ފަލަސްޠީނުގެ ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާންތައް ހުއްޓުމަކަށް ގެނައުމާ ގުޅޭ ގޮތުން މިޞްރުގެ ވެރިރަށް ޤާހިރާގައި ބޭއްވި މަޝްވަރާތަކުން ކުރިއެރުމެއް ނުލިބި, މެދުކަނޑައިލައިފިއެވެ. މި މަޝްވަރާތަކުގައި މިޞްރުގެ އިތުރުން ޤަޠަރާއި އެމެރިކާ އަދި ޔަހޫދީ އިސްރާއީލުގެ އޮފިޝަލުން ބައިވެރިވިއެވެ.
މަޝްވަރާތަކުން ކުރިއެރުމަށް ނުލިބި މެދުކަނޑައިލަން ޖެހިފައި މި ވަނީ, ޣައްޒާގެ އެންމެ ދެކުނުން އޮތް ރަފަޙަށް އަރައި ޢުދުވާންތައް ފުޅާ ކުރަން ޔަހޫދީ ފައުޖުން ތައްޔާރުވަމުންދާ ދަނޑިވަޅެއްގައެވެ. އެއްގަމު މަގުން ރަފަޙަށް އަރައި ޢުދުވާންތައް ފުޅާ ކުރުމާ ދެކޮޅަށް ދުނިޔޭގެ އެކި ކަންކޮޅުތަކުން ދަނީ ގޮވައިލަމުންނެވެ. ރަފަޙުގައި މި ވަގުތު 1.4 މިލިޔަނަށް ވުރެ ގިނަ ފަލަސްޠީނުގެ ރައްޔިތުން ހާލުގައި ޖެހިފައި އެބަތިއްބެވެ.
މަޝްވަރާތަކުގައި މިޞްރުގެ ރައީސް ޢަބްދުލްފައްތާޙް އަލް-ސީސީއާއި ޤަޠަރުގެ ބޮޑުވަޒީރު ޝައިޚް މުޙައްމަދު ބިން ޢަބްދުއްރަޙްމާން ބިން ޖާސިމް އަލް-ޘާނީ ބައިވެރިވެ ވަޑައިގެންނެވިއެވެ. އެމެރިކާ ތަމްސީލު ކުރައްވާފައި ވަނީ އެ ޤައުމުގެ ޖާސޫސީ އިދާރާ, ސެންޓްރަލް އިންޓެލިޖެންސް އޭޖެންސީ (ސީއައިއޭ)ގެ އިސްވެރިޔާ ވިލިޔަމް ބަރންސްއެވެ. މަޝްވަރާތަކާ ގުޅޭ ގޮތުން މިޞްރުން ބުނީ, ކުރިއެރުމެއް ނުލިބި މަޝްވަރާތައް މެދުކަނޑައިލި ނަމަވެސް, މަޝްވަރާތައް ކުރިއަށް ގެންދަން ހުރިހާ ފަރާތަކުން ވެސް ބޭނުންވާ ކަމުގައެވެ.
އޮކްޓޫބަރު 7 ވަނަ ދުވަހު ޔަހޫދީ ފައުޖުން ޢުދުވާންތައް ފެށުމުގެ ކުރިން ރަފަޙުގެ އާބާދީއަކީ އެންމެ 300,000 އެވެ. ނަމަވެސް, ޣައްޒާގެ އުތުރާއި މެދުތެރޭގައިވާ ރަށްތަކުގެ އިތުރުން ދެކުނުގައި އޮތް ޚާން ޔޫނިސަށް ޔަހޫދީ ފައުޖުން ދެމުން ދިޔަ ޙަމަލާތަކުން ސަލާމަތްވުމަށް, ޣައްޒާގެ އާބާދީގެ ބޮޑު އިންސައްތައެއް މި ވަނީ ރަފަޙަށް ބަދަލުވެފައެވެ. އެ މީހުން މި ވަގުތު ދިރިއުޅެމުން ދަނީ ޓެންޓުތަކާއި ވަގުތީ ހިޔާތަކުގައި ވަރަށް ނިކަމެތި ހާލުގައެވެ.
ނަމަވެސް, ޔަހޫދީ ފައުޖުން މިހާރު ވެސް ވަނީ ރަފަޙަށް ދެމުންދާ ޙަމަލާތައް އިތުރު ކުރަން ފަށާފައެވެ. ރަފަޙުގެ ރައްޔިތުން ބުނީ, ޔަހޫދީ ފައުޖުގެ އަސްކަރީ ޓޭންކުތަކުން ރަފަޙަށް ޙަމަލާ ދޭން ފަށާފައިވާ ކަމުގައެވެ. މި ޙަމަލާތަކާ ގުޅިގެން އެ މީހުންނަށް ވަނީ ހާސްކަމާ ކުރިމަތިވެފައެވެ. ޔަހޫދީންގެ ޙަމަލާތަކުން ސަލާމަތްވުމަށް ޣައްޒާގައި ތިބި 1.4 މިލިޔަނެއްހާ ރެފިއުޖީން ދާނެ އިތުރު ތަނެއް ނެތް ކަމަށް ބުނެ, އެހީދޭ ޖަމާޢަތްތަކުން ދަނީ އެ ރަށުގައި ޢުދުވާންތައް ފުޅާ ނުކުރުމަށް ގޮވައިލަމުންނެވެ.
ފާއިތުވި 24 ވަރަކަށް ގަޑިއިރުގެ ތެރޭގައި ޔަހޫދީ ފައުޖުން ޣައްޒާއަށް ދީފައިވާ ޙަމަލާތަކުގައި 133 މީހުން ޝަހީދު ކޮށްލާފައިވާ ކަމުގައި ޣައްޒާގެ ޞިއްޙަތާ ބެހޭ ވުޒާރާއިން ބުނެއެވެ. މިއާ އެކު, އޮކްޓޫބަރު 7ގެ ފަހުން ޝަހީދު ކޮށްލާފައިވާ މީހުންގެ ޢަދަދު ވަނީ 28,473 އަށް އުފުލިފައެވެ. މީގެ ތެރޭގައި ގިނައީ އަންހެނުންނާއި މައުސޫމު ކުޑަކުދިންނެވެ. އަދި, ޒަޚަމު ކޮށްލާފައިވާ މީހުންގެ ޢަދަދު 68,000 އަށް އަރައެވެ.