ޕާކިސްތާނުގެ ޢާންމު އިންތިޚާބުގެ ވޯޓުލުން ފެށުމަށް ތައްޔާރުވަމުން ދިޔަ ދަނޑިވަޅުގައި ބޮމުގެ ޙަމަލާތަކެއްދީ 26 މީހުން މަރައިލައިފިއެވެ. އިންތިޚާބާ ދިމާކޮށް ބޮންތަކެއް ގޮއްވައިލާފައި ވަނީ އެ ޤައުމުގެ ހުޅަނގު ދެކުނުގައިވާ ބަލޫޗިސްތާން ޕުރޮވިންސުގައެވެ.
ޕާކިސްތާނުގެ ފުލުހުން ބުނީ ބަލޫޗިސްތާނުގެ ދެ ސަރަޙައްދެއްގައި ބޮން ގޮއްވައިލާފައިވާ ކަމަށާއި ޙަމަލާތައް އަމާޒު ކޮށްފައި ވަނީ އިންތިޚާބުގައި ވާދަކުރައްވާ ކެނޑިޑޭޓުންގެ ކެމްޕޭން އޮފީސްތަކަކަށް ކަމުގައެވެ. އެ ޙަމަލާތަކާ ގުޅިގެން ވޯޓުލާ މަރުކަޒުތަކުގައި ސަލާމަތީ ފިޔަވަޅުތައް ވަރުގަދަ ކޮށްފައިވާ ކަމުގައި ވެސް ފުލުހުން ބުންޏެވެ.
ޕާކިސްތާނުގެ ޢާންމު އިންތިޚާބު ބޭއްވުމަށް ތައްޔާރީތައް ކުރަމުން ދަނީ އެންމެ ފަހުން ބޭއްވި އިންތިޚާބު ކާމިޔާބު ކުރެއްވި ކުރީގެ ބޮޑުވަޒީރު އިމްރާން ޚާނަށް ޖަލު ހުކުމްތަކެއް އިއްވާފައިވާ ދަނޑިވަޅެއްގައެވެ. އަދި އެ ޤައުމުގައި ޙަރަކާތްތެރިވާ ހަތިޔާރު އެޅި ޖަމާޢަތްތަކުގެ ޙަމަލާތައް އިތުރު ކޮށްފައިވާ ވަގުތެއްގައެވެ.
ބޮމުގެ ޙަމަލާތައް ތަޙުޤީޤު ކުރަމުންދާ އިދާރާތަކުން ބުނީ ފުރަތަމަ ބޮން ގޮއްވައިލާފައި ވަނީ ބަލޫޗިސްތާނުގެ ޕިޝީން ޑިސްޓްރިކްޓުގައި ކަމަށެވެ. އިންތިޚާބުގައި ވާދަ ކުރައްވާ މިނިވަން ކެނޑިޑޭޓެއްގެ ކެމްޕޭން އިދާރާއެއް ކައިރީގައި ދީފައިވާ އެ ޙަމަލާގައި 14 މީހުން މަރުވިއެވެ. އެ ޙަމަލާގައި 24 ވަރަކަށް މީހުން ޒަޚަމުވި ކަމުގައި ޚާންޒެއި ހަސްފަތާލުން ބުނެއެވެ. ދެވަނަ ބޮން ގޮއްވައިލާފައި ވަނީ ޕާކިސްތާނާއި އަފްޣާނިސްތާން ގުޅޭ ސަރަޙައްދީ ރޮނގު ކައިރީގައި އޮންނަ ޤިލާ ސައިފުاللهގައެވެ. އެ ޙަމަލާގައި 12 މީހުން މަރުވެ އިތުރު 25 މީހުން ޒަޚަމުވިއެވެ. ބޮން ގޮއްވައިލާފައި ވަނީ ޖަމީޢަތު އުލެމާ އިސްލާމް (ޖޭޔޫއައި)ގެ އިދާރާ ކައިރީގައެވެ.
ޙަމަލާތަކުގެ ފަހަތުގައި ވަނީ ކޮން ބަޔެއް ކަން އަދި ސާފެއް ނޫނެވެ. ނަމަވެސް އެ ސަރަޙައްދުތަކުގައި ފަހަކަށް އައިސް ދީފައިވާ ހަމަލާތަކުގެ ފަހަތުގައި ވަނީ މައިގަނޑު ދެ ޖަމާޢަތެކެވެ. އެއީ ޕާކިސްތާނީ ޠާލިބާން (ޓީޓީޕީ)އާއި ބަލޫޗިސްތާންގައި ވަކި ދައުލަތެއް ގާއިމު ކުރަން ހަނގުރާމަ ކުރަމުންދާ ހަތިޔާރު އެޅި ޖަމާޢަތެކެވެ.
ފެބުރުވަރީ 5 ވަނަ ދުވަހު ވެސް ޓީޓީޕީން ވަނީ ބޮމުގެ ޙަމަލާއެއްދީ 10 މީހުން މަރައިލާފައެވެ. ޕާކިސްތާނުގެ ހުޅަނގުއުތުރުގައި އޮންނަ ރަށެއްގެ ފުލުހުންގެ އިދާރާއަށް އަމާޒުކޮށް ދީފައިވާ ޙަމަލާގެ ޒިންމާ އުފުލާ ކަަމަށް ޓީޕީޕީން ވަނީ ބުނެފައެވެ. އެއީ ފުލުހުންނާއި އިންތިޚާބުގައި ވާދަ ކުރާ ކެނޑިޑޭޓުންނަށް އަމާޒުކޮށް ދިން ޙަމަލާއެއް ކަމުގައި ވެސް އެ ޖަމާޢަތުން ބުނެއެވެ.
ޢާންމު އިންތިޚާބާ ދިމާކޮށް މަސްރަޙު ހޫނުވެފައިވާ ދަނޑިވަޅެއްގައި ސަލާމަތީ ފިޔަވަޅެއްގެ ގޮތުން ޕާކިސްތާނާއި އަފްޣާނިސްތާން އަދި އީރާނާ ގުޅޭ ސަރަޙައްދީ ރޮނގު ވަޤުތީ ގޮތުން ބަންދު ކުރާނެ ކަމުގައި ޕާކިސްތާނުގެ ޚާރިޖީ ވުޒާރާއިން ވަނީ އިޢުލާނު ކޮށްފައެވެ. ސަރަޙައްދީ ރޮނގު ދެން ހުޅުވައިލާނީ އިންތިޚާބުގެ ވޯޓުލުން ނިމުމުން ފެބުރުވަރީ 10 ވަނަ ދުވަހުއެވެ.