ކުޅުދުއްފުއްޓަށް ދިޔަ 9 ބިދޭސީއަކަށް ނޯޓިސްދީ ބޯޓު ކެޕްޓަނަށް ނަސޭހަތްދީފި

ގަވާއިދާ ޚިލާފަށް މާލޭގައި އުޅެމުންދިޔަ ބިދޭސީންތަކެއް ކުޅުދުއްފުއްޓަށް ދިޔުމުން މޯލްޑިވްސް އިމިގްރޭޝަނަށް ހާޒިރުވުމަށް އަންގާ ނޯޓިސް ދީފިއެވެ. އިމިގްރޭޝަނުން ވިދާޅުވީ، ކުޅުއްދުއްފުއްޓަށް ދިޔަ ބޯޓެއްގައި ތިބި 9 ބިދޭސީއަކަށް ނޯޓިސް ދީފައިވާކަމަށެވެ.

ގަވާއިދާ ޚިލަފަށް އުޅެމުންދާ ބިދޭސީން ހޯދާ އެމީހުން ގަވާއިދާ ފެއްތުމަށްޓަކައި އަދި ގަވާއިދާ ޚިލާފަށް ރާއްޖޭގައި ވިޔަފާރިކުރަމުންދާ ބިދޭސީން ހޯދާ ޑީޕޯޓުކުރުމަށް ސަރުކާރުގެ ތަންފީޒީ އިދާރާތައް ގުޅިގެންދަނީ ބޮޑު އޮޕަރޭޝަނެއް ހިންގަމުންނެވެ.

މި މަސައްކަތް މާލެއާއި އަތޮޅުތަކުގައި ކުރިއަށްގެންދާއިރު މާލެ ސަރަޙައްދުގައި މޯލްޑިވްސް އިމިގްރޭޝަންގެ ފަރާތުންދަނީ ގިނަ ރެއިޑުތަކެއްކޮށް އަމިއްލަ އިޚްތިޔާރުގައި ޤާނޫނުތަކާއި ޚިލާފަށް އުޅެމުންދާ ބިދޭސީން ޑީޕޯޓުކުރަމުންނެވެ. މިއާއެކު ބިދޭސީންތައް މާލެއިން އަތޮޅުތަކަށް ފުރަމުންދާކަމުގެ މަޢުލޫމާތު ލިބެމުންދާކަމަށް ކަމާގުޅޭ އިދާރާތަކުން ވިދާޅުވެއެވެ. އެހެންކަމުން އިމިގްރޭޝަނުންވަނީ އަތޮޅުތަކަށް ފުރާ ބޯޓުތައް ބަލާ ފާސްކުރުމުގެ މަސައްކަތްވެސް ފަށާފައެވެ.

މިގޮތުން ގަވާއިދާ ޚިލާފަށް އުޅޭ ބިދޭސީންތަކެއް އަތޮޅުތެރެއަށް ފުރާކަމުގެ މަޢުލުމާތު ލިބިގެން އިމިގްރޭޝަނުންވަނީ ކުޅުދުއްފުއްޓަށް ދިޔަ ބޯޓެއްގައި ތިބި ބިދޭސީން ބަލާ ފާސްކޮށްފައިކަމަށް އިމިގްރޭޝަނުން ވިދާޅުވެއެވެ.

ކުޅުދުއްފުށި ސިޓީ ކައުންސިލާއި ފުލުހުންނާއި އަދި އިމިގްރޭޝަން ގުޅިގެން ކުރިއަށްގެންދިޔަ މިއޮޕަރޭޝަނުގައި ގަވާއިދާ ޚިލާފަށް ކުޅުދުއްފުއްޓަށް ގޮސްފައިވާ 9 ބިދޭސީއަކަށް، އިމިގްރޭޝަނަށް ހާޒިރުވުމަށް ނޯޓިސް ދީފައިވާކަމަށް އިމިގްރޭޝަނުން ވިދާޅުވެއެވެ.

ގަވާއިދާ ހިލާފަށް އުޅޭ ބިދޭސީން މާލެ ދޫކޮށް ރާއްޖޭގެ އެކި ރަށްރަށަށް ދާކަމުގެ ރިޕޯޓު ލިބެމުންދިއުމާ ގުޅިގެން، މިއަދު ލިބުނު މަޢުލޫމާތަކާއެކު ކުޅުދުއްފުއްޓަށް ދިއަ ބޯޓެއްގައި ތިބި ބިދޭސީން ވަނީ ބަލައި ފާސްކޮށްފައި. މި މަސައްކަތް ކުރިއަށް ގެންގޮސްފައި ވަނީ ކުޅުދުއްފުށީ ސިޓީ… pic.twitter.com/hT6HjgoL9D

— Maldives Immigration (@ImmigrationMV) September 1, 2024

އެންގުމާ އެއްގޮތަށް ޢަމަލުނުކުރާނަމަ މޯލްޑިވްސް އިމިގްރޭޝަންގެ ޤާނޫނުގެ ދަށުން ފިޔަވަޅު އަޅާނެކަމަށް އިމިގްރޭޝަނުން ވިދާޅުވެއެވެ. މީގެއިތުރުން ގަވާއިދާ ޚިލާފަށް އުޅެމުންދާ ބަޔަކު ގޮވައިގެން ދަތުރުކުރި ބޯޓުގެ ކެޕްޓަނަށް އިމިގްރޭޝަނުންވަނީ ލިޔުމުން ނަސޭޙަތްތެރިވެފައެވެ.

ގަވާއިދާ ޚިލާފަށް އުޅޭ ބިދޭސީން އަތޮޅުތަކަށް ދަތުރުކުރަމުންދާ ކަމުގެ މަޢުލޫމާތާއެކު ކުޅުދުއްފުށީ ސިޓީ ކައުންސިލާއި އެސިޓީގެ ފުލުހުންނާއި މޯލްޑިވްސް އިމިގްރޭޝަން ނޯތް ރީޖަނަލް އޮފީހާއި ގުޅިގެންވަނީ ޚާއްސަ މަސައްކަތްތަކެއް ފައްޓަވާފައެވެ. އެގޮތުން މާލެއިން އެސިޓީއަށް ދަތުރުކުރާ ބޯޓުތަކުން އެފަދަ ބިދޭސީން އެތެރެވުން ހުއްޓުވުމަށް މަސައްކަތްތަކެއްވަނީ ފަށާފައެވެ.

ބިދޭސީންގެ މައްސަލަ ޙައްލުކުރުމަށް މުޅި ރާއްޖޭގައި ކުރިއަށްގެންދާ މަސައްކަތުގެ ދަށުން މޯލްޑިވްސް އިމިގްރޭޝަންގެ ނޮދަންއޭރިއާ އޮފީހުންވަނީ އެސަރަޙައްދުގައި ގަވާއިދާ ޚިލާފަށް އުޅެމުންދާ ބިދޭސިންގެ މަޢުލޫމާތު "އިމިގްރޭޝަން ވޮޗް" މެދުވެރިކޮށް ހިއްސާކުރުމަށް އުތުރުގެ ރައްޔިތުންނަށް އިލްތިމާސްކުރައްވާފައެވެ.

މި އޮޕަރޭޝަންތަކުގައި ޢާއްމުގެ ފަރާތުން ލިބެމުންދާ އެހީތެރިކަމާ އެއްބާރުލުން އިމިގްރޭޝަނުން ފާހަގަކުރައްވައެވެ. މިގޮތުން ސޯޝަލް މީޑިއާ މެދުވެރިކޮށް ޢާއްމުން ކުރަމުންދާ ޕޯސްޓްތަކާއެކުވެސް ގަވާއިދާ ޚިލާފަށް ހުރި ތަންތަން ބަލާފާސްކުރުމުގެ މަސައްކަތް އިމިގްރޭޝަނުން ދަނީ ކުރައްވަމުންނެވެ.