އިސްލާމް ދީނުގައި ފާހަގަކުރުމަށް ކަނޑައަޅުއްވާފައިވާ ދެ ދުވަހަކީ ދެ ޢީދެވެ. އެއީ ފިޠުރު ޢީދާއި އަޟްހާ ޢީދު ދުވަހެވެ. މި ދެ ދުވަހަށް ދީނުގައި މިހާ އިސްކަމެއް ދެއްވާފައިވަނީ މިއީ އިސްލާމީ އުންމަތަށް އަންނަ މާތް ދެ އަޅުކަމާ ވިދިގެން އަންނަ ދެ ޢީދަށް ވާތީއެވެ.
މުސްލިމުން ފާހަގަކުރާ ފިޠުރު ޢީދު ދުވަހާއި އަޟްޙާ ޢީދު ދުވަހަކީ މުސްލިމުން އެ ދުވަސްތަކުގައި އުފާފާޅުކޮށް އެއްބަޔަކު އަނެއްބަޔަކަށް ބައްދަލުވެ، އަދި ގުޅުން ދެމެހެއްޓުމަށްޓަކައި އިސްލާމްދީނުގައި ލައްވާފައިވާ ދެ ދުވަހެވެ. ފިޠުރު ޢީދަކީ ބަރާކާތްތެރި ރަމަޟާންމަހަށްފަހު މުސްލިމުންނަށް އަންނަ ޢީދު ދުވަހެވެ. އަޟްޙާ ޢީދަކީ ޙައްޖުގެ މާތް މަތިވެރި އަޅުކަމަށްފަހު އެކަމާ ގުޅިގެން އަންނަ ޢީދެކެވެ. މިދުވަސްތައް މިގޮތަށް ކަނޑައަޅުއްވާފައިވާއިރު، މިއީ މުޅި އިސްލާމީ އުންމަތް ފާހަގަކުރެއްވުމަށް ކަނޑައަޅުއްވާފައިވާ ދެ ދުވަހެވެ.
މި ދެ ދުވަހަކީ މުސްލިމުން އެ ދުވަސްތަކުގައި އުފާފާޅުކޮށް އަދި އެއްބަޔަކު އަނެއްބަޔަކާއި ބައްދަލުކޮށް، ސަލާން ގަލާންކޮށް ހަދިޔާ ބަދަލުކުރާ ދެ ދުވަހެވެ. ރާއްޖޭގައިވެސް ޒަމާނުއްސުރެ ޢީދު ފާހަގަކުރަމުން އަންނައިރު، މިހާރަކަށް އައިސް އިހުގައި އަޅުގަނޑުމެންގެ ތެރޭގައި އޮތް އެއްބައިވަންތަކާއި އެކުވެރިކަން ނުފެންނަކަން ފާހަގަކުރެވެއެވެ. ހަމަ އެހެންމެ ކުރިން އަޅުގަނޑުމެންނަށް ފެންނަމުންދިޔަ ހިތްހެޔޮކަމާއި ގާތްކަމާއި ހަދިޔާ ބަދަލުކުރުންފަދަ ކަންތައްތައް މިހާރު ފެންނަލެއް މަދޭ ދެންނެވިދާނެއެވެ.
މިފަދަ ރީތި އާދަކާދަތަކަކީ ދީން ބާރުއަޅާ ކަންތަކަށް ވާއިރު މިއީ އެއްބަޔަކު އަނެއްބަޔަކަށް ގުޅުން ބަދަހިކޮށް، އެކަކު އަނެކަކާ ދެމެދުގައިވާ ހިތްހަމަނުޖެހުންވެސް ފިލާނެ ކަންތައްތަކެވެ.