މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ)ގެ އަސާސީ ގަވާއިދަށް ފަސް ބަދަލެއް ގެނައުމަށް ފާސްކޮށްފިއެވެ.
އެމްބީއޭ އިން މި ބަދަލުތައް ގެނައުމަށް ފާސްކޮށްފައިވަނީ އެކްސްޓްރާ އޯޑިނަރީ ކޮންގްރެސްގައެވެ. މި ކޮންގްރެސްގައި ހިންގާ ގަވާއިދަށް ބަދަލުތަކެއް ގެނައުމަށް ފާސްކޮށްފައިވަނީ ހާޒިރުވި ފުރިހަމަ މެންބަރުން ކަމަށްވާ 19 މެންބަރުންގެ ތެރެއިން 17 މެންބަރުންގެ ތާއިދާއިއެކު އެވެ. އެމްބީއޭގެ ފުރިހަމަ މެންބަރުންގެ ޖުމްލަ އަދަދަކީ 20 އެވެ.
އެމްބީއޭ އިން ބޭއްވި އެކްސްޓްރާ އޯޑިނަރީ ކޮންގްރެސްގަ ހިންގާ ގަވާއިދަށް ގެނެވުނު ބަދަލުތަކުގެ ތެރޭގައި އެސޯސިއޭޝަންގެ ކޮމިޓީތަކުގެ އޮނިގަނޑު ބަދަލުތަކެއް ގެނައުމާއި،
އެސޯސިއޭޝަންގެ ހިންގުން ފަސޭހަ ކުރުމުގެ ގޮތުން އިތުރު ދާއިމީ ކޮމިޓީއެއް އުފެއްދުމާއި، އެސޯސިއޭޝަންގެ މެންބަރުންގެ ގިންތިތަކަށް ބަދަލު ތަކެއް ގެނެވި އާ ގިންތި އުފެދުން ހިމެނެއެވެ.
މީގެއިތުރުން އެސޯސިއޭޝަންގެ ފުރިހަމަ މެންބަރެއްގެ ހައިސިއްޔަތު ލިބޭނެގޮތް އަދި އެއަށް އަމަލުކުރުމަށް ހަތަރު އަހަރުގެ ގްރޭސް ޕީރިއަޑެއް ހިމެނުން ހިމެނެއެވެ. އަދި އެ މާއްދާ އެކްޓިވް ވަންދެއް އަމަލު ކުރަމުންދާނީ މިހާރު ވެސް އަމަލުކުރަމުންދާ ގޮތަށް ކަމަށްވެސް ވަނީ ފާސްކޮށްފައެވެ.
އަސާސީ ގަވާއިދަށް މި ބަދަލުތައް ގެންނަން އިއުލާނުކުރެވުނީ، މިި މަހުގެ ތިންވަނަ ދުވަހު ކަމަށް އެމްބީއޭއިން މައުލޫމާތުދެއެވެ. އަދިހިޔާލާއި ލަފާ ހުށަހެޅުމަށް ދެވުނު ފުރުސަތުގައި، އެކަމަށް އެކަށީގެންވާ އެއްބާރުލުމެއް ނުލިބޭތީ، މި މަހުގެ 14 އާއި 15 ވަނަ ދުވަހު، މި ގަވާއިދުތަކާ ބެހޭގޮތުން، މައުލޫމާތު ސެޝަންތަކެއް މެމްބަރުންނަށް ބޭއްވިގެންދިޔަ އެވެ.
މި ބައްދަލުވުންތަކަށް ފުރިހަމަ މެމްބަރު ކްލަބްތަކުގެ ތެރެއިން، 14 ފަރާތެއް ހާޒިރުވިއެވެ. އަދި އެ ބައްދަލުވުމުގެ ތެރެއިން ހުށަހެޅުނު ކަންކަމަށް ބެލުމަށްފަހު ބަދަލުތަކެއް ގެނެސްފައިވާނެ ކަމަށް އެމްބީއޭއިން މައުލޫމާތުދެއެވެ.