މޯލްޑިވްސް ޓްރެވަލް ކޮންފަރެންސްގެ މިއަހަރުގެ ވިމެންސް އެޑިޝަން އައްޑޫ ސިޓީގައި

މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއަރ އޮޕަރޭޓަރސް، މަޓާޓޯއިން ބާއްވާ މޯލްޑިވްސް ޓްރެވަލް ކޮންފަރެންސް 2025ގެ، ވިމެންސް އެޑިޝަން، އައްޑޫ ސިޓީގައި ބާއްވަން ނިންމައިފިއެވެ.

މަޓާޓޯއިން ވިދާޅުވީ މިކޮންފަރެންސް ބޭއްވުމަށް ހަމަޖެހިފައިވަނީ މިމަހުގެ 25 ވަނަ ދުވަހުކަމަށެވެ.

ފަތުރުވެރިކަމުގެ ސިނާޢަތުގައި މަސައްކަތްކުރާ އަންހެނުން ބާރުވެރިކުރުވުމަށް މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއަރ އޮޕަރޭޓަރސް، މަޓާޓޯއިން ކުރަމުންދާ މަސައްކަތުގެ ދަށުން ބާއްވާ މޯލްޑިވްސް ޓްރެވަލް ކޮންފަރެންސް 2025ގެ ވިމެންސް އެޑިޝަން މިފަހަރު ބޭއްވުމަށް ހަމަޖެހިފައިވަނީ އައްޑޫ ސިޓީ ގަމުގައި ހުންނަ އީކުއޭޓަރ ވިލެޖުގައެވެ.

މިކޮންފަރެންސް ބާއްވަނީ ފަތުރުވެރިކަމާ ބެހޭ ވުޒާރާއާއި، އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއާއި، އެމްއެމްޕީއާރްސީ، ވިޒިޓް މޯލްޑިވްސް، އައްޑޫ ސިޓީ ކައުންސިލް، ނެޝަނަލް ހޮޓެލްސް އެންޑް ގެސްޓް ހައުސް އެސޯސިއޭޝަން އޮފް މޯލްޑިވްސްގެ އިތުރުން އަންހެނުންގެ ތަރައްޤީއަށް މަސައްކަތްކުރާ އެކި ޖަމްޢިއްޔާތަކާއި ގުޅިގެންނެވެ.

އެގޮތުން ވިމެން އިން މެނޭޖްމަންޓް މޯލްޑިވްސް، ވިމެން އޮން ބޯޑްސް، ވިމެން އޮންޓްރަޕްރަނާސް އެސޯސިއޭޝަން އޮފ މޯލްޑިވްސް އަދި އެސޯސިއޭޝަން އޮފް ލޭޑީ އޮންޓްރަޕްރަނާސް ފަދަ އަންހެނުންގެ ތަރައްޤީއަށް މަސައްކަތްކުރާ އެކި ޖަމްޢިއްޔާތަކުން މިކޮންފަރެންސްގައި ބައިވެރިވުމަށްވަނީ ހަމަޖެހިފައެވެ. މިކޮންފަރެންސްގައި ކީނޯޓް ސްޕީކަރުންގެ ގޮތުގައިވެސް އަދި ޕެނަލް ޑިސްކަޝަންތަކުގައިވެސް ވާހަކަދެއްކުމަށް ހަމަޖެހިފައިވަނީ އަންހެނުންކަމަށް މަޓާޓޯއިން ވިދާޅުވެއެވެ.

މިކޮންފަރެންސްގައި 2 މަޢުޟޫއަކަށް މަޢުލޫމާތު ފޯރުކޮށްދިނުމަށްވަނީ ހަމަޖެހިފައެވެ. އެގޮތުން އައްޑޫގައި އަންހެނުންނަށް ހުރި ފުރުސަތުތަކާއި އާމްދަނީ ހޯދުމަށް މަސައްކަތްކުރާ އަންހެނުންނާ މެދު މުޖުތަމަޢުގައި އޮންނަ ނޭދެވޭ ނަޒަރު ބަދަލުކުރުމުގެ މައްޗަށް ވާހަކަދެއްކުމަށްވަނީ ހަމަޖެހިފައެވެ. އަދި ފަތުރުވެރިކަމުގެ ދާއިރާގެ ވަޒީފާތައް ހަމައެކަނި ރިސޯޓުތަކާ ހިސާބަށް ހަނިވެފައި އޮންނަ ކަމަށް ޤަބޫލުކުރެވިފައި އޮންނަ އޮތުމާއި ދެކޮޅަށްވެސް މިކޮންފަރެންސްގެ ތެރެއިން މަޢުލޫމާތު ދިނުމަށް ހަމަޖެހިފައިވާކަމަށް މަޓާޓޯއިން ވިދާޅުވެއެވެ.

މިކޮންފަރެންސްގެ ތެރެއިން ބީސީސީއާއި ގުޅިގެން އަންހެނުންނަށް އަމާޒުކޮށް، ފައިނޭންޝަލް ލިޓްރަސީ ޓްރޭނިންގ ސެޝަނެއް ކުރިއަށްގެންދިޔުމަށްވަނީ ހަމަޖެހިފައެވެ. ހިލޭކުރިއަށްގެންދާ މިސެޝަންގައި ރަޖިސްޓްރީވުމުގެ ފުރުސަތު މިމަހުގެ 20 ވަނަ ދުވަހާ ހަމައަށްވަނީ ހުޅުވާލާފައެވެ. ރަޖިސްޓްރީ ކުރެވޭނީ މަޓާޓޯގެ ވެބްސައިޓު މެދުވެރިކޮށެވެ.

2024 ވަނަ އަހަރުން ފެށިގެން މަޓާޓޯއިން އަންނަނީ މޯލްޑިވްސް ޓްރެވެލް ކޮންފަރެންސް ވިމެންސް އެޑިޝަން އިނީޝިއޭޓިވްގެ ދަށުން ފަތުރުވެރިކަމުގެ ސިނާޢަތުގައި މަސައްކަތްކުރާ އަންހެނުން ބާރުވެރިކުރުވުމުގެ މަސައްކަތް ކުރަމުންނެވެ. މިއީ މިފަދަ 2 ވަނަ ކޮންފަރެންސެވެ. އަދި މިއަހަރުގެ މެއިމަހު އއ.ތޮއްޑޫގައި އަދި އޯގަސްޓްމަހު މާލޭގައިވެސް ކޮންފަރެންސް ބޭއްވުމަށްވަނީ ނިންމާފައެވެ.