ކުރީ ސަރުކާރުން ނުޙައްޤުން ފަންސާހަކަށް ބިން ހުޅުމާލެއިން ދޫކޮށްފައިވޭ: ފަޒުލް

ކުރީ ސަރުކާރުން ހުޅުމާލެއިން ނުޙައްޤުން 50 ހަކަށް ބިން ދޫކޮށްފައިވާކަމަށް ހައުސިންގ ޑިވަލޮޕްމެންޓް ކޯޕަރޭޝަން، އެޗް.ޑީ.ސީގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދު ވިދާޅުވެއްޖެއެވެ.

ފަޒުން މިހެން ވިދާޅުވީ ޕްރޮގްރެސިވް ކޮންގްރެސް ކޯލިޝަނުން ބޭއްވި ޖަގަހަ ޖަލްސާގައި ވާހަކަދައްކަވަމުންނެވެ.

ފަޒުލް ވިދާޅުވީ، އެޗް.ޑީ.ސީގެ މެނޭޖިން ޑިރެކްޓަރުކަމާ ހަވާލުވެވަޑައިގަތުމަށްފަހު އެންމެ ފުރަތަމަ ވެސް ކުރެއްވި ކަމަކީ ހުޅުމާލޭގެ ރައްޔިތުންނަށް ޚިދުމަތްތައް ފަސޭހައިން ފޯރުކޮށްދެވޭނެ ގޮތްތަކަކަކީ ކޮބައިތޯ ބެލުމާއި ހުޅުމާލެއިން ދީފައިވާ ބިންތަކަށް ވީ ކިހިނެއްތޯ ބެލުން ކަމަށެވެ.

އެގޮތުން ހުޅުމާލޭގެ 1 ވަނަ ފިޔަވައްސާއި 2 ވަނަ ފިޔަވަހި އަދި ނުހިއްކާ އޮތް ސަރަހައްދުން 50 ހަކަށް ބިން މީހުންނަށް ދީ ޚަލާސްކޮށްފައިވާކަމަށް ފަޒުލް ވިދާޅުވިއެވެ. އަދި މި މީހުންނަށް ބިން ދީފައިވަނީ ވިޔަފާރި އުޞޫލުން ނުޙައްޤުން ކަމަށް ފަޒުލް ވިދާޅުވިއެވެ.

"ހުޅުމާލޭގެ ފޭސް 1، 2 އަދި ނުހިއްކާ އޮތް ތަނުން 50ކަށް ބިން އެކި މީހުންނަށްދީ ޚަލާސްކޮށްފައިވޭ. އަދި ވިޔަފާރި އުޞޫލުންނާއި ނުޙައްޤުން އެތައް ބިންތަކެއް ދީފައި އެބައޮތް." ފަޒުލް ވިދާޅުވިއެވެ.

ފަޒުލް ވިދާޅުވީ "ބިންވެރިޔާ" ސްކީމްގެ ދަށުން ހުޅުމާލޭގެ ދެވަނަ ފިޔަވަހިން ދީފައިވާ ބައެއް ބިންތަކުގައި މަސައްކަތްކުރާ މީހުން ވެލިއަޅާފައިވާ ނުވަތަ ހިލައަޅާ ބޮޑުވެފައި ހުންނަ ފަރުބަދަތައް ހުންނަ ކަމަށެވެ. ވީމާ މިގޮތަށް ދީފައިހުރި ބިންތައް ރައްޔިތުންނަށް ދެވޭނީ ބިން އެހެން ތަނަކަށް ބަދަލުކުރުމަށްފަހު ކަމަށް ފަޒުލް ވިދާޅުވިއެވެ.

މި ޖަލްސާގައި ވާހަކަދައްކަވަމުން ފަޒުލް ވަނީ ބިން ހިއްކުން ހުއްޓިފައިވާކަމަށް ބުނެ ސަރުކާރަށް އަމާޒުވާ ފާޑުކިޔުންތަކަށް ވެސް ރައްދު ދެއްވާފައެވެ. އެގޮތުން ފަޒުލް ވިދާޅުވީ ބިން ހިއްކުމުގެ މަސައްކަތް ނުހުއްޓި ބާރަށް ކުރިއަށްދާ ކަމަށެވެ. އަދި އިދިކޮޅުން މަޖިލީހުގެ ތެރެއިން ރަސްމާލެ ނުހިއްކޭނެކަން ޔަޤީންކުރުމަށް އެކަމަށް ކަނޑައެޅި ބަޖެޓި ފާސްނުކޮށްދިންކަމަށް ފަޒުލް ވިދާޅުވިއެވެ.

އެހެންނަމަވެސް އެ މަޝްރޫޢަށް ފަންޑު ހޯދައިގެން ރަސްމާލޭގެ ބިން ހިއްކުން ބާރަށް ކުރިއަށްދާކަމަށް ފަޒުލް ވަނީ ވިދާޅުވެފައެވެ. އަދި ގިރާވަރުފަޅާއި ހުޅުމާލޭގެ 3 ވަނަ ފިޔަވަހީގެ ބިން ހިއްކުންވެސް ބާރަށް ކުރިއަށްދާކަމަށް ފަޒުލް ރަޝީދު ވިދާޅުވިއެވެ.