ރައީސް އެދިވަޑައިގަތީ ދޮގު ބަސްތައް ރައްދުނުކޮށް، ރީތި އާދަތައް އާލާކުރުމަށް

ކުރިއަށް އޮތް މަޖިލިސް އިންތިޚާބަށް ކެމްޕެއިން ކުރައްވާއިރު، ވާދަވެރިކަމުގެ ތެރޭގައިވެސް އެކަކު އަނެކަކަށް ހަގީގަތާ ހިލާފަށް ދޮގުބަސްތައް ރައްދުނުކޮށް، ހަގީގަތާ އެއްގޮތަށް ރީތި ކެމްޕެއިނެއް ކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެދިވަޑައިގެންފިއެވެ. ފާދިއްޕޮޅު ނައިފަރުގައި ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ރަމަޟާން މަހުގެ ހެޔޮ އެދުމާއި ތަހުނިޔާ އެންމެހާ ރައްޔިތުންނަށް ފޮނުއްވާފައެވެ.

ރައީސްގެ ވާހަކަފުޅުގައި ވަނީ މި ރަމަޟާންމަހުގެ ބޭނުން ހެޔޮގޮތުގައި ހިފުމަށް އެދިވަޑައިގެންފައެވެ. އެގޮތުން ދޮގު ހެދުމާއި ފުރައްސާރަ ކުރުމާއި، ހަގީގަތެއް ނެތް ކަންކަން މީހުންނަށް ކުރިމަތުކުރުމުން ދުރުހެލިވުމުގެ މުހިންމުކަން ރައީސް ފާހަގަކުރެއްވިއެވެ. ހަމައެއާއެކު، އެއްބަޔަކު އަނެއް ބަޔަކަށް އަޅާލައި، އޯގާތެރި މުޖުތަމައެއް ގާއިމްކުރުމަށް އަޒުމު ކަނޑައެޅުމަށްވެސް ރައީސް ވަނީ ރައްޔިތުންގެ ކިބައިން އެދިވަޑައިގެންފައެވެ.

ރައީސް ވިދާޅުވީ، ރަމަޟާން މަހަކީ ތަގުވާވެރިކަން އިތުރުކުރުނަށް މާތްﷲ ދެއްވާ ފުރުސަތެއްކަމަށާއި، އެހެންކަމުން ހަގީގީ މާނާގައި ރޯދަ ހިފާނަމަ އެކަންކަމަށް އިސްކަންދެއްވުމަށް ނަސޭހަތްތެރިވެވަޑައިގެންފައެވެ.

ރައީސްގެ ވާހަކަފުޅުގައި ކުރިއަށް އޮތް ރައްޔިތުންގެ މަޖިލިސް އިންތިހާބަކީ ވާދަވެރި އިންތިހާބެއްގެ ގޮތުގައި ސިފަކުރެއްވިއެވެ. އަދި އެމަނިކުފާނު އެދިވަޑައިގަތީ، އެ ވާދަވެރިކަމުގެ ތެރޭގައިވެސް އެކަކު އަނެކަކަށް ހަގީގަތާ ހިލާފަށް ދޮގުބަސްތައް ރައްދުނުކޮށް، ހަގީގަތާ އެއްގޮތަށް ރީތި ބަހުރުވައިން ކެމްޕެއިންކޮށް، ރީތި އާދަތައް އާލާކުރުމަށެވެ. މީގެ އިތުރުން ކުޑަ ކުދިންނަށް ވެސް ރީތި ގޮތް ދަސްކޮށްދީ، ބޮޑެތި މީހުންނަށް އިހުތިރާމުކުރަން އެމަނިކުފާނު ބާރުއެޅުއްވިއެވެ. ރައީސް ވަނީ އެއްވެސް ހާލެއްގައި އެއްވެސް މީހަކު ދޮގު ވާހަކަތައް ފެތުރުމަށް ފުރުސަތު ނުދެއްވުމަށް ތަކުރާރުކޮށް އެދިވަޑައިގެންފައެވެ.

"އަޅުގަނޑުމެންނަށް އެބަ ފެނޭ ކާކު ހިންގާ ވެބްސައިޓްތަކެއް ކަން ނޭނގޭ އެތައް ވެބްސައިޓްތަކެއްގަ، ނޫސްތަކެއްގަ އަންޑަރގްރައުންޑް ވެބްސައިޓްތަކުގަ އެއްވެސް ވަރެއްގެ ހަގީގަތެއް ނެތް ވާހަކަތައް ލިޔަމުންދާތަން. ދިވެހި އަކުރުން ދިވެހި ބަހުން ލިޔެފަ ހުންނަނީ. އެހެންމަ ދިވެހިން ކަމަށް މި ބަލަނީ އެ ވެބްސައިޓް ތައް އެ ހިންގަނީ. ތެދުބަހުން ވާހަކަ ދެއްކުމަށް ޤުރުއާނުގައި އަންގަވާފައިވަނީ. އީމާންތެރިކަން ހުރި މީހެއް ވިއްޔާ ތެދުބަހުން ވާހަކަ ދައްކާނެ." ރައީސުލްޖުމްހޫރިއްޔާ ވިދާޅުވިއެވެ.

ރައީސް ވަނީ ރަމަޟާން މަހު ތަގުވާވެރިކަން އިސްކޮށް އަޅުގަނޑުމެންގެ ކިބައިގައި ރީތި ގުޅުންތައް ގާއިމުކޮށް، އޯގަތެރި މުޖުތަމައެއް ގާއިމުކުރުމަށްވެސް އެދިވަޑައިގެންފައެވެ. ގައުމަށް ހަމަޖެހުން އަންނާނީ އަމިއްލަ ނަފްސު އިސްލާހުކޮށްގެންކަމަށާއި، ނަފްސު އިސްލާހުނުކޮށް، ނަފްސު ތަރައްޤީނުކޮށް ގައްމަށް އަންނާނެ ތަރައްގީއެއް އަދި ކުރިއެރުމެއްވެސް ނޯންނާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.