ބިދޭސިއަކު ރާއްޖޭގައި ރޫހާނީ ފަރުވާގެ ޚިދުމަތް ދޭކަމަށްބުނާ މައްސަލައެއް ފުލުހުން ބަލަން ފަށައިފި
-
މިކަން އިޝްތިހާރުކުރަނީ "މާސްޓަރ ދުރްގާ ރާއޯ ގުރުޖީ" ނަމަކަށް ކިޔާ މީހަކު
-
މައްސަލައިގައި ފިޔަވަޅު އަޅަމުންދާކަމަށް ފުލުހުން ވިދާޅުވޭ
ބިދޭސިއަކު ރާއްޖޭގައި ރޫހާނީ ފަރުވާގެ ޚިދުމަތް ދޭކަމަށްބުނެ އިޝްތިހާރުކުރަމުންދާ މައްސަލައެއް ފުލުހުން ބަލަން ފަށައިފިއެވެ.
ފުލުހުން ވިދާޅުވީ "މާސްޓަރ ދުރްގާ ރާއޯ ގުރުޖީ" ނަމަކަށް ކިޔާ މީހަކު ދިވެހިރާއްޖޭގައި ރޫހާނީ ފަރުވާގެ ޚިދުމަތްތަކެއް ދޭކަމަށް ބުނެ ސޯޝަލް މީޑިއާގެ މަންސަތަކުގައި އިޝްތިހާރު ކުރަމުންދާ މައްސަލަ ފުލުހުންގެ ސަމާލުކަމަށް އައިސްފަވާކަމަށެވެ. މި މައްސަލައާ ގުޅިގެން، ޤާނޫނީ ގޮތުން އަޅަންޖެހޭ ފިޔަވަޅުތައް އެޅުމަށްޓަކައި ކުރަންޖެހޭ މަސައްކަތްކަމާބެހޭ އިދާރާތަކާ ގުޅިގެން ފުލުހުން މިހާރު ކުރަމުންދާކަމަށް އެ ޚިދުމަތުން ވަނީ ވިދާޅުވެފައެވެ.
ދިވެހިންގެ ސަގާފަތާއި ދީނާ ޚިލާފު މިފަދަ ކަންކަމުގެ މަޢުލޫމާތު އެކަކު އަނެއްކަކާ ހިއްސާކުރުމުގެ ބަދަލުގައި، ވީ އެންމެ އަވަހަކަށް ކަމާބެހޭ އިދާރާތަކުގެ ސަމާލުކަމަށް ގެނެސް، ޤާނޫނީ ފިޔަވަޅު އެޅުމުގެ މަސައްކަތް ކުރިއަށް ގެންދިއުމަކީ މުހިންމު ކަމެއް ކަމުގައި ފުލުހުންގެ އިދާރާއިން ފާހަގަކުރައްވައެވެ. އެހެންކަމުން، މިފަދަ އިޝްތިހާރެއް ފެނިއްޖެނަމަ ލަސްނުކޮށް ފުލުހުންނަށް އެންގުމަށްވެސް ވަނީ އެދިފައެވެ.
މިގޮތަށް ރާއްޖޭގައި އެހެން ދީންތައް އިޝްތިހާރުކުރުމާއި އަދި އެހެން ދީންތަކުގައި އަޅުކަމުގެ ގޮތުން ކުރަމުންދާ ކަންކަން ކުރިއަށްގެންދަން މަސައްކަތްކޮށްފަވާ މައްސަލަތަކެއް މީގެކުރިންވެސް ފުލުހުން ބަލާފައިވެއެވެ.