ރެނާޓަސް ކުންފުނީގެ މުވައްޒަފުންތަކަކަށް އިހުމާލުވި މައްސަލައެއް ލޭބަރ ރިލޭޝަންސް އޮތޯރިޓީން ބަލަނީ
-
40 މުވައްޒަފަކަށް މުސާރަ ނުދޭކަމަށް ބުނެ މައްސަލަ ވަނީ ހުށައަޅާފައި
-
ބައެއް މީހުން ވަނީ އެނބުރި ޤައުމަށް ދާން އެދިފައި
ޢިމާރާތްކުރުމުގެ މަސައްކަތަށް ރާއްޖެ ގެނެސްފައިވާ އިންޑިއާގެ މަސައްކަތްތެރިންތަކަކަށް، އެމީހުންނާ ހަވާލުވެފައިވާ ކުންފުނިން އިހުމާލުވެފައިވާ މައްސަލައެއް ބަލަމުން އަންނަކަމަށް ލޭބަރ ރިލޭޝަންސް އޮތޯރިޓީން ވިދާޅުވެއްޖެއެވެ.
ލޭބަރ ރިލޭޝަންސް އޮތޯރިޓީން ވިދާޅުވީ ޢިމާރާތްކުރުމުގެ މަސައްކަތަށް ރާއްޖެ ގެނެސްފައިވާ އިންޑިއާގެ 40 މީހަކަށް 1 މަހާއި 10 ދުވަހުގެ މުސާރަ ނުދޭކަމަށް ބުނެ އެ އޮތޯރިޓީއަށް މައްސަލައެއް ހުށައަޅާފައިވާކަމަށެވެ. އަދި އެމީހުން އެނބުރި ޤައުމަށް ދާން ބޭނުންވާކަމަށްވެސް ހުށައަޅާފައިވާކަަމށް ލޭބަރ ރިލޭޝަންސް އޮތޯރިޓީން ވިދާޅުވިއެވެ. މި މައްސަލައާ ގުޅިގެން އެ ކުންފުންޏާ މުޢާމަލާތްކުރަމުންދާކަމަށާއި، މުވައްޒަފުންނަށް ފައިސާ ނުދީ އޮތް މުއްދަތަށްވާ ފައިސާ ދިނުމަށްފަހު، އެނބުރި ޤައުމަށް ދާން ބޭނުންވާ މުވައްޒަފުން ފުރުވާލުމުގެ އިންތިޒާމު ހަމަޖައްސަމުން ގެންދާކަމަށް ކުންފުނިން މަޢުލޫމާތު ދީފައިވާކަމަށް އެ އޮތޯރިޓީން ވިދާޅުވިއެވެ.
އެ ކުންފުނިން އަމަލުކުރަމުން އަންނަގޮތް ބަލަމުން އަންކަމަށްވެސް ލޭބަރ ރިލޭޝަންސް އޮތޯރިޓީން ވަނީ ވިދާޅުވެފައެވެ.
އެނގިފައިވާގޮތުގައި ހާލުގައި ޖެހިފައިވާކަމަށް ބުނެ އެހީއަށް އެދިފައިވަނީ އައްޑޫ ގަން އިންޓަނޭޝަނަލް އެއަރޕޯޓު ތަރައްޤީކުރަމުން އަންނަ ރެނާޓަސް ކުންފުނީގެ މުވައްޒަފުންތަކެކެވެ. އެ މުވައްޒަފުންނަށް މުސާރަ ނުދިނުމުގެ ސަބަބުން އެމީހުން ހާލުގައި ޖެހިފައިވާކަމަށް ބުނެ އިންޑިއާއާއި ރާއްޖޭގެ ބައެއް މީޑިއާތަކުގައި ރިޕޯޓްކޮށްފައިވެއެވެ.