ޔޫކްރެއިންގެ ދެކުނުގައި އޮންނަ ޒަޕޮރީޜިޔާގައި ހުންނަ ވިލާތުގެ އެންމެ ނިއުކްލިޔަރ ހަކަތަ އުފައްދާ ޕްލާންޓަށް ވަރުގަދަ ޙަމަލާތަކެއް ދީފިއެވެ. ޒަޕޮރީޜިޔާގައި އޮންނަ ނިއުކްލިޔަރ ޕްލާންޓް މި ވަގުތު އޮތީ ރަޝިޔާ ސިފައިންގެ އަތްދަށުގައެެވެ. ރަޝިޔާއިން ބުނީ, ނިއުކްލިޔަރ ޕްލާންޓު ހުންނަ ސަރަޙައްދަށް ޔޫކްރެއިންގެ ފައުޖުތަކުން ވަރުގަދަ ޙަމަލާތަކެއް އަމާޒު ކުރަމުންދާ ކަމުގައެވެ.
ޒަޕޮރީޜިޔާ ނިއުކްލިޔަރ ޕްލާންޓު ހިންގާ ރަޝިޔާގެ އޮފިޝަލުން ބުނީ, ޔޫކްރެއިންގެ ފައުޖުތަކުން ޙަމަލާ ދީފައި ވަނީ, އެ ޕްލާންޓުގެ ޑީސަލް ތެޔޮ ރައްކާ ކުރާ ގުދަންތައް ހުންނަ ސަރަޙައްދަށް ކަމުގައެވެ. އަދި, މިއީ ވަރަށް ނުރައްކާތެރި ޙަމަލާއެއް ކަމަށާއި, މި ފަދަ ޙަމަލާތަކާ ގުޅިގެން ނިއުކްލިޔަރ ޕްލާންޓުގެ ރިއެކްޓަރަކަށް ގެއްލުންވެ, ނިއުކްލިޔަރ ކާރިސާއެއް ހިނގުމުގެ ފުރުޞަތު އޮތް ކަމުގައެވެ.
ޒަޕޮރީޜިޔާ ނިއުކްލިޔަރ ޕްލާންޓްގެ ރައްކާތެރި ކަމާ ގުޅޭ ގޮތުން އެޓޮމިކް ހަކަތައާ ބެހޭ ބައިނަލްއަޤުވާމީ އިދާރާ (އައިއޭއީއޭން)ން ވެސް އެތަކެއް ފަހަރެއް މަތިން ވަނީ ކަންބޮޑުވުން ފާޅު ކޮށްފައެވެ. އަދި, އެ އިދާރާގެ ޑިރެކްޓަރ ޖެނެރަލް ރަފަޔަލް ގްރޮސީ ވަނީ, އެ ތަން ހިމާޔަތް ކުރުމަށް ރަޝިޔާއާއި ޔޫކްރެއިންގެ ފައުޖުތަކަށް ގޮވައިލައްވައި, އެ ތަނަށް ޙަމަލާ ދީފި ނަމަ, ނިއުކްލިޔަރ ކާރިސާއެއް ހިނގުމުގެ ފުރުޞަތު އޮތް ކަމުގެ އިންޒާރު ކުރައްވާފައެވެ.
އެ ޕްލާންޓުގައި ހާދިސާއެއް ހިނގައިފި ނަމަ، ރަޝިޔާއާއި ޔޫކްރެއިންގެ އިތުރުން މުޅި ވިލާތުގެ ބައްރަށް ވެސް ނުރައްކާ ވާނެއެވެ. އަދި، އެ ކަމުގެ ނޭދެވޭ އަސަރުތައް މުޅި ދުނިޔެއަށް ކުރުމުގެ ފުރުޞަތު އެބައޮތެވެ. ނަމަވެސް, ދޭތެރެދޭތެރެެއިން އެ ޕްލާންޓަށް ޙަމަލާތައް އަމާޒު ކުރަމުންދާ ކަން ފާހަގަ ކޮށްލަން ޖެހެއެވެ. މި ޙަމަލާގައި ޕްލާންޓުގެ ބައެއް ޢިމާރާތްތަކާއި ވަސީލަތްތަކަށް ގެއްލުންވި ނަމަވެސް, ރިއެކްޓަރަކަށް ގެއްލުން ލިބިފައެއް ނުވެއެވެ.
2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފެށުމުގެ ކުރިން ޔޫކްރެއިންގައި ބޭނުންކުރާ ކަރަންޓުގެ 20 އިންސައްތަ ފޯރުކޮށްދެމުން ގޮސްފައި ވަނީ ޒަޕޮރީޜިޔާ ޕްލާންޓުންނެވެ. އަދި، ހަނގުރާމަ ފެށި ފަހުން ވެސް އެ ތަން އޮޕަރޭޓް ކޮށްފައިވެއެވެ. ނަމަވެސް, 2022 ވަނަ އަހަރުގެ ސެޕްޓެންބަރު މަހު ދިން ޙަމަލާތަކަކާ ގުޅިގެން ގެއްލުންވެ, އެ ތަނުގެ ޚިދުމަތްތައް މެދުކަނޑައިލާފައިވެއެވެ.
ޔޫކްރެއިންގައި ކުރަމުންދާ ހަނގުރާމައިގައި ރަޝިޔާއިން ވަނީ ޒަޕޮރީޜިޔާގެ އިތުރުން ޔޫކްރެއިންގެ އިރުމަތީގައި އޮންނަ ބައެއް ސަރަޙައްދުތަކަށް ވެސް އަތްގަދަ ކޮށްފައެވެ. އޭގެ ތެރޭގައި ދޮންބާސް ސަރަޙައްދުގައި އޮންނަ ލުހާންސްކާއި ދޮންޏެސްކު ހިމެނެއެވެ. ރަޝިޔާގެ އިސްތިޢުމާރީ ސިފައިން ވެރިވެގަނެފައިވާ ބިންތައް މިނިވަން ކުރަން ޔޫކްރެއިންގެ ފައުޖުތަކުން މިހާރު ދަނީ ކައުންޓަރއޮފެންސިވެއް ނުވަތަ ރައްދު ޙަމަލާގެ އަސްކަރީ ކެމްޕޭނެއް ހިންގަމުންނެވެ.