ބްރެޑްލީ ބާކޯލާގެ އެހީއާއެކު ސްޓްރާސްބޯގް 4-2 އިން ބަލިކޮށް، ޕީއެސްޖީން ތާވަލްގެ އެއްވަނަ އަށް ޖެހިލައިފިއެވެ.
މި ނަތީޖާއާއެކު ޕީއެސްޖީ އެއްވަނައިގައި އޮތީ ފައިދާގޯލްގެ ތަފާތުންނެވެ. ޕީއެސްޖީގެ އިތުރުން ދެވަނައިގައި އުޅޭ މޮނާކޯ އަށް ވެސް މިހާތަނަށް ކުޅުނު އަށް މެޗުން ލިބިފައިވަނީ 20 ޕޮއިންޓެވެ. ތިނެއްގައި އޮތް އޮލިމްޕިކް މާސޭ އަށް ހަތް މެޗުން ލިބިފައިވަނީ 14 ޕޮއިންޓެވެ. އެއްމެޗު އިތުރަށް ކުޅެގެން ލަނޑުގެ ތަފާތުން ހަތަރުވަނައިގައި އޮތީ ލިއްލެއެވެ.
ޕީއެސްޖީން ރޭގެ މެޗަށް ނިކުތްއިރު އާއްމުކޮށް ކުޅޭ ފުރަތަމަ އެގާރަ އަށް ވަނީ ބަދަލުތަކެއް ގެނެސްފައެވެ. އެގޮތުން، ރޭގެ މެޗުގައި ޒުވާން މިޑްފީލްޑަރު، ސެނީ މަޔޫލޫ ފުރަތަމަ އެގާރައިގައި ހިމަނާފައިވާއިރު، އެ ޓީމުގެ ކެޕްޓަން، މާކީނޯސް އާއި ވިންގް، އޮސްމާނޭ ޑެމްބެލޭ މެޗު ފެށީ ބެންޗުންނެވެ. އަނިޔާގެ ސަބަބުން އެ ޓީމުގެ ފްރާންސް ފޯވާޑް، ރަންޑަލް ކޯލޯ މުއާނީ ރޭގެ މެޗުގައި ނުކުޅެއެވެ.
ޕާކް ޑެސް ޕްރިންސެސްގައި ރޭ ކުޅުނު މި މެޗުގެ 18 ވަނަ މިނެޓުގައި ޕީއެސްޖީން ލީޑްނެގީ ޒުވާން މިޑްފީލްޑަރު، މަޔޫލޫ ވައްދާލި ލަނޑުންނެވެ. އޭނާ މި ލަނޑުޖެހީ ބާކޯލާ ދިން ޕާހަކުންނެވެ. މިއީ ޕީއެސްޖީގެ ފުރަތަމަ އެގާރައިގައި ހިމެނިގެން މަޔޫލޫ ކުޅުނު ފުރަތަމަ މެޗެވެ. އޭގެކުރީން، އޭނާ ވަނީ ބަދަލު ކުޅުންތެރިއެއްގެ ގޮތުގައި ހަތަރު މެޗު ކުޅެފައެވެ.
ދެވަނަ ހާފުގެ ކުޅުން ފެށިތާ ދެ މިނެޓުގެ ތެރޭގައި ޕީއެސްޖީގެ ދެވަނަ ލަނޑުޖަހައިދިނީ މާކޯ އަސެންސިއޯ އެވެ. ޕީއެސްޖީން ލީޑް ފުޅާކުރިތާ 11 ވަރަކަށް މިނެޓުފަހުން، ސްޓްރާސްބޯގުގެ ފުރަތަމަ ލަނޑުޖަހައިދިނީ ސެކޫ މާރާ އެވެ. އޭގެފަހުން، މެޗުގެ 66 ވަނަ މިނެޓުގައި ބާކޯލާ ވަނީ ޕީއެސްޖީގެ ދެލަނޑުގެ ލީޑް ދަމަހައްޓައިދީފައެވެ.
މެޗުގެ އެންމެ ފަހު މިނެޓުގައި ޕީއެސްޖީގެ ހަތަރުވަނަ ލަނޑު، ދެކުނު ކޮރެއާގެ ފޯވާޑް، ލީ ކަންގް-އިން ކާމިޔާބުކޮށްދީފައިވަނިކޮށް، އިތުރުވަގުތުގެ ތެރޭގައި ސްޓްރާސްބޯގުން ވަނީ ޕީއެސްޖީގެ ޑިފެންސަށް ހެދުނު ގޯހެއްގެ ފައިދާނަގައި، ގޯލެއްޖަހައިފައެވެ. މި ލަނޑު އެ ޓީމަށް ޖަހައިދިނީ ސެނެގޯލްގެ ޒުވާން މިޑްފީލްޑަރު، ޕާޕޭ ޑިއޮންގް އެވެ.
ލީގުގައި ޕީއެސްޖީ ދެން ކުޅޭ މެޗުގައި މި މަހުގެ 28 ވާ ހޯމަ ދުވަހު ރަށުން ބޭރުގައި ނިކުންނާނީ މާސޭއާ ދެކޮޅަށެވެ. އޭގެކުރީން، އެ ޓީމަށް އޮތީ ޔުއެފާ ޗެމްޕިއަންސް ލީގުގައި މި ހަފްތާގެ ބުދަ ދުވަހު އަމިއްލަ ދަނޑުގައި ހޮލެންޑްގެ ޕީއެސްވީ އެއިންދޯވަންއާ ބައްދަލުކުރާ މެޗެވެ.