އަލިފާނުގެ ހާދިސާ: 13 މީހެއް އަދިވެސް ވަގުތީ ބޯހިޔާވަހިކަމުގައި

މަޖިދީމަގުގައި ހުރި ފިހާރައެއްގެ ގުދަނުގައި ހިނގި އަލިފާނުގެ ހާދިސާއާއި ގުޅިގެން، ވަގުތީ ބޯހިހިޔާވަހިކަމަށް ބަދަލުކުރި ފަރާތްތަކުގެ ތެރެއިން 13 މީހުން އަދިވެސްތިބީ ވަގުތީ ހިޔާތަކުގައިކަމަށާއި، އެމީހުންގެ އަމިއްލަ ގެދޮރަށް ބަދަލުކުރެވޭނީ އެތަންތަން މަރާމާތުކޮށްގެންކަމަށް ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ، އެންޑީއެމްއޭއިން ވިދާޅުވެއެވެ. އަލިފާނުގެ ހާދިސާއާއި ގުޅިގެން އެސަރަހައްދުގެ ބައެއް ގޭގެއިން 22 މީހަކު ވަގުތީ ހިޔާތަކަށް ބަދަލުކުރިއެވެ.

މިމަހުގެ 23 ވަނަ ދުވަހު މއ.ސްޕްރިންގް ރިވާ ގޭ 1ވަނަ ފަންގިފިލާގަ ހުންނަ، ފްރުޓް ޓްރީ އެޕަލް ފިހާރައިގެ ގުދަނުގައި އަލިފާން ރޯވެ ވަނީ އަނދާފައެވެ. މި ހާދިސާއާއި ގުޅިގެން އެސަރަހައްދުގެ އެހެން ބައެއް އިމާރާތްތަކުން މީހުން ވަގުތީ ހިޔާތަކަށް ބަދަލުކޮށްފައިވެއެވެ.

އަލިފާނުގެ ހާދިސާގައި ދުމުގެ ސަބަބުންނާއި އިމާރާތައް ލިބުނު ގެއްލުންތަކުގެ ސަބަބުން ވަގުތީ ބޯހިޔާވަހިކަން ބޭނުންވާ 10 ގޭބީސީއެއްގެ 33 ފަރާތެއް ފާހަގަކުރެވިފައިވެއެވެ. އެއީ 14 ދިވެހިންނާއި 19 ބިދޭސީންނެވެ. މީގެ ތެރެއިން އެސަރަހައްދުގެ ބައެއް ގޭގެއިން 22 މީހަކު ވަގުތީ ހިޔާތަކަށް ބަދަލުކޮށްފައިވެއެވެ. އެއީ 5 ގޭބިސީއެއްގެ 14 ދިވެހިންނާއި 8 ބިދޭސީންނެވެ.

އެންޑީއެމްއޭއިން ވިދާޅުވީ، ވަގުތީ ހިޔާތަކަށް ބަދަލުކޮށްފައިވާ 22 މީހުންގެ ތެރެއިން 9 މީހުން އަމިއްލަ ގޭތަކަށް ބަދަލުވެފައިވާކަމަށެވެ. އަދި މާދަމާގެ ނިޔަލަށް ބާކީ ތިބި 13 މީހުންނަށް ބޯހިޔާވަހިކަން ފޯރުކޮށްދެމުންދާނެކަމަށްވެސް އެ އިދާރާއިން ވިދާޅުވެއެވެ. އެމީހުންގެ ޒަރޫރީ ބޭނުންތަކަށް މިވަގުތު ޚަރަދު ކުރަމުންދަނީ ސަރުކާރުންނެވެ.

މަޖިދީމަގުގައި ހުންނަ ފުރުޓް ޓްރީ އެޕަލް ފިހާރައިގެ ގުދަނުގައި މިދިޔަ ބުރާސްފަތި ދުވަހު ހިނގި އަލިފާނުގެ ހާދިސާގައި ގެއްލުން ލިބުނު އިމާރާތުގެ ތަޅާލަންޖެހޭ ބައި ތަޅާލައި، ތަން ސާފުކޮށްފައިވެއެވެ. އަދި އެތަން ސާފުކުރުމުގެ މަސައްކަތްކުރީ ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާއިންނެވެ.

އެމްއެންޑީއެފުން ވިދާޅުވީ މި ހާދިސާ ހިނގައިގެން ރިޕޯޓްކޮށްފައިވަނީ ބުރާސްފަތި ދުވަހުގެ ފަތިހު 04:20 ހާއިރުކަމަށެވެ. އަދި އަލިފާންގަނޑު ފަތިހު 05:27 ހާއިރު ކޮންޓްރޯލްކުރިއިރު، އަލިފާން މުޅިން ނިއްވާލެވިފަވަނީ ހެނދުނު 06:00 ގައެވެ. އަލިފާން ނިއްވުމުގެ މަސައްކަތުގައި ފުލުހުންނާ އަދި އާންމު ރައްޔިތުންގެ ބޮޑު އެހީތެރިކަމެއް ލިބިފައިވާކަމަށް އެމްއެންޑީއެފްއިން ފާހަގަކުރެއްވިއެވެ.