އެމެރިކާގެ އަސްކަރިއްޔާއިން ޢިރާޤުގެ ވެރިރަށް ބަޣްދާދަށް ޑްރޯން ޙަމަލާއެއްދީ ކަތާއިބް ޙިޒްބުاللهގެ އިސް ކޮމާންޑަރެއް ޝަހީދުކޮށްލައިފިއެވެ.
އީރާނުން ވާގިވެރިވާ ކަމަށް ތުހުމަތު ކުރެވޭ ކަތާއިބް ޙިޒްބުاللهއަކީ ޢިރާޤުގައި ޙަރަކާތްތެރިވާ ހަތިޔާރު އެޅި ޖަމާޢަތެކެވެ. އެ ޖަމާޢަތުގެ ކޮމާންޑަރެއް ކަމުގައިވާ އަބޫ ބާޤިރު އަލް-ސަޢުދީ ޝަހީދުކޮށްލާފައި ވަނީ ބަޣްދާދްގެ އިރުމަތީގައި އޮންނަ ސަރަޙައްދެއްގައި އޭނާ ދަތުރު ކުރައްވަމުން ގެންދެވި ކާރަށް އެމެރިކާއިން ދިން ޑްރޯން ޙަމަލާއެއްގައެވެ.
އެމެރިކާގެ އަސްކަރިއްޔާއިން ބުނީ ޝަހީދުކޮށްލާފައިވާ ކޮމާންޑަރަކީ މެދުއިރުމަތީގެ ޤައުމުތަކުގައި ހަރަކާތްތެރިވަމުންދާ އެމެރިކާ ސިފައިންނަށް އަމާޒުކޮށް ކަތާއިބު ޙިޒްބުاللهއިން ދެމުންދާ ޙަމަލާތައް ރާވައި ހިންގުމުގައި އިސްކޮށް ޙަރަކާތްތެރިވި މީހެއް ކަމުގައެވެ. އޭނާ ޝަހީދުކޮށްލަން ދީފައިވާ ޑްރޯން ޙަމަލާގައި ޢާންމުންގެ އެއްވެސް މީހެއްގެ ފުރާނައަށް ނުރައްކާވެފައި ނުވާ ކަމުގައި ވެސް އެމެރިކާއިން ބުންޏެވެ.
ނަމަވެސް ސަޢުދީ ޝަހީދު ކޮށްލަން ދިން ޙަމަލާގައި ތިން މީހުން ޝަހީދުވި ކަމަށާއި އެއީ އިރާޤު ސަރުކާރުގެ ސަލާމަތީ ބާރަށް ނިސްބަތްވާ ޕޮޕިޔުލަރ މޮބިލައިޒޭޝަން ފޯސަސް (ޕީއެމްއެފް)ގެ ތިން ސިފައިން ކަމުގައި ޢިރާޤުގެ މަސްދަރުތަކުން ހާމަ ކުރެއެވެ. ކަތާއިބު ޙިޒްބުاللهއަކީ ޕީއެމްއެފްގެ މެންބަރެކެވެ.
ސަޢުދީ ޝަހީދުކޮށްލާފައި ވަނީ އުރުދުންގައި އޮންނަ އެމެރިކާގެ އަސްކަރީ މަރުކަޒަކަށް ހުސްވި މަހު ޑްރޯން ޙަމަލާއެއްދީ އެމެރިކާ ސިފައިންގެ ތިން މީހުން މަރައިލުމުން އެ ކަމުގެ ބަދަލު ހިފުމުގެ ގޮތުންނެވެ. އެމެރިކާއިން ބުނީ އެއީ ކަތާއިބު ޙިޒްބުاللهއިން ދީފައިވާ ޙަމަލާއެއް ކަމަށް ބެލެވޭ ކަމުގައެވެ. ނަމަވެސް އެ ޙާދިޘާއަށް ފަހު ކަތާއިބް ޙިޒްބުاللهއިން ވަނީ އެމެރިކާގެ އަމާޒުތަކަށް ދެމުންދާ ޙަމަލާތައް މެދުކަނޑައިލާފައިވާކަން އިޢުލާނު ކޮށްފައެވެ.
އުރުދުންގައި ދީފައިވާ ޙަމަލާއާ ގުޅިގެން އެމެރިކާއިން ވަނީ ސޫރިޔާއާއި ޢިރާޤަށް ބޮން އަޅަން ފަށާފައެވެ. އަދި އެއީ ޙަމަލާތަކުގެ ފެށުން ކަމުގައި އެމެރިކާއިން ބުންޏެވެ. އެ ޙަމަލާތަކުގައި 40އަށްވުރެ ގިނަ މީހުން ޝަހީދު ކޮށްލާފައިވެއެވެ. އޭގެ ތެރޭގައި ގިނައީ ޢާންމުން ކަމުގައި ސޫރިޔާއާއި ޢިރާޤުގެ ސަރުކާރުން ބުނެއެވެ.
ކުރިން އެމެރިކާއިން ބުނެފައި ވަނީ ޢިރާޤުގެ އަމާޒުތަކަށް ޙަމަލާ ދީފައި ވަނީ ބަޣްދާދުގެ ހުއްދައާ އެކުގައި ކަމަށެވެ. ނަމަވެސް ޙަމަލާތަކާ ގުޅިގެން ބަޣްދާދާއި ދިމިޝްޤުން ނުރުހުން ފާޅު ކުރުމުން އެމެރިކާއިން ވަނީ ޙަމަލާތައް ދިނުމުގެ ކުރިން ބަޣްދާދާ މަޝްވަރާ ކޮށްފައި ނުވާ ކަމަށް ބުނެ ކުރިން ހަދާފައި ވަނީ ދޮގެއް ކަމަށް އެއްބަސްވެފައެވެ.
ހުސްވި ޖަނަވަރީ މަހު ވެސް އެމެރިކާއިން ވަނީ ބަޣްދާދަށް ޑްރޯން ޙަމަލާއެއްދީ ހަނގުރާމަވެރިންގެ ޖަމާޢަތަކަށް ނިސްބަތްވާ އިސް ކޮމާންޑަރެއް ޝަހީދު ކޮށްލާފައެވެ. އަދި ބަޣްދާދަށް އެންމެ ފަހުން ދީފައިވާ ޙަމަލާތަކާ އެކު އިރާޤުގައި އެމެރިކާ ސިފައިން ހަރަކާތްތެރިވާ ސަރަޙައްދުތަކުގައި މިހާރު ވަނީ ސަލާމަތީ ފިޔަވަޅުތައް ވަރުގަދަ ކޮށްފައެވެ. މެދުއިރުމަތީގެ މަސްރަޙު އިތުރަށް ހޫނުވެފައި ވަނީ އެމެރިކާއިން ޢިރާޤާއި ސޫރިޔާއަށް ބޮންއަޅަން ފެށުމުން ކަމަށް ބުނެ ރަޝިޔާއާއި ޗައިނާއިން ވަނީ އެމެރިކާއަށް ބަހުގެ ޙަމަލާތަކެއް އަމާޒު ކޮށްފައެވެ.