މިސްކިތްތަކުގެ އަޑު ކަނޑުވާލުމަކީ ކުރާނެ ކަމެއް ނޫން: ވަޒީރު ޑރ.ޝަހީމް
-
އެއްވެސް މިސްކިތެއްގެ އަޑު ކަނޑުވާލުމުގެ ވާހަކައެއް ނުދައްކަވާ ކަމަށް ވިދާޅުވި
-
ގޭގައި ނަމާދުކުރާ ފަރާތްތަކަށް ދަތި ނުވާނެ ގޮތަށް ކަންކަން ބެހެއްޓުމަށް އެދިވަޑައިގެންނެވި
އެއްވެސް މިސްކިތެއްގެ އަޑު ކަނޑުވާލުމަކީ ކުރައްވާނެ ކަމެއް ނޫން ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ. ވަޒީރު މިހެން ވިދާޅުވީ، ރާއްޖޭގައި ނަމާދު ވަގުތުތަކުގައި ނަމާދުގެ އަޑު އިވުމަކީ މައްސަލައެއްކަމަށް ބުނެ ސޯޝަލް މީޑިއާގައި ފަތުރަމުންދާ ވާހަކަތަކާއި ގުޅިގެންނެވެ.
މިސްކިތްތަކުގައި ނަމާދު ކުރާއިރު، އާދަޔާ ޚިލާފަށް ބާރަށް ލައުޑް ސްޕީކަރުގެ އަޑު ގަދަވުމުން ކައިރީގައި ހުންނަ ގެތަކުގައި ނަމާދުކޮށް ހެދުމަށް އުނދަގޫވާކަމަށް ބުނެ އާންމު ރައްޔިތަކު އެކްސްގައި ކުރި ޕޯސްޓަކާ ގުޅިގެން ވަޒީރު ޝަހީމު ވިދާޅުވީ ގޭބީސީތަކުގެ ބުޑުގައި ހުންނަ މިސްކިތްތަކުގައި އަޑުހަރުކޮށް ކިޔަވާ ނަމާދުތަކުގައްޔާއި ތަރާވީޙު ނަމާދާއި ދަމު ނަމާދު ކުރުން ރަނގަޅީ މިސްކިތުގެ އެތެރެއަށް އަޑު ހުންނަ ގޮތަށް ކުރުން ކަމަށެވެ. އަދި ކުޑަކުދިން ނިދާ ގަޑިތަކުގައްޔާއި އުޒުރުވެރިން ގޭގައި ކުރާ ނަމާދުތަކަށް ދަތިނުވާނެހެން ކުރުން ކަމަށެވެ.
ވަޒީރުގެ މި ވާހަކަ އޮޅުން އަރާ ގޮތަށް ފަތުރަމުންދާތީ ވަޒީރު ޝަހީމް އެކްސްގައި ކުރެއްވި ޕޯސްޓެއްގައި ވިދާޅުވީ އެއްވެސް މިސްކިތެއްގެ އަޑު ކަނޑުވާލުމުގެ ވާހަކައެއް ނުދައްކަވާ ކަމަށާއި، އެއީ ކުރައްވާނެ ކަމެއް ނޫން ކަމަށެވެ. އަދި އިސްލާމްދީނުގައި މަޤްސަދުތަކާއި ޤަވާޢިދުތައް ކަނޑައެޅިފައިވާ ކަމަށް ވަޒީރު ވިދާޅުވިއެވެ.