ކުޅުދުއްފުށީގައި ވެމްކޯގެ ޚިދުމަތާއެކު ރައްޔިތުންނަށް ބޮޑު ލުޔެއް

ބޮޑު އާބާދީއެއް ދިރިއުޅޭ ކުޅުދުއްފުށި ސިޓީގައި ކުނި މެނޭޖް ނުކުރެވުމުގެ މައްސަލައަކީ މުޅި ސިޓީއަށް ދިމާވެފައި އޮތް މައްސަލައެކެވެ. އެކި ބޭނުންތަކުގައި ކޮންމެ ދުވަހަކު އެތަށް ބަޔަކު ރަށަށް އަރާއިރު، އެރަށުގައި އުފެދޭ ކުނީގެ ނިސްބަތް އަންނަނީ އިތުރުވަމުންނެވެ.

ކުނި މެނޭޖް ކުރުމުގެ މި މައްސަލަ ހައްލުކުރުމުގެ ގޮތުން އެ ސިޓީގައި ވެމްކޯގެ ޚިދުމަތް މިހާރު ވަނީ ފަށާފައެވެ. ރަސްމީކޮށް ފީ ނަގައިގެން ކުނި ނެގުމުގެ ޚިދުމަތް ވެމްކޯއިން ފެށީ މިމަހުގެ ފުރަތަމަ ދުވަހުން ފެށިގެންނެވެ. މިއާއެކު ކުޅުދުއްފުށި ސިޓީގައި ވެމްކޯގައި ރަޖިސްޓްރީވެފައިވާ ކޮންމެ ގޭބިސީއަކުންވެސް ކޮންމެ ދުވަހަކުވެސް އަންނަނީ ކުނި ނަގަމުންނެވެ.

ސަރުކާރުން ވަނީ ރާއްޖޭގެ މީހުން ދިރިއުޅޭ ރަށްތަކަށް ދިމާވެފައިވާ ކުނީގެ މައްސަލައަށް ދާއިމީ ހައްލެއް ހޯދައިދީ ކުނި އުފައްދާ މަސްދަރުން ފެށިގެން، ކުނި މެނޭޖްކުރާ ސަރަހައްދީ މަރުކަޒުގައި ކުނި ނައްތާލުމާ ހަމައަށް ވަށާޖެހޭ އަދި ތިމާވެއްޓާ ރައްޓެހި ގޮތަކަށް ކުނި މެނޭޖްކުރުމުގެ ގޮތުން ޤައުމީ ޕްލޭނެއް އިފްތިތާހްކޮށްފައެވެ.

މި ޕްލޭންގެ ދަށުން ކުނި މެނޭޖްކުރުމުގެ ހާލަތު ވަޒަންކޮށް ރަނގަޅު ގޮތުގައި ކުނި މެނޭޖްކުރުމަށް އެޅިދާނެ ފިޔަވަޅުތައް ދެނެގަނެ އާންމުން ހޭލުންތެރިކުރުން ހިމެނެއެވެ.

މި ޕްލޭންގެ ދަށުން ވޭސްޓް މެނޭޖްމަންޓް ކޯޕަރޭޝަން ވެމްކޯއިން ވަނީ މާލޭގެ އިތުރުން އަތޮޅުތަކުގެ ބައެއް ސަރަޙައްދުތަކުގައިވެސް ކުނި ނެގުމުގެ ޚިދުމަތް ދެމުންނެވެ. މީގެ ތެރެއިން އެއްރަށަކީ ކުޅުދުއްފުށި ސީޓިއެވެ. އެ ސިޓީގައި ވެމްކޯގެ ޚިދުމަތް ފެށުމާއެކު ކުނި ނަގެމުގެ ޚިދުމަތާއެކު ވަޒީފާގެ ފުުރުޞަތުތަކެއްވެސް ވަނީ އުފެދިފައެވެ.

ވެމްކޯގެ ޚިދުމަތާއެކު 75 ވަޒީފާ ވަނީ އުފެދިފައެވެ. ކުޅުދުއްފުށީގައި ބޮޑު އާބާދީއެއް އޮންނައިރު 2300 އެއްހާ ގޭބިސީ އެބަހުއްޓެވެ. އެގޮތުން ޚިދުމަތް ފެށިއިރު ވެމްކޯގެ ޚިދުމަތް ހޯދުމަށް 483 ގޭބިސީއަކުން ރަޖިސްޓްރީވިނަމަވެސް މިހާރު އެއަދަދު ވަނީ 900 އިން މައްޗަށް އަރާފައެވެ.

ކުޅުދުއްފުށީ ސިޓީގެ ވެމްކޯގެ މެނޭޖަރ މުޙައްމަދު ޤާސިމް ވިދާޅުވީ ވެމްކޯގެ ޚިދުމަތާއެކު ކޮންމެ ދުވަހަކުވެސް ކުނިވާ ޒާތުގެ ކުނި ނަގަމުންދާނެކަމަށެވެ. އަދި ޕްލާސްޓިކާއި ދަނގަޑުގެ ބާވަތްތައް އާދިއްތަ އަދި ބުރާސްފަތި ދުވަހު ނަގާއިރު ހަފްތާގެ އަންގާރަ ދުވަހު ނަގަމުންދަނީ ފަތްކުނިކަމަށް އޭނާ ވިދާޅުވިއެވެ.

"ކުރިން ކުޅުދުއްފުއްޓަކީ ފަސޭހަ ދިމާއަކަށް ކުނި އުކަމުން އައި ބައެއް. މި ޚިދުމަތް ފެށުމާއެކު މިކަން ވަނީ ބަދަލުވެފަ. ވެމްކޯގެ ޚިދުމަތް ހޯދުމަށް ކޮންމެ ގޭބިސީއަކުންވެސް ރަޖިސްޓަރ ވާންވީ އޮންލައިންކޮށްވެސް ރަޖިސްޓަރ ވެވޭނެ." ކުޅުދުއްފުށީ ސިޓީގެ ވެމްކޯގެ މެނޭޖަރ މުހައްމަދު ޤާސިމް ވިދާޅުވިއެވެ.

ވެމްކޯ ކުޅުދުއްފުށި ސިޓީގެ އޮޕަރޭޝަންސް މެނޭޖަރ އަޙްމަދު ނައީމް ވިދާޅުވީ ކުނި ނެގުމުގެ ޚިދުމަތް ދިނުމަށްޓަކައި 16 ޓަނުގެ ކޮންޕެކްޓަރަކާއި، 6 ޓަނުގެ ކޮންޕެކްޓަރއެއް ބޭނުންކުރަމުންދާކަމަށެވެ. އޭނާ ވިދާޅުވީ ކުނި ނެގުމުގެ ޚިދުމަތަށް ވަރަށްބޮޑު އެއްބާރުލުމެއްވެސް ލިބެމުން އަންނަކަމަށެވެ.

"ރަށުގައި އުފެދޭ އެކި ކުނިތައް މިހާރު ކުނިކޮށްޓަށް ދަނީ ޖަމާކުރަމުންދާކަަށް. މިހާރު ހަމަޖައްސާފައި އެވަނީ ކައިރީގަ އޮތް ކުނބުރުދޫއަށް ކުނި ގެންދަން. ކުނި ނެގުމުގެ އިތުރަށް ކުނި މެނޭޖްކުރުމަށްވެސް ދަސްކޮށްދެމުން ދަނީ." ވެމްކޯ ކުޅުދުއްފުށި ސިޓީގެ އޮޕަރޭޝަންސް މެނޭޖަރ އަޙްމަދު ނައީމް ވިދާޅުވިއެވެ.

ވެމްކޯއިން ކުނީގެ ޚިދުމަތްދޭ އަގުތަކަށް ބަލާއިރު ކޮންމެ ގޭބިސީއަކަށް އަގު ކުރަނީ 150 ރުފިޔާއެވެ. އަދި ވިޔަފާރީތަކަށް ނަގަނީ ކޮންމެ ދުވަހަކަށް ލިޓަރަކަށް 20 ލާރިއެވެ. ގޭޓް ފީގެ ގޮތުގައި ނަގަނީ 106 ރުފިޔާއެވެ.

ކުޅުދުއްފުށީގެ ކުނީގެ މައްސަލައަށް ބަލާއިރު ކުނި ގޮނޑުގައި އަދިވެސް ދުވަސްވީ ބޮޑު ކުނިފުނިތައް އެބަހުއްޓެވެ. ކުނީގެ މައްސަލަ ހައްލުކުރުމަށް މަސައްކަތްތަކެއް ކުރަމުންދާއިރު އެ ސިޓީގެ ކައުންސިލުން އަންނަނީ ކުނި ކޮށީގައި ކުނި ވަކި ކުރުމަށްޓަކައި ޚާއްސަ ތަނެއް ތަރައްޤީކުރަމުންނެވެ.

ވެމްކޯއިން އަންނަނީ ކުޅުދުއްފުށީގެ އިތުރަށް އެހެން ސިޓީތަކާއި ލ. ފޮނަދޫއާއި ކ. މާފުށީ އަދި ހިންމަފުށީގައިވެސް މި ޚިދުމަތް ފަށާފައެވެ.