އެމެރިކާއާއި އިނގިރޭސިވިލާތުގެ އަސްކަރިއްޔާއިން ގުޅިގެން ޔަމަނަށް އަނެއްކާވެސް ވަރުގަދަ ޙަމަލާތަކެއް ދީފިއެވެ. އެމެރިކާގެ ދިފާޢީ އިދާރާ, ޕެންޓެގަނުން ބުނީ ޔަމަނުގައި ހަރަކާތްތެރިވާ ޙޫޘީންގެ 13 އަމާޒަކަށް ޙަމަލާތައް ދީފައިވާނެ ކަމުގައެވެ. މިއީ, އުރުދުންގައި ތިބި އެމެރިކާ ސިފައިންނަށް ޙަމަލާދީ ތިން މީހުން މަރައިލި ފަހުން އެމެރިކާއިން ޔަމަނަށް ބޮން އަޅާ ފުރަތަމަ ފަހަރެވެ. އެ ޙަމަލާގެ ފަހަތުގައި އޮތީ ޢިރާޤުގެ ކަތާއިބު ޙިޒްބުالله ޖަމާޢަތް ކަމުގައި އެމެރިކާއިން ބުނެއެވެ.
ޕެންޓެގަނުން ބުނީ ޔަމަނަށް ދީފައިވާ ޙަމަލާތައް އަމާޒުކޮށްފައި ވަނީ ޙޫޘީންގެ ހަތިޔާރު ގުދަންތަކާއި, މިސައިލް ނިޒާމުތަކާއި, ލޯންޗަރުތަކުގެ އިތުރުން އަސްކަރީ އަމާޒުތަކަށް ކަމުގައެވެ. އަދި, ހޫޘީންގެ 13 އަމާޒަކަށް 36 ޙަމަލާއެއް ދީފައިވާ ކަމުގައެވެ. ޔަމަނުގެ އިތުރުން އެމެރިކާއިން ދަނީ ޢިރާޤާއި ސޫރިޔާއަށް ވެސް ބޮން އަޅަމުންނެވެ. އެމެރިކާގެ މި ޙަމަލާތަކާ އެކު މެދުއިރުމަތީގެ މަސްރަޙު ހޫނުވެ, ހަނގުރާމައެއް ފެށުމުގެ ބިރުވެރިކަން އުފެދިފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ.
"މި ޙަމަލާތަކާ އެކު އަޅުގަނޑުމެން ވާނީ ޙޫޘީންނަށް ސާފު މެސެޖެއް ދީފައި. އެއީ, ބައިނަލްއަޤުވާމީ ކަނޑުދަތުރުފަތުރާއި އަސްކަރީ މަނަވަރުތަކަށް އެ ޖަމާޢަތުން ޙަމަލާދޭ ނަމަ, އޭގެ ނަތީޖާާ ހިތިވާނެ ކަން," އެމެރިކާގެ ދިފާޢީ ވަޒީރު ލޮއިޑް އޮސްޓިން ވިދާޅުވިއެވެ.
އޭނާ އިޝާރާތް ކުރައްވާފައި އެ ވަނީ ރަތް ކަނޑު ހުރަސްކޮށް ދަތުރުކުރާ އުޅަނދުފަހަރަށް ޙޫޘީން ދެމުންދާ ޙަމަލާތަކަށެވެ. މިއީ, ޔަހޫދީންނާ ދެކޮޅަށް އެ ޖަމާޢަތުން ފަށާފައިވާ އަސްކަރީ ކެމްޕޭނެއްގެ ދަށުން ދެމުންދާ ޙަމަލާތަކެކެވެ. އަދި, ޙަމަލާތައް އަމާޒު ކުރަމުން ދަނީ ޔަހޫދީންނާ ގުޅުން އޮތް އުޅަނދުފަހަރަށެވެ. އަދި, ޒަޔަނިސްޓު އިސްރާއީލަށް މުދާ ގެންދާ އުޅަނދުފަހަރަށެވެ.
މީގެ އިތުރުން, އެމެރިކާއާއި އިނގިރޭސިވިލާތާ ގުޅުން އޮތް އުޅަނދުފަހަރާއި, އަސްކަރީ މަނަވަރުތަކަށް ވެސް ޙޫޘީން ދަނީ ޙަމަލާތައް އަމާޒު ކުރަމުންނެވެ. ޙޫޘީންގެ އަސްކަރީ ކެމްޕޭނުގެ އަމާޒަކީ ޔަހޫދީންނަށް ގެއްލުން ދިނުމެވެ. އަދި, ފަލަސްޠީނުގެ ޣައްޒާގައި ދިރިއުޅޭ 2.3 މިލިޔަން މީހުންނާ ދެކޮޅަށް ޔަހޫދީން ހިންގަމުންދާ ލާއިންސާނީ ޢުދުވާންތައް ހުއްޓުމަކަށް ގެނައުމަށް ބާރު އެޅުމެވެ. ޙޫޘީންނާ ދެކޮޅަށް ކަމަށް ބުނެ އެމެރިކާއިން ޔަމަނަށް ބޮން އަޅަން ފަށާފައި ވަނީ ޔަހޫދީން ހިމާޔަތް ކުރުމުގެ ބޭނުމުގައެވެ.
ޢިރާޤާއި ސޫރިޔާއަށް އެމެރިކާއިން ދީފައިވާ ވައިގެ ޙަމަލާތައް އަމާޒު ކޮށްފައި ވަނީ އީރާނުގެ އިސްލާމީ އިންޤިލާބީ ލަޝްކަރުގެ (އައި.އާރް.ޖީ.ސީ)ގެ ސިފައިންގެ މަރުކަޒުތަކާއި, އެ ލަޝްކަރާ ގުޅުން އޮތް ހަތިޔާރު އެޅި ޖަމާޢަތްތަކުގެ އަމާޒުތަކަށް ކަމުގައި އެމެރިކާއިން ބުނެއެވެ. މި ޙަމަލާތަކުގައި 40 މީހުން ޝަހީދު ކޮށްލާފައިވާ ކަމަށް އެމެރިކާއިން ބުނެއެވެ.
ނަމަވެސް, ޢިރާޤާއި ސޫރިޔާގެ ސަރުކާރުން ވަނީ އެމެރިކާގެ ޙަމަލާތައް ކުށްވެރިކޮށް, ޝަހީދު ކޮށްލާފައިވާ މީހުންގެ ތެރޭގައި ގިނަ ޢަދަދެއްގެ ޢާންމުން ހިމެނޭ ކަން ހާމަކޮށްފައެވެ. އަދި, އެމެރިކާއިން ޢިރާޤާއި ސޫރިޔާގެ ސިޔާދަތަށް އަރައިގަނެފައިވާ ކަމުގައި ވެސް އެ ދެ ޤައުމުން ބުނެއެވެ. ޙަމަލާތައް ދިނުމުގެ ކުރިން ބަޣްދާދުގެ ސަރުކާރާ މަޝްވަރާ ކޮށްފައިވާ ކަމަށް ބުނެ އެމެރިކާއިން ދޮގު ބުނުމުން, ޢިރާޤުގެ ސަރުކާރުން ވަނީ އެ ކަން ވެސް ދޮގު ކޮށްފައެވެ.