ރެޑްބުލް ހާފްކޯޓް ވޯލްޑް ފައިނަލް: މޮލްޑޯވާ އަތުން ރާއްޖޭގެ ޗެމްޕިއަން އަންރޭންކްޑް މޮޅުވެއްޖެ

އެމެރިކާގެ ނިއު ޔޯކް ސިޓީގައި މިހާރު ކުރިއަށްދާ ރެޑް ބުލް ހާފް ކޯޓް ވޯލްޑް ފައިނަލްސްގައި ރާއްޖޭގެ ޗެމްޕިއަން އަންރޭންކްޑް ކުޅުނު ތިން މެޗުގެ ތެރެއިން މޮލްޑޯވާގެ ޗެމްޕިއަން ގްލޯރިއާ ބަލިކޮށްފިއެވެ.

ރާއްޖޭގައި ކުރިއަށްދިޔަ ކޮލިފައިން ރައުންޑް ކާމިޔާބުކޮށް އަންރޭންކްޑު މިފަހަރުގެ ވޯލްޑް ފައިނަލްސްގައި ވާދަކުރާއިރު, ރާއްޖެ ލައްވާލީ މޮލްޑޯވާގެ އިތުރުން އެމެރިކާ, އަދި ބެލްޖިއަމްއާއި އެއް ގްރޫޕެއްގައެވެ.

ރާއްޖޭގެ ޓީމު ކުޅުނު ފުރަތަމަ މެޗުގައި މޮލްޑޯވާ ގްލޯރިއާގެ މައްޗަށް ކުރިހޯދީ 12-08 އިންނެވެ. ދެވަނަ މެޗުގައި ބެލްޖިއަމްގެ ބަކެޓްސް އަތުން ބަލިވީ 21-04 އިންނެވެ. އަދި ތިންވަނަ މެޗުގައި އެމެރިކާގެ ޗެމްޕިއަން އަތުން ބަލިވީ 21-07 ގެ ނަތީޖާއަކުންނެވެ.

މިދިޔަ އަހަރު ސާބިއާގައި ބޭއްވި ރެޑްބުލް ހާފް ކޯޓު މުބާރާތުގައިވެސް ރާއްޖެ ތަމްސީލުކޮށްފައިވަނީ އަންރޭންކްޑް އެވެ. އެއީ މިދިޔަ އަހަރުވެސް ރާއްޖޭގެ ޗެމްޕިއަންކަން ހޯދައިގެންނެވެ.

ރެޑް ބުލް ހާފް ކޯޓް ވޯލްޑް ޓުއާގައި މިއަހަރު 20 ގައުމަކުން 6500 އަށްވުރެ ގިނަ ކުޅުންތެރިން ވާދަކުރެއެވެ. މީގެތެރޭގައި ދުނިޔޭގެ ބާސްކެޓުގައި ވަރުގަދަ ޔޫރަޕުގެ ގައުމުތައް ހިމެނެއެވެ.