އިޓާލިއަން ލީގުގައި ރޭ ލައުޓާރޯ މާޓިނޭޒް ކާމިޔާބުކުރި ލަނޑާއެކު ރަށުން ބޭރުގައި އޭއެސް ރޯމާ އަތުން 0-1 ގެ ނަތީޖާއަކުން އިންޓަރ މިލާން މޮޅުވެއްޖެއެވެ.
މި ނަތީޖާއާއެކު އިންޓަ ވަނީ ތާވަލްގެ އެންމެ ކުރީގައި އުޅޭ ނާޕޮލީއާ ދެމެދު އޮތް ފަރަގު ދެ ޕޮއިންޓަށް ކުޑަކޮށްފައެވެ. ނާޕޮލީ އަށް މިހާތަނަށް ކުޅުނު އަށް މެޗުން 19 ޕޮއިންޓް ލިބިފައިވާއިރު، އިންޓަ ދެވަނައިގައި އޮތީ 17 ޕޮއިންޓް ހޯދައިގެންނެވެ. ތިންވަނައިގައި އޮތް ޔުވެންޓަސް އަށް ލިބިފައިވަނީ 16 ޕޮއިންޓެވެ. އޭސީ މިލާން އޮތީ އަށް މެޗުން ލިބުނު 14 ޕޮއިންޓާއެކު ހަތަރުވަނައިގައެވެ.
އޮލިމްޕިކް ސްޓޭޑިއަމްގައި ރޭ ކުޅުނު މި މެޗުގެ ފުރަތަމަ ހާފުގައި އިންޓަ އާއި ރޯމާ އަށް ވެސް ގޯލެއް ކާމިޔާބުކުރެވިފައިނުވާއިރު، މި ހާފުގައި ދެ ޓީމުގެ ގޯލްކީޕަރުން ވެސް ވަނީ މުހިއްމު ސޭވްތަކެއް ކޮށްފައެވެ. ފުރަތަމަ ހާފުގެ ކުރީކޮޅު އިންޓަގެ ތުރުކީ މިޑްފީލްޑަރު، ހަކާން ޗައަނޮގްލޫ އަށް ލިބުނު އަނިޔާއަކާ ގުޅިގެން ބަދަލުކޮށްފައިވާއިރު، އޭގެކުޑައިރުކޮޅެއްފަހުން އެ ޓީމުގެ އިޓަލީ ޑިފެންޑަރު، ފްރާންޗެސްކޯ އަޗޭބީ ވެސް ވަނީ އަނިޔާވެގެން ބަދަލުކޮށްފައެވެ.
މެޗުގެ 60 ވަނަ މިނެޓުގައި އިންޓަގެ ލަނޑުޖަހައިދިނީ ކެޕްޓަން، ލަޓާރޯ މާޓިނޭޒް އެވެ. މިއީ ޕެނަލްޓީއޭރިޔާ ރޮނގުކައިރިން ކޮންޓްރޯލްކޮށްލުމަށްފަހު ފޮނުވާލި ހަމަލާއަކުން މާޓިނޭޒް ކާމިޔާބުކުރި ގޯލެކެވެ. މިއީ ހުރިހާ މުބާރާތެއްގައި އިންޓަ އަށް އޭނާ ޖަހައިދިން 133 ވަނަ ގޯލެވެ. މިއާއެކު، މާޓިނޭޒް ވަނީ އިންޓަ އަށް މިހާތަނަށް އެންމެ ގިނަ ލަނޑުޖަހައިދިން ބިދޭސީ ކުޅުންތެރިޔާ ކަމަށްވާ، ހަންގޭރީގެ އިސްތަވާން ނިޔާސްގެ ރެކޯޑާ އެއްވަރުކޮށްފައެވެ. އަދި، މިއީ މި ފަހަރުގެ ސީޒަނުގެ ލީގުގައި އޭނާ ޖެހި ތިންވަނަ ލަނޑެވެ.
އޭގެފަހުން، އިންޓަގެ ލީޑް ފުޅާކޮށްދޭން ޑެންޒެލް ޑަމްފްރީސް ފޮނުވާލި ހަމަލާއެއް ރޯމާގެ ކީޕަރު، މިލޭ ސްވިލާ ހުއްޓުވިއިރު، މެޗު ނިމެންދަނިކޮށް ރޯމާ އަށް އެއްވަރުކޮށްދޭން މަޓިއަސް ސޫލޭ ފޮނުވާލި ބޯޅަ އިންޓަގެ ކީޕަރު، ޔަން ސޮމާ ވަނީ މަތަކޮށްފައެވެ.
މި މެޗުން ބަލިވި ރޯމާ އޮތީ 10 ޕޮއިންޓާއެކު ތާވަލްގެ 10 ވަނައިގައެވެ. އެ ޓީމު އެންމެ ފަހުން ކުޅުނު ފަސް މެޗުގެ ތެރެއިން ތިން މެޗު ނިންމާލަންޖެހުނީ މޮޅެއް ނުލިބިއެވެ. އޭގެތެރެއިން ދެ މެޗުން އެއްވަރުވިއިރު، އަނެއް މެޗުން ވަނީ ބަލިވެފައެވެ. މޮޅުވީ އެންމެ ދެ މެޗުންނެވެ.
ލީގުގައި ރޯމާ އަށް ދެން އޮތީ މި މަހުގެ 28 ވަނަ ދުވަހު ރަށުން ބޭރުގައި ފިއޮރެންޓީނާއާ ބައްދަލުކުރާ މެޗެވެ. އޭގެ އެއްދުވަސް ކުރީން، ލީގުގައި އަމިއްލަ ދަނޑުގައި އިންޓަ ނިކުންނާނީ ވާދަވެރި ޔުވެންޓަސްއާ ދެކޮޅަށެވެ.