ސައިކަލެއްގައި ދިޔަ އަންހެނަކު ފޭރެން އުޅުނު މައްސަލައެއް ފުލުހުން ބަލަންފަށައިފި
-
މި މައްސަލަ ރިޕޯޓްކޮށްފައިވަނީ މި ޖަނަވަރީ މަހުގެ 6 ވަނަ ދުވަހުގެ 18:34 ހާއިރު
-
އަންހެންމީހާގެ ހެލްމެޓް ނަގާ ވަލުތެރެއަށް އެއްލާލާފައިވޭ
ހައްދުންމަތީ ގަމުން ފޮނަދޫއަށް ސައިކަލެއްގައި ދުއްވާފަދިޔަ އަންހެނަކު ފޭރެން އުޅުނު މައްސަލަ ތަހުގީގުކުރަން ފަށައިފައިވާކަމަށް ފުލުހުންގެ ޚިދުމަތުން ވިދާޅުވެއްޖެއެވެ.
ފުލުހުންގެ ޚިދުމަތުން ވިދާޅުވީ ގަމުން ފޮނަދޫއަށް ދިޔަ އަންހެނަކާ ދެ ފިރިހެނަކު ދިމާކޮށް އެނާގެ ފޯނު ގަދަކަމުން އަތުލަން މަސައްކަތް ކޮށްފައިވާކަމަށެވެ. އަދި އެ އަންހެންމީހާގެ ހެލްމެޓް ނަގައި ވަލުތެރެއަށް އެއްލާލާފައިވާކަމަށްވެސް ފުލުހުން ވިދާޅުވިއެވެ.
މި މައްސަލަ ރިޕޯޓްކޮށްފައިވަނީ މި ޖަނަވަރީ މަހުގެ 6 ވަނަ ދުވަހުގެ 18:34 ހާއިރުކަމަށް ފުލުހުން ވިދާޅުވެއެވެ.
ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަ ގޮތުގައި ސައިކަލުގައި އިން އެއަންހެންމީހާ ހުއްޓުވައި، އެހެން ސައިކަލެއްގައި ހެލްމެޓް އަޅައިގެން ހުރި ދެ ފިރިހެނަކު އަންހެންމީހާގެ އަތުގައި އޮތް ފޯނު ފޭރެން މަސައްކަތް ކޮށްފައިވެއެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.