ދުންފަތް ކޮންޓްރޯލުކުރުމާބެހޭ ޤާނޫނުގެ ދަށުން ހަދަންޖެހޭ ޤަވާއިދުތައް ހެދުމަށް މަޝްވަރާކުރަން ފަށައިފި

ދުންފަތް ކޮންޓްރޯލުކުރުމާބެހޭ ޤާނޫނުގެ ދަށުން ހަދަންޖެހޭ ޤަވާއިދުތައް ހެދުމަށްޓަކައި ގުޅުންހުރި ފަރާތްތަކާއެކު މަޝްވަރާ ކުރަން ފަށައިފިއެވެ.

މިއީ ހެލްތު ޕްރޮޓެކްޝަން އެޖެންސީއާއި ދުންފަތް ކޮންޓްރޯލް ކުރުމަށް މަސައްކަތްކުރާ މަދަނީ ޖަމްޢިއްޔާއެއް ކަމަށްވާ މޯލްޑިވްސް ފެމިލީ ފައުންޑޭޝަނާ ގުޅިގެން ފެށި މަޝްވަރާ ބައްދަލުވުމެކެވެ.

މި މަޝްވަރާ ބައްދަލުވުމުގައި މައިގަނޑު ގޮތެއްގައި މަޝްވަރާކުރުމަށް ހަމަޖެހިފައިވަނީ ދުންފަތް ކޮންޓްރޯލް ކުރުމާބެހޭ ޤާނޫނުގައި ބަޔާންކުރާ ޙައްޤުތަކާ ޒިންމާތައް ކަށަވަރުކުރުމުގެ ގޮތުން އެ ޤާނޫނު ތަންފީޒުކުރުމަށް ހަދަންޖެހޭ ޤަވައިދުތަކުގެ ތެރެއިން "ދުންފަތުގެ ބާވަތްތައް އިޝްތިހާރު ކުރުމާބެހޭ ޤަވާޢިދު" އަދި "ދުންފަތުގެ ބާވަތްތަކުން ވިޔަފާރީގެ މުޢާމަލާތް ކުރުމާބެހޭ ޤަވާޢިދު" އެކުލަވާލުމާއި ގުޅޭގޮތުންނެވެ.

"ދުންފަތުގެ ބާވަތްތައް އިޝްތިހާރު ކުރުން މަނާ ކުރުމާބެހޭ ޤަވާޢިދު" އަކީ ދިވެހިރާއްޖޭގައި ދުންފަތުގެ ބާވަތްތައް އިޝްތިހާރުކުރުން މަނާކުރުމަށްޓަކައި، ދުންފަތް ކޮންޓްރޯލުކުރުމާބެހޭ ޤާނޫނުގެ 37 ވަނަ މާއްދާގެ (ހ) ގެ 2 ވަނަ ނަންބަރުގެ ދަށުން އެކުލަވާލާފައިވާ ޤަވާޢިދެކެވެ. މި ޤަވާޢިދުގެ މައިގަނޑު މަޤްޞަދަކީ ޤާނޫނާ ޚިލާފަށް އެކި ގޮތްގޮތުން ދުންފަތުގެ ބާވަތްތަކާއި ދުންފަތުގެ ވިޔަފާރިއާއި ދުންފަތުގެ އިސްތިޢުމާލުކުރުން ޕްރޮމޯޓްކޮށް އިޝްތިހާރު ކުރުމަށް ކުރަމުންދާ ކަންކަން ހުއްޓުވައި ދުންފަތުގެ އިސްތިޢުމާލުކުރުން މަދުކޮށް، ޢާންމު ޞިއްޙަތު ރައްކާތެރި ކުރުމެވެ.

"ދުންފަތުގެ ބާވަތްތަކުން ވިޔަފާރީގެ މުޢާމަލާތް ކުރުމާބެހޭ ޤަވާޢިދު" އަކީ ދުންފަތުގެ ބާވަތްތަކުން ވިޔަފާރީގެ މުޢާމަލާތް ކުރުމުގެ ހުއްދަ ދޫކުރުމާއި، އެފަދަ ވިޔަފާރި ތަކުން ޢަމަލުކުރަންޖެހޭނެކަމަށް ޤާނޫނުގައި ކަނޑައަޅާފައިވާކަންތައް ތަންފީޒުކޮށް ދުންފަތުގެ ސަޕްލައި ކޮންޓްރޯލްކޮށް އަދި ވިޔަފާރީގެ ޢަމަލުތައް މޮނިޓަރ ކުރެވޭނެ އުޞޫލުތަށް ކަނޑައަޅައި ބަޔާންކުރުމެވެ.

މި ބައްދަލުވުމުގެ މައިގަނޑު މަޤްޞަދަކީ، މި ޤަވާޢިދުތައް ދިވެހި ސަރުކާރުގެ ގެޒެޓުގައި ޝާއިޢުކުރުމުގެ ކުރިން، މިކަމާ ގުޅުންހުރި ދައުލަތުގެ މުއައްސަސާތަކާއި މަޞްލަޙަތު ހިމެނޭ އެހެނިހެން ފަރާތްތަކުގެ ޚިޔާލާއި މަޝްވަރާ ހޯދުމެވެ. މީގެ އިތުރުން، ޤަވާޢިދު އިތުރަށް ފުރިހަމަ ކުރުމަށާއި ތަންފީޛު ކުރުމުގައި އެ ފަރާތްތަކުގެ އެއްބާރުލުމާއި ބައިވެރިވުން ހޯދުމަކީވެސް މި ބައްދަލުވުމުގެ މުހިންމު އަމާޒެކެވެ. މި ބައްދަލުވުމުގައި ދައުލަތުގެ ކަމާބެހޭ މުއައްސަސާތަކާއި މަދަނީ ޖަމްޢިއްޔާ ޖަމާޢަތްތައް ހިމެނޭހެން ގާތްގަނޑަކަށް 50 ފަރާތަކުން ބައިވެރިވެފައިވާކަމަށް އެޗްޕީއޭއިން ވިދާޅުވެއެވެ.

މި ދެ ޤަވައިދު ގެޒެޓްކޮށް ތަންފީޒުކުރަން ފެށުމަކީ، ޤާނޫނުގެ މުޅި މަޤްޞަދު ޙާޞިލުކުރުމަށް ސަރުކާރުން މިހާރު ފަށާފައިވާ މަސައްކަތްތަކަށް އަދި ދުންފަތުގެ ވަބާއިން ދިވެހިން ރައްކާތެރކުރުމަށް ކުރާ މަސައްކަތަށް އިތުރުކުރިއެރުން ލިބޭނެކަމެއްކަމަށްވެސް އެ އެޖެންސީން ވިދާޅުވެއެވެ.

ދުންފަތް ކޮންޓްރޯލް ކުރުމާބެހޭ ޤާނޫނަށް އިސްލާހު ގެނައުމަށް ސަރުކާރުގެ ފަރާތުން ބިލެއް ވަނީ ހުށައަޅާފައެވެ. ދުންފަތް ކޮންޓްރޯލް ކުރުމާބެހޭ ޤާނޫނަށް ހުށަހަޅާފައިވާ އިސްލާހުގެ ދަށުން ދުންފަތުގެ ބާވަތްތައް 21 އަހަރުން ދަށުގެ އެއްވެސް މީހަކަށް ވިއްކުމާއި އެފަދަ އުފެއްދުމެއް ވިއްކުމުގައި ބައިވެރިކުރުވުމަކީވެސް މަނާކަމެކެވެ. އަދި އެކަން އެނގޭގޮތަށް އެފަދަ ތަކެތި ވިއްކާ ތަންތަނުގައި އިންޒާރު ހަރުކުރަންވެސް މި އިސްލާހުގައިވަނީ ހިމަނުއްވާފައެވެ. މިހާރު ދުންފަތުގެ އުފެއްދުންތައް ވިއްކޭނެ އެންމެ ހަގު އުމުރަކީ 18 އަހަރެވެ.

މި އިސްލާހުގެ ދަށުން ދުންފަތުގެ ބާވަތްތައް ރާއްޖޭގައި އިޝްތިހާރުކުރުމާއި އެތަކެތި އާންމުންނަށް ފެންނާނެހެން ބެހެއްޓުމާއި އާންމުންނަށް ފެންނާނެހެން އެއްތަނުން އަނެއްތަނަށް އުފުލުންވެސް މަނާވާނެއެވެ. އަދި ރާއްޖޭގައި ދުންފަތް އުފެއްދުމާއި ދުންފަތުގެ އެއްވެސް ބާވަތެއް އުފެއްދުންވެސް މަނާވާނެއެވެ.