ޕޯލިޔޯ ވެކްސިން ކެމްޕޭނަށް ޣައްޒާ ޢުދުވާންތައް ވަގުތީ ގޮތުން މެދުކަނޑައިލަނީ

ފަލަސްޠީނުގެ ޣައްޒާގައި ހަލުވިކަމާ އެކު ނުރައްކާތެރި ބައްޔެއް ކަމުގައިވާ ޕޯލިޔޯ ވައިރަސް ފެތުރުން ކޮންޓްރޯލް ކުރުމަށް ވެކްސިން ޖަހައިދިނުމަށް ކެމްޕޭނެއް ހިންގުމުގެ ގޮތުން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާންތައް ވަގުތީ ގޮތުން މެދުކަނޑައިލަން އެއްބަސްވެއްޖެއެވެ. ޣައްޒާގައި ވަކިވަކި ސަރަޙައްދުތަކުގައި ޢުދުވާން ހިންގުން ތިން ދުވަހުގެ މުއްދަތަކަށް މެދުކަނޑައިލަން ޔަހޫދީ ފައުޖުން އެއްބަސްވެފައިވާ ކަން ހާމަ ކޮށްފައި ވަނީ ދުނިޔޭގެ ޞިއްޙަތު ޖަމުޢިއްޔާ (ޑަބްލިޔުއެޗްއޯ)ންނެވެ.

އެ ޖަމުޢިއްޔާއިން އިސްވެ ހިންގާ ވެކްސިން ކެމްޕޭންގެ ދަށުން ޣައްޒާގައި ދިރިއުޅޭ 640,000 ކުޑަކުދިންނަށް ވެކްސިން ޖަހައިދޭނެއެވެ. ފަލަސްޠީނުގެ ސަރަޙައްދުތަކަށް ކަނޑައަޅާފައި ހުންނަވާ ޑަބްލިޔުއެޗްއޯގެ އިސް އޮފިޝަލް ރިޗަރޑް ޕީޕަރކޯން ވިދާޅުވީ, ޣައްޒާގެ ވިކިވަކި ސަރަޙައްދުތަކުގައި ކޮންމެ ދުވަހަކު ވެސް ހެނދުނު 6ން މެންދުރުފަހު 3އަށް ޢުދުވާން ހިންގުން މެދުކަނޑައިލަން ޔަހޫދީ ފައުޖުން އެއްބަސްވެފައިވާ ކަމުގައެވެ. ކޮންމެ ކުއްޖަކަށް ވެކްސިންގެ ދެ ޑޯޒު ފުރިހަމަ ކޮށްދޭން ޖެހޭތީ, ވެކްސިން ކެމްޕޭން ކުރިއަށް ގެންދާނީ ދެ މަރުހަލާއަކަށް ބަހައިލައިގެންނެވެ.

ޕީޕަރކޯން ވިދާޅުވީ ސެޕްޓެންބަރު 1ވަނަ ދުވަހު ވެކްސިން ކެމްޕޭން ފެށުމަށް ހަމަޖެހިފައި ވަނީ ޣައްޒާގެ މެދުތެރޭގެ ސަރަޙައްދުތަކުގައި ކަމުގައެވެ. ވެކްސިން ކެމްޕޭން ކުރިއަށްގެންދާ ތިން ދުވަހު އެ ސަރަޙައްދުތަކަށް, ކަނޑައަޅާފައިވާ ވަގުތުތަކުގައި ޙަމަލާ ދިނުން މެދުކަނޑައިލަން ޔަހޫދީން ވަނީ އެއްބަސްވެފައެވެ. ޖެހިގެން އޮތް ތިން ދުވަހު, ވެކްސިން ޕުރޮގުރާމު ކުރިއަށް ދާނީ ޣައްޒާގެ ދެކުނުގައެވެ. އަދި, އެއާ ޖެހިގެން އަންނަ ތިން ދުވަހު, ޣައްޒާގެ އުތުރުގެ ސަރަޙައްދުތަކުގައި އެ ޕުރޮގުރާމު ކުރިއަށް ގެންދެވޭނެއެވެ.

"މި ފަދަ ކެމްޕޭންތަކުގެ ތަޖުރިބާއިން އަޅުގަނޑުމެންނަށް އިނގޭ ކަމަކީ, ތިން ދުވަހަށްވުރެ ގިނަ ދުވަހަށް ކޮންމެ ސަރަޙައްދެއްގައި ވެސް ކެމްޕޭން ދިގުދެމިގެން ގޮސްދާނެ ކަން،" އދގެ ސަލާމަތީ މަޖިލީހުގައި ވާހަކަފުޅު ދައްކަވަމުން ޑަބްލިޔުއެޗްއޯގެ ކުއްލި ހާލަތްތަކާ ބެހޭ އިދާރާގެ ޑިރެކްޓަރު މައިކް ރަޔަން ވިދާޅުވިއެވެ. ޕީޕަރކޯން ވިދާޅުވީ, ކޮންމެ ސަރަޙައްދެއްގައި އިތުރު ދުވަހަކަށް ކެމްޕޭން ދެމިގެން ގޮސްފި ނަމަ, އެ ކަމަށް ފުރުޞަތު ދޭން ޔަހޫދީން އެއްބަސްވެފައިވާ ކަމުގައެވެ. ވެކްސިން ކެމްޕޭންގެ ދެވަނަ މަރުޙަލާ ފެށުމަށް ހަމަޖެހިފައި ވަނީ ފުރަތަމަ މަރުޙަލާގެ ހަތަރު ހަފުތާ ފަހުންނެވެ.

"ޕޯލިޔޯ ފެތުރުން ކޮންޓްރޯލް ކުރުމަށް, ޣައްޒާގެ ކުޑަކުދިންގެ އާބާދީގެ 90 އިންސައްތައަށް ވެކްސިން ޖަހައިދޭން ޖެހޭނެ. ބޭރު ޤައުމުތަކަށް ޕޯލިޔޯ ފެތުރުން ކޮންޓްރޯލް ކުރެވޭނީ އެ ކަން ކާމިޔާބު ކޮށްގެން،" ރަޔަން ވިދާޅުވިއެވެ. 25 އަހަރަށް ފަހު ޣައްޒާގައި ޕޯލިޔޯ ޖެހިފައިވާ މީހަކު ފެނިފައިވާ ކަން ޑަބްލިޔުއެޗްއޯން އިޢުލާނު ކޮށްފައި ވަނީ އޮގަސްޓު 23ވަނަ ދުވަހުއެވެ. ބަލި ޖެހިފައި ވަނީ އުމުރުން 11 މަހުގެ ތުއްތު ކުއްޖަކަށެވެ.

"ކެމްޕޭން ކާމިޔާބުކަމާ އެކު ކުރިއަށް ގެންދިޔުމަށް ބޭނުންވާ ހުރިހާ އެހީތެރިކަމެއް ފޯރުކޮށްދޭން އަޅުގަނޑުމެން މި ދަނީ ބައިނަލްއަޤުވާމީ ޖަމުޢިއްޔާތަކާ ގުޅިގެން މަސައްކަތް ކުރަމުން. އަދި, ޣައްޒާގެ އާބާދީގަައި ހިމެނޭ 650,000އެއްހާ ކުޑަކުދިންގެ ސަލާމަތާއި ރައްކާތެރި ކަން ކަށަވަރު ކޮށްދޭން މަސައްކަތް ކުރަމުން،" ޙަމާސްގެ އިސް އޮފިޝަލެއް ކަމުގައިވާ ބިސްމު ނަޢީމް ވިދާޅުވިއެވެ.

ވެކްސިން ޕުރޮގުރާމަށް ފުރިހަމައަށް އެއްބާރުލުން ދިނުމަށް ޔަހޫދީންގެ އެންމެ ބޮޑު މަދަދުގާރު, އެމެރިކާއިން ވެސް ވަނީ އެ މީހުންނަށް ބާރު އަޅާފައެވެ. އދއަށް އެމެރިކާއިން ކަނޑައަޅާފައި ހުންނަވާ ސަފީރުގެ ނައިބު ރޮބަރޓް ވުޑް ވިދާޅުވީ, ވެކްސިން ޕުރޮގުރާމު ކުރިއަށްދާ ދުވަސްވަރު, އެ ކަމުގައި ހަރަކާތްތެރިވާ ޓީމުތަކަށް ޔަހޫދީން އެހީތެރިކަން ފޯރު ކޮށްދިނުމަކީ ވަރަށް މުހިންމު ކަމެއް ކަމުގައެވެ. އެ ޕުރޮގުރާމު ކުރިއަށްދާ ވަގުތުތަކުގައި "ސުލްޙައާއި ހަމަޖެހުން ކަށަވަރުކޮށް އަސްކަރީ ހަރަކާތްތައް ހިންގުން ހުއްޓައިލަން ޖެހޭނެ" ކަމަށް ވިދާޅުވެ, އޭނާ ވަނީ ޣައްޒާގެ ރަށްތައް ހުސްކުރަން އެންގުން މެދުކަނޑައިލުމަށް ވެސް ޔަހޫދީންނަށް ގޮވައިލައްވާފައެވެ.

ޣައްޒާގައި ޕޯލިޔޯ ފެތުރުން ކޮންޓްރޯލް ކުރުމަށް ވެކްސިން ކެމްޕޭނެއް ފެށުމަށް ތައްޔާރުވަމުން މި ދަނީ, ނިކަމެތިކޮށް ހާލުގައި ޖައްސާފައިވާ މީހުންނަށް ކާބޯތަކެއްޗާއި އިންސާނީ އެހީތެރިކަން ފޯރުކޮށްދޭން އދން ކުރަމުންދާ މަސައްކަތްތައް މަޑުޖެހިފައިވާ ދަނޑިވަޅެއްގައެވެ. އެ މަސައްކަތްތަކަށް ހުރަސް އެޅުނީ, ދަޔިރް އަލް-ބަލަޙް ހުރަސް ކުރަން ޔަހޫދީ ފައުޖުން އެންގުމުންނެވެ. އެއާ އެކު, އެ ސަރަޙައްދުގައި ހަރަކާތްތެރިވަމުން ދިޔަ އދއާއި އެހީދޭ ޖަމުޢިއްޔާތަކުގެ ޓީމުތަކަށް ވެސް އިިންސާނިއްޔަތަށް ޓަކައި ކުރަމުން ދިޔަ މަސައްކަތްތައް ހުއްޓައިލުމަށް ފަހު އެ ސަރަޙައްދުން ފައިބަން ޖެހުނެވެ.

އދއާއި އެހީދޭ ޖަމުޢިއްޔާތަކުގެ އޮފީސްތަކާއި ގުދަންތައް ހުންނަ ދަޔިރް އަލް-ބަލަޙަށް އެނބުރި ދިޔުމުގެ ފުރުޞަތު ޔަހޫދީ ފައުޖުން އދގެ ޓީމުތަކަށް ދީފައިވާ ކަމުގައި, އިންސާނީ އެހީގެ ކަންކަން ވިލަރެސް ކުރާ އދގެ އިދާރާއިން ބުންޏެވެ. "އަޅުގަނޑުމެން މި ވަގުތު މި ދަނީ, އެ ސަރަޙައްދުތަކަށް އެނބުރި ދިޔުމަކީ ޓީމުތަކަށް ރައްކާތެރި ކަމެއް ކަން ކަށަވަރު ކުރުމަށް މަސައްކަތް ކުރަމުން،" އެ އިދާރާގެ ވެރިޔާ ޖޮއިސް އެމްސޫޔޯ ވިދާޅުވިއެވެ.

2023 އޮކްޓޫބަރު 7ގައި ޔަހޫދީ ފައުޖުން ފެށި ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 40,602އަށް އުފުލިފައެވެ. އޭގެ ތެރޭގައި 16،000އަށްވުރެ ގިނަ ޢަދަދަކަށް މައުސޫމު ކުޑަކުދިން ހިމެނެއެވެ. އަދި، ޔަހޫދީ ފައުޖުން ސުންނާފަތި ކޮށްލާފައިވާ އިމާރާތްތަކުގެ ދަށުގައި އިތުރު 10،000އަށްވުރެ ގިނަ މީހުންގެ ހަށިތައް ތާށިވެފައިވާ ކަމުގައި ޣައްޒާގެ އޮފިޝަލުން ގަބޫލު ކުރެއެވެ. ޔަހޫދީންގެ ރަޙުމު ކުޑަ ޙަމަލާތަކުގައި ޒަޚަމު ކޮށްލާފައިވާ މީހުންގެ ޢަދަދު ވަނީ 93,855އަށް އުފުލިފައެވެ.