މާލޭގެ 5 ސަރަޙައްދެއްގަ ޤާއިމުކުރާ ވަގުތީ ނިޒާމާއެކު ފެންބޮޑުވާ މައްސަލައަށް އަަވަސް ހައްލެއް

މާލޭގެ މަގުތަކުގައި ފެން ބޮޑުވާ މައްސަލަ ހައްލުކުރުމަށް ސަރުކާރުން ވަނީ މާލޭގެ 5 ސަރަޙައްދެއްގައި ވަގުތީ ފެން ހިންދާ ނިޒާމުތަކެއް ޤާއިމުކުރުމުގެ މަސައްކަތް ފަށާފައެވެ. ވިއްސާރަވެ ފެންބޮޑުވާ ޙާލަތްތަކުގައި މި ނިޒާމުގެ ސަބަބުން ފެން ހިންދާލުމަށް އެހީވުމުގެ އިތުރުން، އެމްއެންޑީއެފުން ޕަމްޕް ޖަހަން ޖެހޭ ޙާލަތްތަކުގައި އެ މަސައްކަތަށް ފަސޭހަވެގެންދާނެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އެންގެވުމަށް، މާލޭގައި ފެން ހިންދާ ވަގުތީ ނިޒާމުގެ މަސައްކަތް ކުރުމަށް ހަވާލުކުރައްވާފައިވަނީ ދިފާޢީ ވުޒާރާއާއެވެ.

މި މަސައްކަތް ކުރިއަށްގެންދާގޮތުގެ އެންމެ ފަހުގެ މަޢުލޫމާތު ޕީއެސްއެމް ނިއުސްއާ ޙިއްސާކުރައްވަމުން އެމްއެންޑީއެފްގެ ފަޔަރ އެންޑް ރެސްކިއު ސަރވިސްގެ، ޕްރިންސިޕަލް ޑައިރެކްޓަރ ކާނަލް މުޙައްމަދު ނަދީމް އިބްރާޙިމް ވިދާޅުވީ މަގުތަކުން ފެން ބޮޑުވެ، ނުހިނދި ގިނައިރުވުމުގެ ސަބަބުން ސަރަޙައްދުގެ ގޭގެއަށް ފެންވަދެ ރައްޔިތުންނަށް ބޮޑެތި ދަތިތަކަކާ މިހާރު ކުރިމަތިވަމުންދާކަމަށެވެ.

މާލޭގެ މަގުތަކުގެ ދަތިކަމުގެ ސަބަބުން ސިފައިންނަށް ފެން ހިންދުމުގައިވެސް ބޮޑެތި ދަތިތައް ކުރިމަތިވާކަމަށެވެ. އެގޮތުން ދުރަށް ހޮޅި އަޅަންޖެހުމާ، މަގުތައް ހުރަސްކޮށް ބޮޑެތި ހޮޅި އަޅަންޖެހުމުން އޭގެ ތަކުލީފު ކުރިމަތިވާކަމަށެވެ. މިހާރު ހަދަމުންދާ ނިޒާމުގެ ސަބަބުން، ފެން ހިންދުމުގެ މަސައްކަތް ކުރިއަށްގެންދިއުމުގައި ބޮޑު ފަސޭހައެއް ލިބޭނެކަމަށް އެމްއެންޑީއެފުން ވަނީ ވިދާޅުވެފައެވެ.

"ފެން ހިންދުމުގެ މަސައްކަތް ގެންދަންޖެހޭ ދަތިކަމުގެ ސަބަބުން ތަކެއްޗަށްވެސް ވަރަށް ބޮޑަށް ގެއްލުންވޭ. ނަމަވެސް މި ނިޒާމު ޤާއިމުކުރެވުމުން ރައްކާތެރިކަމާއެކު އެފިޝަންޓްކޮށް ގެންދެވޭނެ" ކާނަލް މުޙައްމަދު ނަދީމް އިބްރާޙިމް ވިދާޅުވިއެވެ.

މި މަސައްކަތުގެ ޢަމަލީ މަސައްކަތް ކުރިއަށްގެންދަނީ ރޯޑް ޑިވެލޮޕްމަންޓް ކޯޕަރޭޝަން، އާރްޑީސީންނެވެ. އާރްޑީސީގެ ޗީފް އިންޖިނިއަރ ބަދީޢު މުޙައްމަދު ވަހީދު ވިދާޅުވީ ފެން ހިންދާ ނިޒާމު 5 ސަރަޙައްދުގައި ޤާއިމުކުރާކަމަށެވެ. ވެސްޓް ޕާކު ސަރަޙައްދުގައި ޢަމަލީ މަސައްކަތް ފަށާފައިވާއިރު، ދެން ހިމެނޭ ސަރަޙައްދުތަކުގެ ޑިޒައިންތައް ފައިނަލްކުރުމުގެ މަސައްކަތް ކުރަމުންދާކަމަށެވެ.

ބަދީޢު ވިދާޅުވީ މި ނިޒާމާއެކު މަދު ގަޑިއިރުކޮޅެއްގެ ތެރޭގައި ފެން ހިންދާލެވޭނެކަމަށެވެ. ވަގުތީ ކާނުތަކުގެ މަސައްކަތް ވީހާވެސް އަވަހަށް ނިންމުމަށް މަސައްކަތް ކުރަމުންދާކަމަށް އާރްޑީސީން ބުނެއެވެ.

"މި ބޮޑެތި ކާނުތަކުގައި ހުންނާނެ ގްރެވިޓީއަށް ފެން ބޭރުވާގޮތަށް. އަދި އެމްއެންޑީއެފުން ޕަމްޕް ޖަހަންޖެހޭ ޙާލަތުގައި މި ނިޒާމާ ޕަމްޕް ގުޅާ، ފަސޭހައިން ފެން ހިންދުން ކުރިއަށްގެންދެވޭނެ." އާރްޑީސީގެ ޗީފް އިންޖިނިއަރ ބަދީޢު މުޙައްމަދު ވަހީދު ވިދާޅުވިއެވެ.

މިހާރު ކުރަމުންދާ މަސައްކަތަކީ ވަގުތީ މަސައްކަތެއް ނަމަވެސް، ދާއިމީ ޙައްލު ގެނައުމަށް މާލޭގެ މަގުތައް ޒަމާނީ ފެންވަރަށް ތަރައްޤީކުރުމަށް ސަރުކާރުން ވަނީ ނިންމާފައެވެ. މި ޕްރޮޖެކްޓްގައި މާލޭގެ ބޮޑެތި ހުރިހާ މަގުތަކުގައި ތާރު އަޅާ ތަރައްޤީކުރުމުގެ މަސައްކަތް ހިމެނެއެވެ.

އިމާރާތްކުރުމާ ބިނާރާ ބެހޭ ވުޒާރާގެ ސްޓޭޓް މިނިސްޓަރ އިބްރާޙިމް ނަޒީމް ވިދާޅުވީ، ސަރުކާރުން ގެންދަން ނިންމާފައިވާ މާލޭގެ މަގު ހެދުމުގެ މަސައްކަތުގައި ފެން ހިންދާ ނިޒާމު ޤާއިމުކުރުމަށް ޚާއްސަ އިސްކަމެއް ދޭނެކަމަށެވެ. މިއީ ރައީސުލްޖުމްހޫރިއްޔާ ވަރަށް ޚާއްސަ އިސްކަމެއް ދެއްވާ މަޝްރޫޢުއެއްކަމަށް ނަޒީމް ވިދާޅުވިއެވެ.

"މިހާރު މި ކުރިއަށްދާ މަސައްކަތްތަކުގެ އަޕްޑޭޓްތައް ރައީސް ކޮންމެ ދުވަހަކު ބައްލަވާ. އަވަސްގޮތެއްގައި މަސައްކަތް ކުރިއަށްގެންގޮސް ނިންމަވާ އަވަހަށް މައްސަލަ ޙައްލުކުރުމަށް އިރުޝާދުދެއްވާފައިވަނީ" އިމާރާތްކުރުމާ ބިނާރާ ބެހޭ ވުޒާރާގެ ސްޓޭޓް މިނިސްޓަރ އިބްރާޙިމް ނަޒީމް ވިދާޅުވިއެވެ.

މާލޭގެ މަގުތައް ހަދާފައިވާގޮތުން ފަސޭހައިން ފެން ބޮޑުވުމުގެ މައްސަލަ ދިމާވެއެވެ. މީގެކުރިންވެސް މަގުތައް ތަރައްޤީކުރުމުގެ މަޝްރޫޢުތައް ގެންދިޔަނަމަވެސް، ފެން ބޮޑުވުމުގެ މައްސަލައަށް ޙައްލެއް އައިސްފައެއް ނެތެވެ. ނަމަވެސް ސަރުކާރުން އަލަށް ފެށުމަށް ނިންމާފައިވާ މަގުހެދުމުގެ މަޝްރޫޢުގައި، މި މައްސަލައަށް ޚާއްސަ އިސްކަމެއް ދޭނެއެވެ.