މަޖިލީހުގެ ދައުރު މިމަހުގެ 26ވަނަ ދުވަހާހަމައަށް އިތުރުކޮށްފި

ރައްޔިތުންގެ މަޖިލީހުގެ ހިނގަމުންދާ ދައުރުގެ މުއްދަތު މި މަހުގެ 26 ވަނަ ދުވަހާ ހަމައަށް އިތުރުކޮށްފިއެވެ. މިގޮތަށް ފާސްކޮށްފައިވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާގުންނެވެ.

ރައްޔިތުންގެ މަޖިލީހުގެ މިއަދުގެ ޖަލްސާ ފެއްޓެވުމަށްފަހު މަޖިލީހުގެ ރައީސް ޢަބްދުއްރަހީމް ޢަބްދުﷲ ވިދާޅުވީ، ދައުރުގެ މުއްދަތު އިތުރުކުރުމަށް ނިންމާފައިވަނީ މަޖިލީހުގެ މި ދައުރުގައި ނިންމަންޖެހޭ ބައެއް މަސައްކަތްތައް އަދިވެސް ނުނިމި ހުރުމުން ކަމަށެވެ.

މަޖިލީހުގެ ޤަވާއިދު ބުނާގޮތުން ރައްޔިތުންގެ މަޖިލީހުގެ މިދައުރު ހަމަވާނީ މި މަހުގެ 15 ވާ ބުރާސްފަތި ދުވަހަށެވެ. ނަމަވެސް މިހާރު ގެނައި ބަދަލާއެކު ދައުރު ހަމަވާނީ މި މަހުގެ 26ވާ ހޯމަ ދުވަހަށެވެ.

މަޖިލީހުގައި މިހާރު ކުރިއަށްދާ މަސައްކަތްތަކުގެ ތެރޭގައި ސަރުކާރުން ހުށަހަޅާފައިވާ ގިނަ އަދަދެއްގެ ބިލުތަކުގެ މަސައްކަތް ހިމެނެއެވެ. މި ހިނގާ ދައުރުގެ ތެރޭގައި ސަރުކާރުން ހުށަހެޅި ގިނަ ބިލުތަކެއްގެ މަސައްކަތްވެސް ވަނީ ނިންމާފައެވެ.