ޗެރިޓީ ޝީލްޑް މެޗާއެކު ރާއްޖޭގައި ބާއްވާ ފުޓްސަލްގެ އެންމެ ފޯރިގަދަ އެއް މުބާރާތް ކަމަށްވާ "ގޯލްޑަން ފުޓްސަލް ޗެލެންޖް 2025" މިރޭ ފެށުމަށް ތައްޔާރުވެއްޖެއެވެ.
މި އަހަރުގެ ގޯލްޑަން ފުޓްސަލް ޗެލެންޖް ފެށުމުގެ ގޮތުން ކުޅެވޭ ޗެރިޓީ ޝީލްޑް މެޗުގައި ބައްދަލުކުރާނީ އެންމެ ފަހުގެ ޗެމްޕިއަން ބ. އޭދަފުއްޓާއި، 2023 ވަނަ އަހަރުގެ ޗެމްޕިއަން ލ. ގަމެވެ. ހުޅުމާލޭ ރެހެންދި ފުޓްސަލް ދަނޑުގައި ކުޅުމަށް ހަމަޖެހިފައިވާ މި މެޗު ފަށާނީ މިރޭ 8:30 ގައެވެ.
މިއީ ގޯލްޑަން ފުޓްސަލް ޗެލެންޖުން ޝީލްޑް މެޗު ބާއްވާ ތިންވަނަ ފަހަރެވެ. މިދިޔަ އަހަރުގެ މުބާރާތް ފެށުމަށް ކުޅުނު ޝީލްޑް މެޗުގައި ތ. ތިމަރަފުއްޓާ ވާދަކޮށް ގަމުން ވަނީ 3-2 ގެ ނަތީޖާއަކުން މެޗު ކާމިޔާބުކޮށް، ޝީލްޑް އުފުލާލާފައެވެ.
މި ފަހަރުގެ ޗެރިޓީ ޝީލްޑް މެޗުގައި އޭދަފުއްޓާއި ގަން ބައްދަލުކުރާއިރު، މިދިޔަ އަހަރުގެ މުބާރާތުގެ ފައިނަލުގައިވެސް ވާދަކޮށްފައިވަނީ މި ދެ ޓީމެވެ. އެ މެޗު 4-2 ގެ ނަތީޖާއަކުން ކާމިޔާބުކޮށް، އޭދަފުށިން ވަނީ ފުރަތަމަ ފަހަރަށް ރާއްޖޭގެ ޗެމްޕިއަންކަން ހޯދާފައެވެ.
ޗެރިޓީ ޝީލްޑް މެޗަށްފަހު މާދަމާރޭ ގޯލްޑަން ފުޓްސަލް ޗެލެންޖުގެ މެޗުތައް ފެށިގެންދާއިރު، މި ފަހަރުގެ މުބާރާތުގައި 128 ޓީމު ވަނީ ވާދަކުރާނެއެވެ.
ގޯލްޑަން ފުޓްސަލް އެސޯސިއޭޝަނުން އެންމެ ފުރަތަމަ މި މުބާރާތް ބޭއްވީ 2015 ވަނަ އަހަރުއެވެ. އޭގެ ފަހުން މި މުބާރާތް ނުބޭއްވި ދިޔައީ، ކޮވިޑް-19 ގެ ސަަބަބުން އައި މެދުކެނޑުމާ ހެދިއެވެ. މި މުބާރާތުގެ ޗެމްޕިއަންކަން މިހާތަނަށް ހޯދާފައިވަނީ ތިން ފަހަރު މުބާރާތް ކާމިޔާބުކޮށްފައިވާ ތިމަރަފުއްޓާއި، ގަމާއި، އޭދަފުއްޓާއި، ބ. ހިތާދޫ އާއި، މާފަންނު އަދި ހެންވޭރުންނެވެ.