އަންވަރު ވަކިކުރަން ނިންމީ ހޭންޑްބޯލް މޯލްޑިވްސްގެ ހިންގާ ކޮމިޓީން، ޑިސިޕްލިނަރީ ކޮމިޓީން މައްސަލަ ބަލާނެ
ހޭންޑްބޯލް މޯލްޑިވްސްގެ ޖެނެރަލް ސެކްރެޓަރީގެ މަގާމުން އަބްދުﷲ އަންވަރު ވަކިކޮށްފައި ވަނީ ހިންގާ ކޮމިޓީން ބެލުމަށްފަހު ކަމަށް އެ އެސޯސިއޭޝަނުން ބުނެފިއެވެ.
މައުލޫމާތު ލިބޭގޮތުގައި އަންވަރު މަގާމުން ވަކިކުރީ ފައިސާއާ ބެހޭ ޚިޔާނާތުގެ މައްސަލައެއްގައެވެ.
ހޭންޑްބޯލް މޯލްޑިވްސްގެ ހިންގާ ކޮމިޓީގެ ބައްދަލުވުމެއް ބޭއްވުމަށްފަހު، އަންވަރު މަގާމުން ވަކިކުރަން ނިންމާފައިވަނީ މީގެ ހަ ދުވަސް ކުރިންނެވެ. މިކަމާ ގުޅޭ ގޮތުން "ޕީއެސްއެމް ސްޕޯޓްސް" އާ ވާހަކަދައްކަވަމުން ހޭންޑްބޯލް މޯލްޑިވްސްގެ ރައީސް އަޙްމަދު މުޖުތަބާ (މުޖޭ) ވިދާޅުވީ އެ އެސޯސިއޭޝަންގެ ޑިސިޕްލިނަރީ ކޮމިޓީން މައްސަލަ އިތުރަށް ބަލަމުންދާ ކަމަށެވެ.
މައުލޫމާތު ލިބޭ ގޮތުގައި އަންވަރާ ގުޅޭގޮތުން ތުހުމަތުކުރެވޭ ޚިޔާނާތުގެ މައްސަލައިގައި އެ އެސޯސިއޭޝަނުން ފިޔަވަޅު އަޅާފައިވަނީ ހެކިވެސް ހޯދުމަށްފަހުއެވެ. އަދި އެސޯސިއޭޝަންގެ އިތުބާރު ހިފޭ މަގާމެއްގައި ހުރެ، އެ ފަދަ އަމަލެއް ކޮށްފައިވާތީ ވަގުތުން ވަގުތަށް ފިޔަވަޅު އަޅައި، އެސޯސިއޭޝަން ހިންގުމުގައި ކަންކަން ރަނގަޅު ކުރަން ވަނީ އިސްނަގާފައެވެ.
ހޭންޑްބޯލް މޯލްޑިވްސްގެ ޖެނެރަލް ސެކްރެޓަރީގެ ޚިޔާނާތުގެ މައްސަލައެއް ފެންމަތިވިއިރު، މި ފަހުން ބޭއްވި މޯލްޑިވްސް ސްޕޯޓްސް އެވޯޑްސް 2024 ގައި ވަނީ އަހަރުގެ އެންމެ މޮޅު އެސޯސިއޭޝަނަކަށް ހޭންޑްބޯލް މޯލްޑިވްސް ހޮވިފައެވެ.