2024 ވަނަ އަހަރަކީ ކުޅިވަރުގައި ރާއްޖެއިން ކުރިއެރުންތަކެއް ހޯދި ކާމިޔާބު އަހަރެކެވެ. ތާރީޚުގެ ތެރެއިން ބައެއް ކުޅިވަރުތަކުން ކާމިޔާބީ ހާސިލުކުރިއިރު، އެހެން ކުޅިވަރުތަކުން ވަނީ ބޮޑެތި ކުރިއެރުންތަކެއް ހޯދާފައެވެ. އެގޮތުން 2024 އަހަރު އެންމެ ބޮޑު ކާމިޔާބެއް ހޯދާފަވަނީ ޓޭބަލް ޓެނިސް އެސޯސިއޭޝަނުންނާއި، ސާފިން އެސޯސިއޭޝަނުންނެވެ.
ހުސްވި އަހަރުގެ މެއި މަހު ނޭޕާލުގެ ވެރިރަށް ކަތަމަންޑޫގައި ކުރިއަށްދިޔަ ދެކުނު އޭޝިޔާގެ ކޮންޓިނެޓަލް ކޮލިފިކޭޝަން ކާމިޔާބުކޮށް، ރާއްޖޭ ޓީޓީ ތަރި ފާތިމަތު ދީމާ އަލީ ވަނީ އޮލިމްޕިކްސް ކުޅިވަރު މުބާރާތަށް ކޮލިފައިވި ފުރަތަމަ ދިވެހި އެތުލީޓުގެ ޝަރަފު ހޯދައި، އެ މުބާރާތުގައި ވާދަކޮށްފައެވެ. މިއީ ރާއްޖޭގެ ކުޅިވަރު ތާރީޚުގައި އައު ބާބެއްގެ ފެށުމެވެ.
ދެން ރާއްޖޭއިން ބައިނަލްއަގުވާމީ މައިދާނުގައި ހޯދި އެންމެ ބޮޑު ކާމިޔާބަކީ ހުސްވި އަހަރުގެ އޯގަސްޓް މަހު ކ. ތުލުސްދޫގައި ކުރިއަށްދިޔަ އޭޝިއަން ސާފިން ޗެމްޕިއަންޝިޕުގައި ވާދަކޮށް އަންހެން އަދި ފިރިހެން ޓީމުން 2026 ވަނަ އަހަރު އޮންނަ އޭޝިއަން ގޭމްސްގެ ސާފިން އިވެންޓަށް ކޮލިފައިވުމެވެ.
މިދިޔަ އަހަރު ރާއްޖޭގައި ބައިނަލްއުގަވާމީ 11 މުބާރާތެއް ވަނީ ބޭއްވާފައެވެ. އެގޮތުން އަހަރުގެ އެންމެ ފުރަތަމަ ބައިނަލްއަގުވާމީ އިވެންޓަކަށް ބޭއްވީ އޭޕްރީލް މަހު މާލޭގައި ކުރިއަށްދިޔަ ހަވަނަ އޭޝިއަން ކެރަމް ޗެމްޕިއަންޝިޕެވެ. އެ މުބާރާތުން ރާއްޖޭގެ ފިރިހެން ޓީމު ވަނީ ޑަބަލަސްއިން ރިހި މެޑެލް ހޯދާފައެވެ.
މިދިޔަ އަހަރު ރާއްޖޭގައި ބޮޑީބިލްޑިން އާއި ވޮލީބޯޅައިގެ ބައިނަލްއަގުވާމީ ތިން އިވެންޓެއް ވަނީ ބާއްވާފައެވެ. އަހަރުގެ ބައިނަލްއަގުވާމީ އެންމެ ފަހު އިވެންޓަކީ މިދިޔަ ޑިސެމްބަރު މަހު ބޭއްވީ އޭޓީއެފް ޖޫނިއަރ ޓެނިސް ޗެމްޕިއަންޝިޕެވެ. އެ މުބާރާތުގައި ރާއްޖޭގެ ޖޫނިއަރ ޓެނިސް ކުޅުންތެރިޔާ އާރާ އާސަލް އާޒިމް ވަނީ ދެ ކެޓެގަރީއަކުން ޗެމްޕިއަންކަން ހޯދާފައެވެ.
މިދިޔަ އަހަރު ރާއްޖެއިން ވާދަކުރި ބައިނަލްއަގުވާމީ އިވެންޓުތަކަށް ބަލާއިރު، ބީޗް ވޮލީބޯޅައިން ވަނީ ރަން ވަނަތަކެއް ހޯދާފައެވެ. އެ ގޮތުން އޯގަސްޓް މަހު ބޫޓާންގައި ކުރިއަށްދަ ކާވާ ބީޗް ވޮލީބޯލް ޗެލެންޖް ކަޕުގައި ވާދަކުރި ރާއްޖޭގެ ޓީމުން ވަނީ ރަން މެޑެލް ހޯދާފައެވެ. މީގެ އިތުރުން ސެޕްޓެންބަރު މަހު ރާއްޖޭގައި ބޭއްވި ކާވާ ވިމެންސް ޗެލެންޖް ކަޕުގައި ރާއްޖެގެ އަންހެން ވޮލީ ޓީމު ވަނީ އަމިއްލަ ސަޕޯޓަރުންގެ ކުރިމަތީގައި ރިހި މެޑެލް ހޯދާފައެވެ.
ބޮޓްސްވާނާ އިންޓަނޭޝަނަލް ބެޑްމިންޓަން މުބާރާތުގެ އަންހެން ސިންގަލްސް ފައިނަލުގައި ރާއްޖޭގެ ރިވައިވަލް ސްޕޯޓްސް ކުލަބުން ވާދަކުރި ގައުމީ ބެޑްމިންޓަން ޓީމުގެ ދެ ބެއިންގެ ކުރިމަތިލުމުގައި ފާތިމަތު ނަބާހާ ވަނީ ތާރީޚި ރަން މެޑެލް ހޯދާފައެވެ. މިއީ ބައިނަލްއަގުވާމީ ފައިނަލެއްގައި މި ދެ ބެއިން ވާދަކުރި ފުރަތަމަ ފަހަރެވެ.
މިދިޔަ އަހަރުގެ ފަހުކޮޅު ބޭއްވި އެންމެ ފޯރިގަދަ ހަރަކާތަކަށް ވެގެންދިޔައީ ފުޓްބޯޅައިގެ ފޯރި އަލުން ގެނައުމުގެ ބޭނުމުގައި "އަލުން ދަނޑަށް" މި ޝިޔާރުގެ ދަށުން ކުރިއަށްގެންދިޔަ ނައިންޓީ ޕްލަސް ގޯލްޑް ކަޕް ފުޓްބޯޅަ މުބާރާތެވެ. ނުވަ އަތޮޅަކުން 17 ޓީމު ވާދަކުރި މި މުބާރާތުގައި ކުޅުނު 47 މެޗު ވެގެންދިޔައީ އިހު އޮތް ފުޓްބޯޅަ ފޯރީގެ ހަނދާންތައް އައުކުރުވި މެޗުތަކަށެވެ. ދިވެހި ރައްޔަތުން ދައްކަދިނީ ފުޓްބޯޅަށް އޮތް ލޯތްބެވެ. ޒުވާން މޮޅެތި އެތައް ކުޅުންތެރިންތަކެއް ފެނިގެންދިޔަ މި މުބާރާތް ކާމިޔާބުކޮށް، ބ. އޭދަފުށިން ވަނީ ރާއްޖޭގައި މި ވަގުތު އޮތް އެންމެ މޮޅު ޓީމަކީ އެއީކަން ސާބިތުކޮށްދީފައެވެ.
ފުޓްބޯޅައިގެ ރަސްމީ ހަރަކާތްތައް ކުރިއަށް ނުދިޔަ ނަމަވެސް، އޭއެފްސީން އަލަށް ތައާރަފުކުރި ޗެލެންޖާސް ލީގުގައި މާޒިޔާ ސްޕޯޓްސް އެންޑް ރެކްރިއޭޝަނުން ވަނީ ވާދަކޮށްފައެވެ. އަދި މިދިޔަ އަހަރު ރާއްޖެއިން ވަނީ ބަންގްލަދޭޝް އާއެކު ބައިނަލްއަގުވާމީ އެކުވެރިކަމުގެ ދެ މެޗު ކުޅެ, އެއް މެޗުން މޮޅުވެފައެވެ.
މިދިޔަ އަހަރުގެ ތެރޭގައި ސަރުކާރުން ކުޅިވަރު ކުރިއެރުވުމަށް 255 މިލިޔަން ރުފިޔާ ހޭދަކޮށްފައިވާއިރު، ކުޅިވަރު ވަސީލަތްތައް ރަނގަޅުކުރުމަށް ވަނީ ގިނަ މަސައްކަތްތަކެއް ކޮށްފައެވެ. އެއާއެކު މިދިޔަ އަހަރަކީ ވަކިވަކި ކުޅިވަރުތަކުން ދެއްކި ކުޅުމާއި، ހޯދި ނަތީޖާތަކަށް ބަލާއިރު ކާމިޔާބު އަހަރެކެވެ.