ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ގެ 20 އަހަރުން ދަށުގެ މުބާރާތުގައި ރާއްޖެ ކުޅުނު ފުރަތަމަ މެޗުގައި ކިރްގިސްތާން އަތުން ސީދާ ތިން ސެޓުން ބަލިވެއްޖެއެވެ.
ސޯޝަލް ސެންޓަރު އެތެރޭ ކޯޓުގައި ކުޅުނު މި މެޗުގެ ސެޓުތައް ކިރްގިސްތާނުން ކާމިޔާބުކޮށްފައިވަނީ 25-11, 25-11 އަދި 25-17 އިންނެވެ. މެޗުގައި ދިވެހި ޓީމުންވެސް ވަނީ ބައެއް ދަނޑިވަޅުތަކުގައި މޮޅަށް ކުޅެފައެވެ. ނަމަވެސް ކިރްގިސްތާނުން ވަނީ ޓީމެއްގެ ސިފައިގައި މޮޅު ކުޅުމެއް ދައްކާފައެވެ.
މެޗު ފަށައިގެން ރާއްޖެއިން ޖެހިޖެހިގެން ތިން ޕޮއިންޓުގެ ލީޑެއް ނެގިއެވެ. ނަމަވެސް ކިރްގިސްތާނުން ވަނީ ގޭމުގެ ތެރެއަށް ވަދެ ރާއްޖެ ކޮޅަށް އަތްގަދަކޮށްފައެވެ. އެގޮތުން ފުލުފުލުގައި ގިނަ ސާވިސްތަކަކުން އެ ޓީމު ޕޮއިންޓު ހޯދިއެވެ. އެއާއެކު މެޗުގެ ފުރަތަމަ ސެޓު ކިރްގިސްތާނުން ކާމިޔާބުކުރީ 25-11 އިންނެވެ.
ފުރަތަމަ ސެޓު ވަރުގަދަކޮށް ފެށި ނަމަވެސް ދެވަނަ ސެޓުގައި ދިވެހިރާއްޖެއިން ފެށީ ދަށްކޮށެވެ. ސެޓުގެ މެދުތެރެއިން ރާއްޖޭގެ މާޔާ ހުސެއިން ސޮލާހްގެ ފަރާތުން މޮޅު ކުޅުމެއް ފެނިގެންދިޔަ ނަމަވެސް ކިރްގިސްތާންގެ އެޓޭކުތައް ވަރުގަދަވުމުގެ ސަބަބުން ދިވެހި ޓީމަށް އުނދަގޫތަކެއް ކުރިމަތިވިއެވެ. ދެވަނަ ސެޓު ކިރްގިސްތާނުން ކާމިޔާބުކުރީ 25-11 އިން ނެވެ.
ރާއްޖެއިން މި މެޗުގައި އެންމެ މޮޅު ކުޅުމެއް ދައްކާފައިވަނީ ތިންވަނަ ސެޓުގައެވެ. މި ސެޓުގައި ވެސް ރާއްޖެ ޓީމުން އެންމެ ރަނގަޅަށް ކުޅުނު އެއް ކުޅުންތެރިޔަކީ މާޔާ އެވެ. އޭނާ ވަނީ ކިރްގިސްތާނުގެ ގިނަ ހަމަލާތަކެއް ހުއްޓުވާފައެވެ. އަދި ރާއްޖެއަށް ގިނަ ޕޮއިންޓުތަކެއް ހޯދަދީފައެވެ. ނަމަވެސް ކިރްގިސްތާނުގެ ހަމަލާތައް ވަރުގަދަވުމުގެ ސަބަބުން މި ސެޓުވެސް ރާއްޖެއަށް ލިބޭގޮތެއް ނުވިއެވެ. މި ސެޓު ކިރްގިސްތާނުން ކާމިޔާބުކުރީ 25-17 އިންނެވެ.
މުބާރާތައި ރާއްޖެ ކުޅޭ ދެވަނަ މެޗުގައި މާދަމާ ހަވީރު ބައްދަލުކުރާނީ ސްރީލަންކާއާއެވެ. އެ މެޗު ފަށާނީ މާދަމާ ހަވީރު 04:00 ގަ އެވެ. އަދި މިރޭ ކުޅޭ މުބާރާތުގެ ދެވަނަ މެޗުގައި ބައްދަލުކުރާނީ ސްރީ ލަންކާ އާއި ނޭޕާލެވެ.