ޔަހޫދީ ސަލާމަތީ ބާރުތަކުގެ ފުރިހަމަ ހިމާޔަތުގައި ހައްދުފަހަނައަޅާފައިވާ އެތައް ސަތޭކަ ބަޔަކު އަލްއަޤްޞާ މިސްކިތުގެ ގޯތިތެރެއަށް ވަދެގަންނަން ފަށައިފިއެވެ.
ޔަހޫދީންގެ "ސުކޯތު" ޢީދާ ދިމާކޮށް، ޔަހޫދީ ފުލުހުންނާއި ސިފައިންގެ ވަރުގަދަ ޙިމާޔަތުގެ ދަށުން، ހައްދުފަހަނައަޅާފައިވާ ޔަހޫދީ ވަޒަންވެރިން އަލްއަޤްޞާ މިސްކިތުގެ ގޯތިތެރެއަށް ވަދެގަނެ، އެ މިސްކިތުގެ ޙުރުމަތް ކެނޑޭ ފަދަ ޢަމަލުތައް ހިންގަމުން އެބަދެއެވެ.
ޔަހޫދީ ސިފައިންނާއި ފުލުހުންގެ ފުރިހަމަ ޙިމާޔަތުގައި، ހޯމަ ދުވަހު އެކަނިވެސް 1,731 ޔަހޫދީ ވަޒަންވެރިން އަލްއަޤްޞާއަށް ވަދެގަތްއިރު، އަންގާރަ ދުވަހުގެ ހެނދުނުގެ ވަގުތުގައިވެސް 900 އަށްވުރެ ގިނަ ޔަހޫދީން ވަނީ އެ މިސްކިތުގެ ގޯތިތެރެއަށް ވަދެގަނެފައެވެ. އަދި އެ މީހުން ވަނީ މިސްކިތުގެ ޙަރަމްފުޅުގެ ތެރޭގައި އެއްވެ، ނަށައި ލަވަކިޔުމުގެ އިތުރުން، ތާލްމޫދީ އަޅުކަމުގެ ޝިޢާރުތައް ފާޅުކޮށް ޙަރަކާތްތައް ހިންގާފައެވެ.
ވަފާ ނޫސް އިދާރާގެ ތަފާސްހިސާބުތައް ދައްކާ ގޮތުން، މި އަހަރު ފެށުނީއްސުރެ އޮގަސްޓު މަހުގެ ނިޔަލަށް 40,661 އަށްވުރެ ގިނަ ޔަހޫދީ ވަޒަންވެރިން ވަނީ އަލްއަޤްޞާ މިސްކިތުގެ ޙަރަމްފުޅަށް ވަދެގަނެފައެވެ. މީގެ އިތުރުން، ސެޕްޓެމްބަރު މަހުގެ ކުރީކޮޅާ ހަމައަށް ޤުދްސްގެ 800 އަށްވުރެ ގިނަ ފަލަސްޠީނު ރައްޔިތުން އަލްއަޤްޞާ މިސްކިތަށް ވަނުން މަނާކޮށް، ޔަހޫދީ އިސްތިޢުމާރީ ސަރުކާރުން ވަނީ އަމުރު ނެރެފައެވެ.
މި ޢަމަލުތަކުގައި ޔަހޫދީ ސިޔާސީ އިސް ފަރާތްތަކާއި ސަރުކާރުގެ ވަޒީރުންވެސް ވަނީ ބައިވެރިވެފައެވެ. އެގޮތުން ޔަހޫދީ ޤާނޫނުހަދާ މަޖިލިސް (ކްނެސެޓް) ގެ ކުރީގެ މެންބަރު އަދި ޒެހުތު ޕާޓީގެ ލީޑަރު މޯޝޭ ފެއިގްލިން، އަލްއަޤްޞާ މިސްކިތުގެ ގޯތިތެރޭގައި ޔަހޫދީ ދީނީ އަޅުކަންތައްތަކެއް އަދާކުރާ މަންޒަރު ފެންނަ ވީޑިއޯތައް ޔަހޫދީ މީޑިއާތަކުން ވަނީ ޢާންމުކޮށްފައެވެ.
މީގެއިތުރުން، ޤައުމީ ސަލާމަތާ ބެހޭ ވަޒީރު އިތަމާރު ބެން-ގްވީރު ވެސް މިސްކިތުގެ ގޯތިތެރެއަށް ވަދެ، އެ ތަނުގެ މިލްކުވެރިންނަކީ ޔަހޫދީން ކަމަށް ބުނެ ފާޅުކަން ބޮޑު ގޮތެއްގައި ވަނީ ގޮންޖަހާ ހިޔާލުފާޅުކޮއްފައެވެ.
ޔަހޫދީ ވަޒަންވެރިންނަށް މިސްކިތަށް ވަދެގަތުމަށް ފަސޭހަކޮށްދިނުމުގެ ގޮތުން، ޔަހޫދީ ސަލާމަތީ ބާރުތަކުން ވަނީ ޤުދްސްގެ ޤަދީމީ ސަރަޙައްދާއި އަލްއަޤްޞާއަށް ދެވެން އޮންނަ މަގުތައް ބަންދުކޮށް، ފަލަސްޠީނުގެ ރައްޔިތުންގެ ދަތުރުފަތުރާއި ހަރަކާތްތަކަށް ހުރަސްއަޅާފައެވެ. އަދި މި ދުވަސްވަރު އެ ސަރަޙައްދުގައި ދިރިއުޅޭ ފަލަސްޠީނުގެ ޢާންމު ރައްޔިތުންނަށް ޔަހޫދީ ސިފައިންނާއި ވަޒަންވެރިން ގޯނާކޮށް، އަނިޔާވެރި ޢަމަލުތައް ހިންގަމުންދާ ކަމަށް ޤުދްސްގެ މަސްދަރުތަކުން ވަނީ ހާމަކޮށްފައެވެ.