ރަށްރަށުން ކުނި ބޭރުކުރުމަށް ބޮޑު މަޝްރޫޢެއް ވެމްކޯއިން ފަށަނީ

ރާއްޖޭގެ މީހުން ދިރިއުޅޭ ހުރިހާ ރަށަކުން ކުނި ބޭރުކުރުމުގެ ބޮޑު މަޝްރޫޢެއް އަންނަ މަހު ފެށުމަށް، ވޭސްޓް މެނޭޖްމަންޓް ކޯޕަރޭޝަން، ވެމްކޯއިން ތައްޔާރުވެއްޖެއެވެ. ގިނަ ރަށްރަށުގައި ކުނި މެނޭޖުކުރެވޭނެ ރަނގަޅު ނިޒާމެއް ނެތުމާއެކު ކުނި ބޭރުކުރުން ވެފައިވަނީ މާލީ ގޮތުން ބޮޑު ބުރައަކަށެވެ.

ރާއްޖޭގެ ހުރިހާ ރަށަކަށްވެސް ދިމާވެފައިވާ އެންމެ ބޮޑު އެއް މައްސަލައަކީ ދެމެހެއްޓެނިވިގޮތެއްގައި ކުނި މެނޭޖްކުރެވޭނެ ނިޒާމެއް ނެތުމެވެ. އަދި ކުނި މެނޭޖްކުރުމަށް ބޭނުންވާ މާލީ ފޯރުންތެރިކަން ނެތުމާއި، ރަށުގައި އުފެދޭ ކުނި ނައްތާލެވޭނެ ރަނގަޅު ނިޒާމެއް ނެތުމަކީވެސް ކައުންސިލްތަކަށް ދިމާވެފައިވާ ދައްޗެކެވެ.

އެހެންކަމުން ރާއްޖޭގެ ކުނި މެނޭޖްކުރުމުގެ ޚިދުމަތް ދެމުން އަންނަ ވެމްކޯގެ އެހީތެރިކަމަށް ގިނަ ކައުންސިލްތަކަކުންދަނީ އެދެމުންނެވެ. ރަށްރަށުގައި ގިނަ ދުވަސްވީ ކުނި، ރަށުން ބޭރުކުރުމަށާއި، ރަށްރަށުގައި ކުނި ނަގައިދީ މެނޭޖްކުރުމުގެ ޚިދުމަތް ދިނުމަށް އެދި ގިނަ ކައުންސިލްތަކަކުން އެދެމުންދާކަން ވެމްކޯއިން ފާހަގަކުރައްވައެވެ.

ޕީއެސްއެމްނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން ވެމްކޯގެ ބިޒްނަސް ޑިވެލޮޕްމަންޓް އެންޑް މާކެޓިންގެ މެނޭޖަރ ޢަބްދުﷲ ސިނާން ވިދާޅުވީ ރަށްރަށުން ކުނި ބޭރުކުރުމަކީ މީގެކުރިން އެއްވެސް ވަރެއްގެ ދިރާސާއެއްކުރެވި، ރަނގަޅަށް ބެލިގެން ކުރަމުންއައިކަމެއް ނޫންކަމަށެވެ. ނަތީޖާއެއްގެ ގޮތުން އެއީ މާލީ ގެއްލުމާއެކު ދެމެހެއްޓެނިވިގޮތެއްގައި ކުރެވޭނެކަމެއް ނޫންކަމަށް އޭނާ ވިދާޅުވިއެވެ. އެހެންކަމުން ވެމްކޯއަށާއި، ކައުންސިލްތަކަށްވެސް މާލީގޮތުން ބުރަ ބޮޑުނުވާނެހެން، ރަށްރަށުން ކުނި ބޭރުކުރުމުގެ މަސައްކަތް އަންނަ އަހަރުންފެށިގެން ފުޅާކޮށް، އެކަމަށް އެދޭ ކޮންމެ ރަށަކަށް އެ ޚިދުމަތް ފޯރުކޮށްދޭނެކަމަށް ވެމްކޯއިން ވިދާޅުވިއެވެ.

"އަޅުގަނޑުމެން މިހާރުވާނީ ފީސިބިލިޓީ ސްޓަޑިއެއް ހަދާފައި. މިއާއެކު އަންނަ ޖެނުއަރީ މަހުން ފެށިގެން މިޚިދުމަތް ދޭނީ ވެމްކޯއަށްވެސް މާލީ ގެއްލުން ނުވާނެހެން، ކައުންސިލްތަކަށްވެސް މާބުރަ ބޮޑު ނުވާނެހެން." ސިނާން ވިދާޅުވިއެވެ.

ވެމްކޯއިން ވަނީ ކޯވިޑްގެ ކުރިން 11 ރަށަކުން އަދި ކޯވިޑަށްފަހު 19 ރަށަކުން އެތައް ހާސްޓަނެއްގެ ކުނި ބޭރުކޮށްފައެވެ. އަދި އެފަދަ ކުނި މެނޭޛުކުރެވޭނެ އިންޒާމު މިވަގުތުހުރީ ތިލަފުށީގައި އެކަނިކަންވެސް ވެމްކޯއިން ފާހަގަކުރައްވައެވެ. އެހެންކަމުން އުތުރާއި ދެކުނުގެ ރަށްރަށުން ކުނި ތިލަފުއްޓަށް އުފުލުމަށް ބޮޑު ޚަރަދެއް ހިންގާކަމަށްވެސް ވެމްކޯއިން ވިދާޅުވިއެވެ.

ރައްކާތެރިގޮތުގައި ކުނި މެނޭޖުކުރުމަށް ވެމްކޯއިން އަންނަނީ އެކުންފުނީގެ ޚިދުމަތް ފުޅާކުރަމުންނެވެ. އެގޮތުން މާލެއާއި އެނޫންވެސް ސިޓީތަކުގެ އިތުރުން ކުނި އުކާދިނުމުގެ ޚިދުމަތް މާލެ އަތޮޅު މާފުއްޓާއި ހިންމަފުށީގައި ވެމްކޯއިން ވަނީ ފަށާފައެވެ. އަދި މިހާރު އެ ޚިދުމަތް މާލެ އަތޮޅު ގުރައިދޫގައި ފެށުމަށްވެސް ވެމްކޯއިން އަންނަނީ ތައްޔާރުވަމުންނެވެ.