އިނގިރޭސި ކުލަބުތަކުން ބޭނުންވެގެން އުޅޭ ސްޕެއިންގެ މިޑްފީލްޑަރު މާޓިން ޒުބިމެންޑީ ދިޔުން އެންމެ ގާތީ ރެއާލް މެޑްރިޑަށް ކަމަށް އެ ގައުމުގެ ނޫސްތަކުން ބުނަން ފަށައިފިއެވެ.
ރެއާލް ސޮސިއެޑާޑަށް ކުޅެމުން އަންނަ 25 އަހަރުގެ މިޑްފީލްޑަރަކީ ސްޕެއިންގެ ބޮޑެތި ކުލަބުތަކުންވެސް ބޭނުންވާ ކުޅުންތެރިއެކެވެ. އޭނާ ގަތުމަށް މިދިޔަ ދެ ސީޒަނުގައި ސްޕެއިންގެ ބާސެލޯނާއިން ވަނީ މަސައްކަތް ކޮށްފައެވެ. އެއީ އޭރުގެެ ކޯޗު ޒަވީ ހެނާންޑޭޒް ބޭނުންވުމުންނެވެ.
ހިނގަމުންދާ މި ސީޒަން ފެށުމުގެ ކުރިން އިނގިރޭސިވިލާތުގެ ލިވަޕޫލުންވެސް ވަނީ ޒުބިމެންޑީ ގަތުމަށް ވަރަށް ބޮޑަށް މަސައްކަތްކޮށްފައެވެ. އަދި މިހާރު އޭނާ ގަތުމަށް މަސައްކަތް ކުރަނީ އިނގިރޭސި ޕްރިމިއަރ ލީގުގެ ޗެމްޕިއަން މެންޗެސްޓާ ސިޓީ އާއި އާސެނަލުންނެވެ. ޒުބިމެންޑީ އާއި ސޮސިއެޑާޑްގެ އެއްބަސްވުމުގައިވާ ގޮތުން އޭނާ ގަންނަން ބޭނުންވާ ކުލަބަކުން ދައްކަންޖެހޭ އަދަދަކީ 60 މިލިއަން ޕައުންޑެވެ.
އޭނާ މިހާރު ބަދަލުވުން ގާތީ ރެއާލް މެޑްރިޑަށް ކަމަށް ބެލެވޭ ދެ ސަބަބެއް އެބައޮތެވެ. ފުރަތަމަ ސަބަބަކީ އަންނަ ސީޒަނަށް ރެއާލް މެޑްރިޑުން އަމާޒު ހިފާފައިވާ ދެ މިޑްފީލްޑަރުން ކުރެ އެއް ކުޅުންތެރިއަކީ ޒުބިމެންޑީ ކަމަށްވުމެވެ. އަނެއް ކުޅުންތެރިއަކީ މެންޗެސްޓާ ސިޓީއަށް ކުޅެމުން އަންނަ ސްޕެއިންގެ މިޑްފީލްޑަރު އަދި ޔޫރަޕުގެ މޮޅު ކުޅުންތެރިޔާ ރޮޑްރީއެވެ. މީގެ ތެރެއިން އެންމެ ފަސޭހަވާނީ ޒުބިމެންޑީ ގަތުމަށް ކަމަށް ރިޕޯޓުތައް ބުނެއެވެ.
ދެވަނަ ސަބަބަކީ ރެއާލް މެޑްރިޑުގެ ކޯޗުކަމާ ޒަބީ އަލޮންސޯ ހަވާލުވާން އުޅުމެވެ. މިވަގުތު ބަޔާ ލެވަކޫސަނަށް ކޯޗުކޮށްދެމުން އަންނަ އަލޮންސޯ އަކީ ޒުބިމެންޑީ މިސާލެއްގެ ގޮތުން ބަލަމުން އައި ކުޅުންތެރިޔާއެވެ.