޝްވަރާކުރައްވާ. ސިޔާސީ ދާއިރާގައި އަޅުގަނޑު އަދި ޅަ. އެހެންކަމުން ކުރިއަށްދިއުމަށް އަދިވެސް ތަޖުރިބާ ބޭނުންވާނެ. ސިޔާސީ ގޮތުން މަސައްކަތްތަކެއް ކުރާނަން. ޕާޓީ ކުރިއެރުވުމާށާއި، ޕާޓީގައި ތިއްބެވި މެންބަރުންނާއެކުވެސް ސިޔާސީ މަސައްކަތްތައް ކުރާނަން." އިންތިޚާބީ ނައިބު ރައީސް ހުސައިން މުޙައްމަދު ލަޠީފް ވިދާޅުވިއެވެ.

އިންތިޚާބީ ނައިބު ރައީސް ވިދާޅުވީ އެ މަޤާމަށް އެމަނިކުފާނު އިންތިޚާބު ނުވިނަމަ ވިސްނަވައިގެން ހުންނެވީ ކުޅިވަރުގެ ދާއިރާއާއި ޒުވާނުންނާ ގުޅުން ހުރި ދާއިރާތަކުގައި ޕާޓީގެ ތެރެއިން މަސައްކަތް ކުރެއްވުމަށްކަމަށެވެ. މިޕްރޮގްރާމަގައި ވަނީ އެމަނިކުފާނުގެ ދިރިއުޅުއްވުމާއި ގުޅޭ ގިނަ މަޢުލޫމާތުތަކެއް ހިއްސާކުރައްވާފައެވެ. ޚާއްސަގޮތެއްގައި ސިޔާސީ މައިދާނަށް ނުކުމެވަޑައިގެންނެވިގޮތާއި ރަނިންމޭޓްގެ ޓިކެޓް ލިބިވަޑައިގެންނެވިގޮތް އެމަނިކުފާނު ތަފްސީލްކޮށްދެއްވިއެވެ.