މޮބައިލް މަނީ މެދުވެރިކޮށް ފަސޭހަކަމާއެކު ކަރަންޓް ބިލް ދެއްކޭނެ އިންތިޒާމު ހަމަޖެއްސުމަށްޓަކައި އުރީދުއާއި ސްޓެލްކޯ އެއްބަސްވުމެއްގައި ސޮއިކޮށްފިއެވެ.
މި ޚިދުމަތް ވުޖޫދަށް އައުމާއެކު، ކޮންމެ ކަސްޓަމަރަކަށްވެސް ކޮންމެ ތަނެއްގައި ހުރެގެންވެސް، ކޮންމެ ގަޑިއެއްގައިވެސް މޮބައިލް މަނީ މެދުވެރިކޮށް ސްޓެލްކޯގެ ބިލްތަކަށް ފައިސާދެއްކޭނެކަމަށް އުރީދޫން ބުނެއެވެ. އުރީދޫން ބުނީ މޮބައިލް މަނީގެ ޚިދުމަތް ތަޢާރަފްކޮށް މިއަހަރު ޕައިލޮޓް ސްޓޭޖް ފަށާފައިވާއިރު އުރީދޫގެ އަމާޒަކީ މޮބައިލް މަނީގެ ޚިދުމަތާއެކު ކަސްޓަމަރުންނަށް އިތުރު ފަސޭހަކަމާއި ރައްކާތެރިކަމާއެކު ފައިސާގެ މުޢާމަލާތްތައް ކުރިއަށް ގެންދިޔުމުގެ ފުރުޞަތު ލިބިގެން ދިޔުންކަމަށެވެ.
އުރީދޫގެ މޮބައިލް މަނީގެ ޚިދުމަތުގައި ހިމެނޭ ވާރޗުއަލް ވޮލެޓްކަމަށްވާ ''އެމް.ވޮލެޓް'' މެދުވެރިކޮށް ކަސްޓަމަރުންނަށް މޮބައިލް ފޯނު ބޭނުންކޮށް، ފައިސާ ޖަމާކޮށް، ފައިސާ ނަގައި، ރާއްޖޭގެ އެކި ކަންކޮޅުތަކަށް ފޮނުވަންޖެހޭ ފައިސާ ފޮނުވުމާއި، އުރީދޫ ޕްރީޕެއިޑް އެކައުންޓް ރީޗާރޖްކޮށް، ވިޔަފާރިކުރުމުގެ އިތުރުން ބިލް ދެއްކޭނެކަމަށް އުރީދޫގެ ސީނިއަރ އެގްޒެކެޓިވް ޕަބްލިކް ރިލޭޝަން، ނޫރާ އިބްރާހިމް ޒާހިރު ވިދާޅުވިއެވެ.
ނޫރާ ވިދާޅުވީ އުރީދޫ މޮބައިލް މަނީގެ ޕައިލޮޓް ސްޓޭޖްގައި މި ޚިދުމަތް ލިބިގެންދިޔައީ ކަނޑައެޅިފައިވާ ވަކި އަދަދެއްގެ ކަސްޓަމަރުންނަށް ކަމަށްވިޔަސް މި ޚިދުމަތުގެ ކޮމާޝަލް ލޯންޗާއެކު ކައިރި މުސްތަޤްބަލެއްގައި ރާއްޖޭގެ ކޮންމެ ނެޓްވަރކެއް ބޭނުންކުރާ ފަރާތްތަކަށްވެސް މި ޚިދުމަތް ބޭނުންކުރެވޭނެކަމަށެވެ.
މި އެއްބަސްވުމުގައި ސޮއިކުރެއްވީ ސްޓެލްކޯގެ މެނޭޖިންގ ޑިރެކްޓަރ ޢަބްދުއްޝުކޫރު ޞާލިޙް، އަދި އުރީދޫ މޯލްޑިވްސްގެ ސީއީއޯ ވިކްރަމް ސިންހައެވެ.