މެލޭޝިޔާގެ ކުރީގެ ބޮޑުވަޒީރު މަހާތިރު މުޙައްމަދު އަނެއްކާވެސް ހަސްފަތާލުގައި އެޑްމިޓްކޮށްފިއެވެ.
މަޢުލޫމާތު ލިބިފައިވާ ގޮތުގައި ޢުމުރުފުޅުން 98 އަހަރުގެ މަހާތިރު އެޑްމިޓްކޮށްފައި ވަނީ އިންފެކްޝަނެއް ޖެހިވަޑައިގެން އެ ކަމަށް ފަރުވާ ހޯއްދެވުމަށެވެ. ފާއިތުވި އަހަރުތަކުގެ ތެރޭގައި އޭނާ ވަނީ އެކި ފަހަރުމަތިން ހިތުގެ މައްސަލަތަކަށް ފަރުވާ ހޯއްދަވައި ހިތުގެ ބައިޕާސް ސާޖަރީ ހައްދަވައިފައެވެ. އޭނާ ހޮސްޕިޓަލުގައި އެޑްމިޓްކޮށްފައި ވަނީ ކޯޓުގެ އަޑުއެހުމަކަށް ވަޑައިގެންނެވުމަށް ހަމަޖެހިފައިވަނިކޮށެވެ.
މެލޭޝިޔާގެ ކުރީގެ ބޮޑުވަޒީރުކަން އެންމެ ދިގު މުއްދަތަކަށް ކުރައްވާފައި ވަނީ މަހާތިރެވެ. އޭނާވަނީ 1981ވަނަ އަހަރުން 2003ވަނަ އަހަރަށް މެދުނުކެނޑި ބޮޑުވަޒީރުކަން ކުރައްވައިފައެވެ. އަދި 2018ވަނަ އަހަރުގެ ތެރޭގައި އޭނާ ވަނީ އަލުން ބޮޑުވަޒީރުކަމާ ޙަވާލުވެވަޑައިގެންފައެވެ. ނަމަވެސް ވެރިކަންކުރާ އިއްތިޙާދުގައި ޖެހުނު މައްސަލަތަކަށްފަހު އޭނާ ވަނީ ބޮޑުވަޒީރުކަމުން އިސްތިޢުފާދެއްވައިފައެވެ. އޭނާއަކީ އަދިވެސް މެލޭޝިޔާގެ ސިޔާސީ މަޞްރަޙުގައި ނުފޫޒުގަދަ ބޭފުޅެކެވެ.