ފަރަންސޭސިވިލާތުން ފަލަސްޠީނަކީ މިނިވަން ދައުލަތެއްގެ ގޮތުގައި ބަލައިގަންނާނެ ކަމުގެ އިޝާރާތެއް
ފަލަސްޠީނަކީ މިިނިވަން ދަޢުލަތެއްގެ ގޮތުގައި ބަލައިގަންނާނެ ކަމުގެ އިޝާރާތެއް ފަރަންސޭސިވިލާތުގެ ރައީސް އެމަނުއެލް މެކްޚޮން ދެއްވައިފިއެވެ. އެ ކަމާ ގުޅޭ ގޮތުން ވާހަކަފުޅު ދައްކަވަމުން މެކްޚޮން ވިދާޅުވީ, ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލައިގަންނަން ފަރަންސޭސިވިލާތުގެ ރައްޔިތުން ފަސް ނުޖެހޭނެ ކަމަށާއި, އެ ކަމާ ދެކޮޅު ހަދާނެ ކަމަށް ގަބޫލު ނުކުރައްވާ ކަމުގައެވެ.
އަދި, ފަލަސްޠީނުގެ މިނިވަން ދަޢުލަތެއް ގާއިމު ކޮށްދޭން ޔަހޫދީން ދެކޮޅު ހަދަމުންދާ ނަމަ, އެ ކަމާ މެދު ފަރަންސޭސިވިލާތުން އިސްވެ ގޮތެއް ނިިންމާނެ ކަމުގައި ވެސް އޭނާ ވިދާޅުވިއެވެ. އެ ކަން އެ ގޮތަށް ކުރި ނަމަވެސް, ފަލަސްޠީނުގެ ރައްޔިތުން މި ވަގުތު ތަޙައްމުލު ކުރަމުންދާ ހާލަތަށް ހެޔޮ ބަދަލުތަކެއް އަންނާނެ ކަމަކަށް ނުބެލެވެއެވެ. ނަމަވެސް, އެއީ ޚާރިޖީ ގޮތުން ބަލާއިރު ބޮޑު ބަދަލަކަށް ވާނެއެވެ.
"މެދުއިރުމަތީގައި ތިބި އަޅުގަނޑުމެންގެ އެކުވެރިންނާ ގުޅިގެން, ޚާއްޞަކޮށް އުރުދުނާ ގުޅިގެން, އަޅުގަނޑުމެން މި ދަނީ މަސައްކަތް ކުރަމުން. މި ކަމުގައި އެހީތެރިކަން ފޯރުކޮށްދޭން އަޅުގަނޑުމެން ތައްޔާރު. ވިލާތާއި އދގެ ސަލާމަތީ މަޖިލީހުގެ ތެރެއިން މަސައްކަތް ކުރަން ވެސް ތައްޔާރު. ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލައިގަތުމަށް ފަރަންސޭސި ރައްޔިތުން ރުހޭނެ،" މެކްޚޮން ވިދާޅުވިއެވެ.
ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލައިގަތުމާ ގުޅޭ ގޮތުން މެކްޚޮން ވާހަކަފުޅު ދައްކަވާފައި މި ވަނީ, ޔަހޫދީންގެ ހަރުކަށި ބޮޑުވަޒީރު ބުންޔާމިން ނަތަންޔާހޫ ފާޅުގައި އެ ކަމަށް ދެކޮޅު ހަދަމުންދާ ދަނޑިވަޅެއްގައެވެ. ފަލަސްޠީނުގެ މިނިވަން ކަން ކަށަވަރު ކޮށްދީފި ނަމަ, ޔަހޫދީނއގެ ސަލާމަތަށް ނުރައްކާވާނެ ކަމުގައި އޭނާ ބުންޏެވެ. ފަލަސްޠީނުގެ މުސްލިމުން އަޅުވެތިކޮށް, އެ މީހުންގެ މައްޗަށް އިސްތިޢުމާރީ ބާރުވެރި ކަން ހިންގަމުން ދަނީ މި ސަބަބާ ގުޅިގެންނެވެ.
ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލައިގަތުމަށް ފަރަންސޭސިވިލާތުގެ ޤާނޫނު ހަދާ މަޖިލީހުން 2014 ވަނަ އަހަރު ވަނީ ފާސްކޮށްފައެވެ. ނަމަވެސް, ފަރަންސޭސިވިލާތުގެ ސަރުކާރުން އެ ނިންމުމަށް އަމަލު ކޮށްފައެއް ނުވެއެވެ. ނަމަވެސް, މިއީ މި ކަމާ އެއްކޮޅަށް ފަރަންސޭސިވިލާތުގެ ރައީސަކު ވަކާލާތު ކުރައްވާފައިވާ ފުރަތަމަ ފަހަރެވެ. މެކްޚޮންގެ ވާހަކަފުޅުން ދޭހަކޮށްދެނީ, ޔަހޫދީ ފައުޖުން ޣައްޒާގައި ހިންގަމުންދާ ލާއިންސާނީ ޢުދުވާނާ މެދު ހުޅަނގުން ނުރުހުން ވެފައިވާ މިންވަރެވެ.
ފަލަސްޠީނުގެ މިނިވަން ދަޢުލަތެއް ބަލައިގަތުމާ ގުޅޭ ގޮތުން މެކްޚޮން ވާހަކަފުޅު ދައްކަވާފައި މި ވަނީ, އެ ކަމަށް ޖައްބާރު ނަތަންޔާހޫއަށް ބާރު އެޅުމުގެ ގޮތުންނެވެ. ޣައްޒާގައި ހިންގަމުންދާ ލާއިންސާނީ ޢުދުވާން ރަފަޙަށް ފުޅާ ކުރަން ޔަހޫދީ ރާވާފައިވާ ރޭވުމަށް ވެސް މެކްޚޮން ވަނީ ފާޑު ވިދާޅުވެފައެވެ. ފަލަސްޠީނަކީ މިނިވަން ދަޢުލަތެއްގެ ގޮތުގައި ބަލައިގަތުމާ މެދު އިނގިރޭސިވިލާތުން ވިސްނަމުންދާ ކަމުގައި އެ ޤައުމުގެ ޚާރިޖީ ވަޒީރު ޑޭވިޑް ކެމަރަން ވެސް ދާދި ފަހުން ވިދާޅުވެފައިވެއެވެ.
އޮކްޓޫބަރު 7 ވަނަ ދުވަހުން ފެށިގެން ޣައްޒާގައި ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 28,775އަށް އުފުލިފައެވެ. އޭގެ ތެރޭގައި ގިނައީ އަންހެނުންނާއި މައުސޫމު ކުޑަކުދިންނެވެ. އަދި, ޒަޚަމު ކޮށްލާފައިވާ މީހުންގެ ޢަދަދު 68,552އަށް އަރައެވެ.