ފަތުރުވެރިންގެ އަދަދު 1.2 މިލިޔަނަށް، މިހާރު ކޮންމެ ދުވަހަކު 6500 ފަތުރުވެރިން އާދޭ

އަހަރުގެ މިހާތަނަށް ރާއްޖެއަށް 1.2 މިލިޔަނަށް ވުރެ ގިނަ ފަތުރުވެރިން ޒިޔާރަތްކޮށްފައިވާކަމަށް ތަފާސްހިސާބުތަކުން ދައްކައިފިއެވެ.

ފަތުރުވެރިކަމާ ބެހޭ ވުޒާރާއިން އެންމެ ފަހުން ނެރެފައިވާ ޑެއިލީ އަޕްޑޭޓްސް ރިޕޯޓުގައިވާގޮތުން މިމަހުގެ 4 ވަނަ ދުވަހުގެ ނިޔަލަށް ރާއްޖެއަށް ވަނީ 1209364 ފަތުރުވެރިން ޒިޔާރަތްކޮށްފައެވެ.

މި އަދަދަކީ މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވާ 1096836 ފަތުރުވެރިންނާއި އަޅާ ބަލާއިރު %10.3 އިތުރު އަދަދެކެވެ.

ވަކިވަކި މަސްމަހު ރާއްޖެ އައި ފަތުރުވެރިންގެ އަދަދު:

• ޖަނަވަރީ – 192385 ފަތުރުވެރިން
• ފެބްރުއަރީ – 217392 ފަތުރުވެރިން
• މާރޗް – 194227 ފަތުރުވެރިން
• އޭޕްރީލް – 168366 ފަތުރުވެރިން
• މޭ – 119875 ފަތުރުވެރިން
• ޖޫން - 123284 ފަތުރުވެރިން
• ޖުލައި – 167528 ފަތުރުވެރިން
• އޮގަސްޓު 4 ވަނަ ދުވަހާ ހަމައަށް – 26307 ފަތުރުވެރިން

ވަކި ވަކި ޤައުމުތަކުން ރާއްޖެއަށް ފަތުރުވެރިން އަންނަ އަދަދުތަކަށް ބަލާއިރު، ބޮޑު ތަފާތަކާއެކު އެންމެ ކުރީގައި އުޅެނީ ޗައިނާއެވެ. ދެވަނައަށް އެންމެ ގިނަ އަދަދަކަށް ފަތުރުވެރިން އަންނަނީ ރަޝިއާއިންނެވެ.

އެންމެ ގިނަ ފަތުރުވެރިން ޒިޔާރަތް ކުރި ޤައުމުތައް:

• ޗައިނާ - 165761 ފަތުރުވެރިން
• ރަޝިއާ - 129445 ފަތުރުވެރިން
• އިނގިރޭސިވިލާތް – 106729 ފަތުރުވެރިން
• އިޓަލީވިލާތް – 88273 ފަތުރުވެރިން
• ޖަރުމަންވިލާތް – 87901 ފަތުރުވެރިން

ފަތުރުވެރިން އަންނަ އަދަދުތަކަށް ބަލާއިރު، މިހާރު ރާއްޖެއަށް އެވްރެޖްކޮށް ކޮންމެ ދުވަހު އަންނަ ފަތުރުވެރިންގެ އަދަދު އުޅެނީ 6577 ގައެވެ. ފާއިތުވި 4 މަހު ރާއްޖެއަށް އެވްރެޖްކޮށް ކޮންމެ ދުވަހަކު އަންނަ ފަތުރުވެރިން އަދަދުތައް ހުރީ 6000 އިން ދަށުގައެވެ.

ސަރުކާރުން މިއަހަރަށް އަމާޒު ހިފާފައިވަނީ 2 މިލިޔަން ފަތުރުވެރިން ގެނެސް ފަތުރުވެރިކަމުގެ އައު ރެކޯޑެއް ހެދުމަށެވެ. އަދި މި އަމާޒު ހާސިލްކުރުމަށްޓަކައި ފަތުރުވެރިކަމާ ބެހޭ ވުޒާރާއިން ދަނީ ސިނާއަތުގައި ހަރަކާތްތެރިވާ ފަރާތްތަކާއި ގުޅިގެން ގިނަ މަސައްކަތްތަކެއް ކުރަމުންނެވެ.